បាត់ដំបងៈ ផ្កាព្រៃរីស៊តគឺជាទីតាំងសម្រាកលម្ហែដ៏ស្រស់ស្អាតមួយ ល្បីប្រចាំទឹកដីបាត់ដំបងដែលសាងសង់តាមចង្កេះភ្នំ រចនាឡើងយ៉ាងប្លែកភ្នែកព័ទ្ធទៅដោយធម្មជាតិព្រៃឈើជួរភ្នំដ៏ត្រកាលនិងមានទឹកធ្លាក់ជាច្រើនកន្លែង។
ដើម្បីទៅលេងផ្កាព្រៃរីស៊ត ភ្ញៀវទេសចរអាចធ្វើដំណើរចេញពីក្រុងបាត់ដំបង ឆ្ពោះទៅកាន់ស្រុកសំឡូត តាមផ្លូវជាតិលេខ ៥៧រហូតទៅដល់ផ្លូវបំបែកផ្សាររ៉ែដែក រួចបន្តដំណើរតាមផ្លូវសំឡូតចាស់នឹងទៅដល់ទីតាំង ហើយរីស៊តនេះមានចម្ងាយប្រមាណជាង ៨០គីឡូម៉ែត្រពីក្រុងបាត់ដំបង។
មកដល់ទីតាំងភ្លាម អ្នកទេសចរច្បាស់ជារសាយអស់នូវភាពស្មុគស្មាញទាំងអម្បាលម៉ាន ត្បិតទេសភាពពណ៌បៃតងជំនោរខ្យល់ត្រជាក់ ក្លិនពិដោរដ៏ឈ្ងុយឈ្ងប់ ហាក់ចូលមកប្រលោមលួងលោមធ្វើឱ្យអ្នកសប្បាយក្នុងចិត្ត និងមិនចង់ឱ្យទៅណាឆ្ងាយពីទីនេះ។
បង្អួតរាងលើចង្កេះភ្នំ រីស៊តដ៏មនោរម្យនេះរៀបចំរចនាឡើងយ៉ាងទាក់ទាញ ក្រាលក្របដោយវាលស្មៅ រុក្ខជាតិតូចធំសួនច្បារផ្កាចម្រុះពណ៌ មានទោងយោល កន្លែងអង្គុយលេង កន្លែងថតរូបស្អាតៗនិងទីសម្រាប់លម្ហែគយគន់ធម្មជាតិជាដើម សំខាន់ផ្ទះលម្ហែជាច្រើន បានផុសឡើងតម្រៀបគ្នាក្រវ៉ាត់ចង្កេះភ្នំ គួរឱ្យចង់ស្នាក់នៅ។
កញ្ញា វឿន សុភ័ស្សអ្នកទទួលភ្ញៀវនៅផ្កាព្រៃរីស៊តបានប្រាប់សារព័ត៌មាន SR ថា៖ «ផ្កាព្រៃរីស៊តបង្កើតឡើងនៅឆ្នាំ២០២២ ស្ថិតនៅលើចង្កេះភ្នំ មានជួរភ្នំជុំវិញទាំងអស់ គឺធម្មជាតិស្រស់បំព្រងតែម្តងជាពិសេសនៅរដូវវស្សា នៅពេលដែលមានភ្ញៀវធ្លាក់តិចៗ រីស៊តផ្កាព្រៃមានចុះអ័ព្ទច្រើនពាសពេញមេឃទាំងអស់ ហើយនៅពេលព្រឹក យើងអាចឡើងទៅលើភ្នំអង្គុយមើលថ្ងៃរះ ស្រូបយកខ្យល់បរិសុទ្ធ ស្រស់ស្រាយពេលរសៀលយើងក៏អាចអង្គុមើលថ្ងៃលិចបានដែរដែលព្រះអាទិត្យជះពន្លឺពណ៌មាសស្អាតណាស់»។
នៅផ្កាព្រៃរីស៊ត ភ្ញៀវទេសចរ អាចមកសម្រាកលម្ហែនិងមកកម្សាន្តលេងបានដូចគ្នា ដោយទីនេះ បើកដំណើរការជារៀងរាល់ថ្ងៃក្នុងនោះពីថ្ងៃចន្ទ ដល់ថ្ងៃសុក្រ បើកដំណើរការចាប់ពីម៉ោង៧ ព្រឹក ដល់ម៉ោង៧យប់ ចំណែកថ្ងៃសៅរ៍ និងអាទិត្យ ចាប់បើកដំណើរការពីម៉ោង ៧ ព្រឹកដល់ម៉ោង៩យប់។
សម្រាប់ការស្នាក់នៅ ទីដ៏ត្រកាលនេះមានផ្ទះស្នាក់ជាច្រើនប្រភេទដូចជា ផ្ទះកញ្ចក់ តម្លៃ១១៥ ដុល្លារ, តង់ផែនដីតម្លៃ៩៥ដុល្លារ, តង់កណ្តឹងប្រណិតតម្លៃ ៤៥ដុល្លារ(ពួក១) និងតម្លៃ ៥៥ដុល្លារ (ពួក២),ផ្ទះផ្ការីកតម្លៃ១៨៥ដុល្លារ និងផ្ទះវល្លិជាដើម ដែលផ្ទះលម្ហែទាំងអស់នេះ រៀបចំបានយ៉ាងស្អាតនិងមានផាសុកភាព ក្រៅពីនេះក៏មានកន្លែងសម្រាប់បោះតង់ផងដែរ។
ក្រៅពីការស្នាក់នៅ គេក៏មានសេវាម្ហូបអាហារដែលបម្រើជូននូវម្ហូបជាច្រើនមុខ ជាលក្ខណៈជនបទ និងម្ហូបប្រចាំតំបន់និងមានកាហ្វេ ក៏ដូចជាភេសជ្ជៈជាច្រើនទៀត។ បន្ថែមពីមុខម្ហូបខាងលើ ទីនេះក៏មានជាឈុតសាច់អាំង និងជាស្តេក (Steak)ដែលស័ក្កសមសម្រាប់ទទួលនាពេលល្ងាចឬពេលរាត្រី ដើម្បីកំដរ បរិយាកាសឱ្យកាន់តែមានន័យ។
សម្រាប់សេវាកម្សាន្តវិញ អ្នកទេសចរក៏នឹងទទួលបានបទពិសោធន៍ថ្មី នៃកម្សាន្តបែបផ្សងព្រេងតាមព្រៃភ្នំ (Adventure) ការជិះម៉ូតូកង់បួនក្នុងរីស៊តនិងជិះលេងតាមភូមិ និងការទៅងូតទឹកលេងទឹកធ្លាក់ជាច្រើន នៅក្នុងតំបន់នេះ។
ផ្កាព្រៃរីស៊តមានទីតាំងស្ថិតនៅភូមិកណ្តាល ឃុំស៊ុង ស្រុកសំឡូត ខេត្តបាត់ដំបង។គេហទំព័រហ្វេសប៊ុកៈ ផ្កាព្រៃ រីស៊ត Pkaprey Resort ឬទំនាក់ទំនងតាមលេខទូរសព្ទៈ០១៦ ៩២៩ ២ ០០/ ០១៧ ៩២៩ ២ ០០៕
.jpg)
.jpg)
