ព្រឹត្ដិការណ៍ប្រជុំរថយន្តប្រណីតលំដាប់ពិភពលោក Gumball 3000 នឹងមកដល់ប្រទេសកម្ពុជាជាលើកដំបូងនៅពាក់កណ្ដាលខែកញ្ញាខាងមុខ ជាមួយវត្តមានរថយន្តប្រមាណ ១៣០គ្រឿងរបស់មហាសេដ្ឋី តារា និងកីឡាករល្បីៗ ដែលរាជរដ្ឋាភិបាលរំពឹងថានឹងរួមចំណែកលើកស្ទួយទេសចរណ៍ព្រះរាជាណាចក្រកម្ពុជា។
រដ្ឋលេខាធិការក្រសួងទេសចរណ៍ លោក គុជ បញ្ញាសា បានឱ្យដឹងថា គោលបំណងចំនួន៤សំខាន់ៗនៃ ការនាំយកនូវព្រឹត្តិការណ៍ GUMBALL 3000 រួមមាន ការជំរុញវិស័យទេសចរណ៍នៅកម្ពុជា ការចូលរួមចំណែកក្នុងសប្បុរសធម៌ទៅកាន់មន្ទីរពេទ្យកុមារអង្គរ ការបើកឱកាសរវាងអ្នកវិនិយោគទុនឯកជនបរទេស និងនៅក្នុងស្រុកបានជួបគ្នា និងការបង្កើតកំណត់ត្រាហ្គីនណេសពិភពលោកនៅមុខប្រាសាទអង្គរ។
ថ្លែងនៅក្នុងសន្និសីទសារព័ត៌មាននាថ្ងៃទី២១ ខែកក្កដា នៅផ្សារទំនើប ជីប ម៉ុង មេហ្គាម៉ល លោករដ្ឋលេខាធិការ បានលើកឡើងថា៖ «ព្រឹត្តិការណ៍ GUMBALL 3000 គឺជាព្រឹត្តិការណ៍អន្តរជាតិមួយដែលកម្ពុជាធ្វើជាម្ចាស់ផ្ទះ ដូច្នេះយើងនឹងប្រើប្រាស់សក្ដានុពលដែលយើងមាន ដើម្បីផ្សព្វផ្សាយគោលដៅទេសចរណ៍កម្ពុជាទៅពិភពលោក។ ក្នុងន័យនេះមិនមែនត្រឹមតែ Super Car កម្ពុជានោះទេ វាជាឱកាសដ៏កម្រមួយដែលអ្នកល្បីៗបើកឡានទៅកាន់ទឹកដីអង្គរ ធ្វើឱ្យអង្គរកាន់តែល្បីបន្ថែមទៀត»។
.jpg)
ការផ្សាភ្ជាប់វប្បធម៌រថយន្ត សិល្បៈ ហ្វេសសិន និងសកម្មភាពសង្គម
នេះជាលើកទីមួយហើយដែលព្រឹត្តិការណ៍ប្រជុំរថយន្តប្រណីតមួយនេះបានមកដល់ប្រទេសកម្ពុជា ស្របពេលខួបលើកទី ២៥ឆ្នាំ នៃការបង្កើត Gumball 3000 ដោយសហគ្រិនអង់គ្លេស លោក MaximillionCooper ជាមួយចក្ខុវិស័យផ្សារភ្ជាប់ការស្រឡាញ់រថយន្តជាមួយតន្ត្រី ហ្វេសសិន និងវប្បធម៌។
រថយន្ដប្រណីតៗប្រមាណ ១៣០គ្រឿង នឹងចំណាយពេល ២យប់ ៣ថ្ងៃ នៃព្រឹត្ដិការណ៍ Gumball 3000 នៅប្រទេសកម្ពុជាចាប់ពីថ្ងៃទី ១៤ខែកញ្ញា។ នៅរាជធានីភ្នំពេញ អ្នកចូលរួមអាចមកជួបជុំគ្នានៅរង្វង់មូលវិមានឯករាជ្យ រហូតដល់រង្វង់មូលសម្ដេចសង្ឃរាជ ជួន ណាត នៅថ្ងៃទី ១៥ ខែកញ្ញា ២០២៤ ដើម្បីរីករាយទស្សនាការប្រគំតន្ត្រីខ្នាតធំ នៅសួរច្បារវត្តបទុមវតី ដោយក្រុមរថយន្ត Gumball នឹងមកដល់នៅចន្លោះម៉ោង ៥ ដល់ម៉ោង៧យប់។
លោក គុជ បញ្ញាសា បានលើកឡើងថា៖ «នៅក្នុងព្រឹត្តិការណ៍ Gumball 300 ខាងមុខនេះ នឹងមានអតីតកីឡាករបាល់ទាន់នៅអឺរ៉ុបចំនួន ៤នាក់ ហើយនៅមានអ្នកចម្រៀងហ៊ីបហប់ តារារ៉េបល្បីៗ កីឡាករ សេដ្ឋីដែលមានលុយកាក់ហូរហៀរ មកចូលរួមកម្មវិធីនេះផងដែរ»។
.jpg)
ក្រៅពីជាកម្មវិធីប្រជុំរថយន្តប្រណីត Gumball300០ ក៏មានមូលនិធិជួយសហគមន៍ និងគាំទ្រការអភិវឌ្ឍន៍ធនធានយុវជនទូទាំងពិភពលោក ហើយដំណើរមកដល់ប្រទេសកម្ពុជាក៏មិនខុសគ្នាដែរ។
លោករដ្ឋលេខាធិការក្រសួងទេសចណ៍ បានឱ្យដឹងទៀតថា៖ «ក្នុងចំណោមសកម្មភាពធំៗចំនួន ៤ ក្នុងដំណើរទេសចរណ៍ និងស្នាក់នៅរបស់ប្រតិភូ Gumball 3000 គឺកម្ពុជាបានត្រៀមខ្លួនរួចជាស្រេច ដើម្បីចែករំលែកភាពអស្ចារ្យដែលខ្មែរមាន ហើយប្រតិភូទាំងនោះក៏មានសកម្មភាព និងជំនួយសម្បុរសធម៌ប្រកបដោយស្នាមញញឹមមិនអាចបំភ្លេចបានដល់កម្ពុជាដែរ»។
នៅថ្ងៃទី១៦ ក្បួនរថយន្តប្រណីតនឹងចេញដំណើរពីភ្នំពេញ ទៅកាន់សៀមរាប ដោយឈប់នៅឃុំកំពង់ឃ្លាំងខេត្តសៀមរាប ដើម្បីធ្វើការបរិច្ចាគដល់សហគមន៍រងហានិភ័យដោយគ្រោះទឹកជំនន់ និងប្រកាសគម្រោងបង្កើតតារាងបាល់ទាត់នៅទីនោះ។ ចុងភៅល្បីៗក៏នឹងត្រូវបានអញ្ជើញឱ្យចម្អិនម្ហូបជូនប្រជាជនសហគមន៍កំពង់ឃ្លាំងប្រហែលជា ៥០ ទៅ១០០គ្រួសារ មុននឹងបន្តដំណើរទៅទីរួមខេត្តសៀមរាប។
នៅព្រឹកថ្ងៃទី១៧ ខែកញ្ញា រថយន្ត Gumball មានចំនួន១៣០គ្រឿង រួមទាំងរថយន្តកម្ពុជា ៥-៦រយឡាន នឹងទៅជួបជុំគ្នាថតរូបនៅមុខប្រាសាទអង្គរ ដើម្បីផ្សព្វផ្សាយតំបន់បេតិកភ័ណអច្ឆរិយពិភពលោក ក៏ដូចជាបង្កើតកំណត់ត្រាឯតទគ្គកម្មហ្គីនណេសពិភពលោក មុននឹងក្រុមរថយន្ត Gumball 300 បន្តដំណើរទៅប្រទេសថៃ។
លោករដ្ឋលេខាធិការក្រសួងទេសចរណ៍បានបញ្ជាក់ថា៖ «ការចតឡានប្រណីតៗរបស់មហាសេដ្ឋី តារាល្បីៗរបស់ពិភពលោក ព្រមទាំងឡានល្អៗត្រូវនឹងលក្ខណ្ឌ នៃកម្មវិធីនេះរបស់អ្នកចូលរួមខ្មែរយើង អាចចូលខ្ទង់ពាន់គ្រឿង ដើម្បីឲ្យក្រុមការងារ Guinness WorldRecord ធ្វើការវាយតម្លៃ និងផ្ដល់កំណត់ត្រា ចំពោះការដាក់បង្ហាញឡានប្រណីតៗ និងច្រើនជាងគេរបស់មហាសេដ្ឋី និងតារាល្បីៗនៅមុខប្រាសាទអង្គរវត្ដ ដល់កម្ពុជា»។
ជាច្រើនឆ្នាំមកហើយ ប្រាសាទអង្គរវត្ដ ដែលជាសម្បត្ដិបេតិកភណ្ឌពិភពលោក មិនត្រូវបានអនុញ្ញាតឲ្យដាក់ឡាន ឬយាន្ដជំនិះផ្សេងៗនៅមុខប្រាសាទ ដើម្បីថតនោះទេ។
ជាមួយវត្តមានមហាសេដ្ឋីមានប្រាក់វាល់លាន តារាល្បីៗជុំវិញពិភពលោកថតរូបជាមួយឡានរបស់ខ្លួន ដើម្បីបង្ហោះនៅលើបណ្ដាញសង្គម លោក គុជ បញ្ញាសា បានលើកឡើងថា៖ «ការថតរូបហើយបង្ហោះនៅលើ social media គឺមហាជោគជ័យរបស់កម្ពុជាមួយដែរ ព្រោះយើងគិតមើលពួកគាត់រាប់រយនាក់ ហើយហ្វេនៗ និងអ្នកស្គាល់គាត់រាប់លាននាក់ នឹងបានឃើញរូបពួកគាត់ជាមួយប្រាសាទអង្គរវត្ដខ្មែរយើង។ ចំពោះការបំបែកកំណត់ត្រា យើងក៏សង្ឃឹមលើការចូលរួមពីឡានរបស់ខ្មែរយើងមួយចំនួនធំដែរ ដើម្បីអាចធ្វើវាបាន»។
ចាប់ផ្ដើមពីថ្ងៃទី ១៤ ខែកញ្ញា ព្រឹត្តិការណ៍ Gumball 3000 នឹងចេញដំណើរពីទីក្រុងហូជីមិញ ប្រទេសវៀតណាម ឆ្លងកាត់កម្ពុជា តាមច្រកព្រំដែនអន្ដរជាតិបាវិត ឆ្ពោះមកកាន់រាជធានីភ្នំពេញនៅថ្ងៃទី១៥ និងចេញទៅខេត្ដសៀមរាប នៅថ្ងៃទី១៦ ហើយបន្ដស្នាក់នៅ១យប់នៅលើទឹកដីអង្គរ មុននឹងបន្ដដំណើរទៅកាន់ប្រទេសថៃ ម៉ាឡេស៊ី ហើយបញ្ចប់គោលដៅនៅសិង្ហបុរី នៅថ្ងៃទី ២២ ខែកញ្ញា ដោយធ្វើដំណើរលើចម្ងាយផ្លូវ ៣០០០ ម៉ាយ (ប្រមាណ ៤៨២៨គីឡូម៉ែត្រ)៕
