ភ្នំពេញៈ ក្រោយពីយុទ្ធនាការប្រមូលសំរាមទទួលបានជោគជ័យដោយមានការចូលរួមយ៉ាងផុសផុស ពីសំណាក់យុវជន និងស្ថាប័នរដ្ឋជាច្រើនរួចមក លោក សានដារ៉ាវីត ដែលត្រូវបានគេស្គាល់ថា ជាយុវជនសំរាម បានងាកមកបង្កើតសាលារៀនវិញម្តងដើម្បីផ្តល់ចំណេះវិជ្ជាជូនទៅដល់កុមារក្រីក្រឱ្យបានសិក្សារៀនសូត្រ ដោយសាលានេះមានទីតាំងនៅរាជធានីភ្នំពេញនិងនៅខេត្តកំពង់ស្ពឺ។
លោក សាន ដារ៉ាវីត បានប្រាប់ឱ្យសារព័ត៌មាន SRDigital Media ដឹងថា៖
«នៅឆ្នាំ២០២៣ខែ៥ខ្ញុំឃើញក្មេងៗក្រីក្រ ដែលមានឪពុកម្តាយចំណាកស្រុកមករស់នៅទីក្រុងភ្នំពេញហ្នឹងពួកគេមិនទទួល បានការសិក្សារៀនសូត្រគ្រប់គ្រាន់ ដោយសារតែបន្ទុកជីវភាព ហើយពួកគេដូចជាដបប្លាស្ទិកដែលគេ ហូបហើយបោះចោល អ៊ីចឹងនាពាក់កណ្ដាលខែ៥ ខ្ញុំក៏បានបើកថ្នាក់រៀនមួយ ដែលមានសិស្សចូលរៀនតែ៥នាក់ស្ថិតនៅក្នុងបុរីកាំម៉េង សង្កាត់ព្រែកកំពឹសខណ្ឌដង្កោ រាជធានីភ្នំពេញ។
បន្ទាប់ពីបើកដំណើរសាលារៀនរួច លោក ដារ៉ាវីតក៏បានលើកសា្លកមួយឈ្មោះថា «សាលាបង្រៀនក្មេងក្រីក្រ» ក្រោយមកសាលានេះបានទទួលកុមារក្រីក្រចុះឈ្មោះជាហូរហែរប្រមាណ ៧០នាក់ ដែលជាកុមារទាំងនោះភាគច្រើនជាកូនរបស់កម្មករ អ្នកយាមដី សន្តិសុខ និងអ្នកចំណាក ស្រុកមក ធ្វើការនៅទីក្រុងជាដើម។ ដោយចំនួនសិស្សបានកើនឡើងច្រើនស្ថាបនិកសាលាបង្រៀនក្មេងក្រីក្រ រូបនេះ បានស្វែងរកគ្រូស្ម័គ្រចិត្តបន្ថែម ដោយផ្តល់នូវប្រាក់ឧបត្ថម្ភអាហារ ថវិកា សម្ភារៈ និងកន្លែង ស្នាក់ផងដែរ។
បុរសវ័យ ៣៣ ឆ្នាំរូបនេះបញ្ជាក់ថា៖
«នៅសាលាមានគ្រូបង្រៀនស្ម័គ្រចិត្ត៦នាក់ យើងមានបង្រៀន អក្សរសាស្ត្រខ្មែរ បរិស្ថាន អង់គ្លេសក៏ដូចជាកុំព្យូទ័រដែរ ហើយយើងឧបត្ថម្ភជាបាយ ទឹក ម្ហូបអាហារ សម្ភារៈ ជូនដល់ក្មេងៗទៀតចំណែកទីតាំងនេះវិញ គឺយើងទទួលបានការឧបត្ថម្ភពីសប្បុរសជនតាមពិតទៅកន្លែងសាលារៀននេះដំបូង ជាកន្លែងប្រមូលផ្ដុំ ប្រជុំយុវជនធ្វើការងារបរិស្ថានផ្សេងៗទេ តែខ្ញុំក៏សម្រេចកែទៅសាលាបង្រៀនក្មេងៗក្រីក្រនេះ»។
បន្ទាប់ពីបើកដំណើរការសាលានៅរាជធានីភ្នំពេញបានប្រមាណជាងកន្លះឆ្នាំអ្នកស្រឡាញ់បរិស្ថានរូបនេះ បានសម្រេចបង្កើតសាលារៀនទី២ ដែលមានឈ្មោះថា «សាលាសហគមន៍ភ្នំឱរ៉ាល់» ស្ថិតនៅភូមិស្រែកិន ឃុំត្រពាំងជោរ ស្រុកឱរ៉ាល់ខេត្តកំពង់ស្ពឺ ដើម្បីបង្រៀនក្មេងក្រីក្រដូចនឹងសាលារៀនទី១ដែរ។
លោក ដារ៉ាវីដ បានឱ្យដឹងថា៖
«ក្រោយចូលឆ្នាំខ្មែររួចសាលាចាប់ផ្ដើមបើក ពេលនោះមានសិស្សក្រីក្រជាង២០នាក់ដែលបានមកចុះឈ្មោះចូលរៀន ប៉ុន្តែពេលនេះយើងមានសិស្សជាង៩០នាក់ហើយក្នុងនោះមានគ្រូបង្រៀនចំនួន២នាក់ ដែលបង្រៀនអក្សរសាស្ដ្រខ្មែរ និងអង់គ្លេស ហើយនៅឱរ៉ាល់នេះគ្រូស្មគ្រ័ចិត្ត យើងផ្តល់ជូនអាហារ កន្លែងស្នាក់នៅ ផ្តល់ដីដាំដុះ និងចិញ្ចឹមសត្វនិងប្រាក់ឧបត្ថម្ភសម្រាប់គាត់»។
ថ្វីត្បិតសម្រេចបំណងបង្កើតសាលា និងទទួលបានសិស្សចូលរៀនច្រើនក៏ពិតមែនប៉ុន្តែស្ថាបនិកសាលា បង្រៀនក្មេងក្រីក្ររូបនេះ បានជួបនូវការលំបាកជាច្រើនដូចជាការកង្វះខាតថវិកាសម្ភារៈ និងគ្រូបង្រៀន។
លោក ដារ៉ាវីដ បញ្ជាក់ថា៖
«បញ្ហាចម្បងគឺថវិកាយើងត្រូវចំណាយជាង ២ពាន់ ទៅ៣ពាន់ដុល្លារ ក្នុងមួយខែ សម្រាប់គ្រប់គ្រងលើសាលាទាំង២ សាខាវាមានការឧបត្ថម្ភគ្រូ ចាយលើស្បៀងអាហារ និងការធ្វើដំណើរទៅមកភ្នំពេញ-ឱរ៉ាល់។បើសម្រាប់សាលានៅភ្នំពេញ បញ្ហាមួយទៀតគឺ សិស្សចូល រៀន និងឈប់ទៅវិញមិនទៀងទាត់ដោយសារក្មេងៗទាំងនោះ ត្រូវផ្លាស់ប្ដូរទីលំនៅរបស់ឪពុកម្តាយ។ចំណែកនៅឱរ៉ាល់នេះវិញ ពិបាករកគ្រូទៅបង្រៀន និងជួយមើលការខុសត្រូវផង»។
ទន្ទឹមនឹងនេះ សាន ដារ៉ាវីត ស្នើឱ្យសាធារណជន ជួយគាំទ្រគម្រោងសាលាបង្រៀងក្មេងក្រីក្រនេះ ដែលអាចចូលរួមជាថវិកា និងជំនួយផ្សេងៗ ព្រោះគម្រោងនេះត្រូវការចំណាយថវិកាច្រើនម៉្យាងបើ គម្រោងនេះជោគជ័យ លោកនឹងបន្តបង្កើតសាលាតាមទីជនបទបន្ថែមទៀត ដើម្បីផ្តល់ចំណេះដឹងដល់មូលដ្ឋានដែលមានកុមារក្រីក្រ និងពិបាកក្នុងការសិក្សា។
លោក បញ្ជាក់បែបនេះថា៖
«ខ្ញុំនៅមានកម្លាំង មានពេលវេលាគ្រប់គ្រាន់នៅតែធ្វើ នៅតែបន្តទៅមុខ ហើយរយៈពេល ៥ទៅ១០ឆ្នាំខាងមុខ ខ្ញុំរំពឹងថាអាចបង្កើតសាលារៀនតាមជនបទដាច់ស្រយាលឱ្យបានច្រើនដើម្បីបង្កើតឱកាស ឬក៏ជាជម្រើសសម្រាប់ក្មេងៗ យើងធ្វើអ្វីៗ ដើម្បីស្វែងរកការជួយឧបត្ថម្ភដល់ក្មេងៗឬធ្វើជាស្ពាន ហើយបើសិនជាសិស្សទាំងនោះ ពួកគាត់ចង់រៀនបន្តនៅថ្នាក់ សកលវិទ្យាល័យនោះខ្ញុំនឹងស្វែងរកអាហារូបករណ៍ជូនពួកគាត់ផងដែរ»៕
.png)
