.jpg)
វាមិនមែនជាសំណួរថ្មីទេហើយនរណាៗក៏ឆ្ងល់រឿងនេះដែរ។ ហេតុអ្វីបានជាមូសហាក់ដូចជាចូលចិត្តបឺតឈាមមនុស្សខ្លះខណៈដែលវាមិនសូវខ្វល់នឹងមនុស្សមួយចំនួនទៀត?
នោះមិនមែនមកពីមូលហេតុ«ឈាមផ្អែម» ទេ។ វាគឺជាការរួមបញ្ចូលគ្នានៃកត្តាជាច្រើនដែលធ្វើឱ្យអ្នកខ្លះក្លាយជាចំណីដ៏គួរឱ្យទាក់ទាញសម្រាប់មូសរីឯអ្នកខ្លះទៀតរួចខ្លួនពីមាត់បំពង់ដ៏ស្រួចរបស់វា។
.jpg)
វេជ្ជបណ្ឌិត Amelia Ng អ្នកជំនាញផ្នែកបាណកវិទ្យានៅសកលវិទ្យាល័យជាតិសិង្ហបុរីពន្យល់ថា៖«មូសត្រូវបានទាញដោយលក្ខខណ្ឌជីវសាស្ត្ររបស់មនុស្សផ្សេងៗគ្នា»។
អ្នកជំនាញរូបនេះបានពន្យល់ហេតុផលថា៖«ការដកដង្ហើមបញ្ចេញកាបូនឌីអុកស៊ីត សីតុណ្ហភាពរាងកាយនិងសូម្បីតែអាស៊ីតឡាក់ទិកដែលយើងផលិតនៅពេលយើងហត់ជាដើម សុទ្ធសឹងជាកត្តានាំឱ្យមនុស្សម្នាក់ទាក់ទាញសត្វមូសខាំជាងអ្នកដទៃទៀត»។
សត្វមូសប្រើអង់តែនរបស់ពួកវាដើម្បីចាប់សញ្ញាគីមីទាំងនេះដែលនាំពួកវាហោះទៅរកអាហារឈាមជាបន្តបន្ទាប់។មនុស្សដែលបញ្ចេញកាបូនឌីអុកស៊ីតច្រើនតាមធម្មជាតិ ជារឿយៗដោយសារតែអត្រាមេតាបូលីសខ្ពស់ឬទំហំរាងកាយធំជាង ក្លាយជាគោលដៅចម្បងរបស់ពពួកមូស។
ស្ត្រីមានផ្ទៃពោះក៏ស្ថិតនៅក្នុងក្រុមមនុស្សងាយរងគ្រោះជាពិសេសដោយសារមូសខាំផងដែរ។
វេជ្ជបណ្ឌិត Ng បាននិយាយថា៖«ការកើនឡើងនៃសីតុណ្ហភាពរាងកាយនិងការផលិតកាបូនឌីអុកស៊ីតធ្វើឱ្យពួកគេកាន់តែទាក់ទាញដល់មូស»។
.jpg)
លើសពីសញ្ញាគីមីការស្រាវជ្រាវមួយចំនួន ក៏បានកំណត់ជាបឋមថា ប្រភេទឈាមមួយចំនួនក៏អាចជាកត្តាទាក់ទាញមូសបានផងដែរ។ទោះជាយ៉ាងណាក៏ដោយ វេជ្ជបណ្ឌិត Ng បានអះអាងថា៖ «ពុំទាន់មានសេក្តីសន្និដ្ឋានច្បាស់លាស់នោះទេដែលបង្ហាញពីភស្តុតាងថា ប្រភេទឈាមណាមួយដែលទាក់ទាញមូសជាងគេនោះ ប៉ុន្តែការទាក់ទាញមូសវាទំនងជាការរួមបញ្ចូលគ្នានៃកត្តាជាច្រើនក្នុងរាងកាយជាជាងប្រភេទឈាមតែម៉្យាង»។
នេះគឺជាហេតុផលបន្ថែមមួយចំនួនដែលមនុស្សអាចប្រឈមនឹងមូសខាំច្រើន៖
អតិសុខុមប្រាណលើស្បែក៖បណ្ដុំបាក់តេរីតូចៗដែលនៅលើស្បែករបស់អ្នកអាចមានឥទ្ធិពលក្នុងការទាក់ទាញមូសមកខាំ។បាក់តេរីខ្លះអាចបង្កើតសារធាតុការពារមូស និងខណៈខ្លះទៀតបែរជាបង្កើតសារធាតុទាក់ទាញមូសទៅវិញ។
ពណ៌សម្លៀកបំពាក់៖មូសទំនងជាពេញចិត្តនឹងសម្លៀកបំពាក់ពណ៌ងងឹត ជាពិសេសពណ៌ខ្មៅ និងក្រហម។
កត្តាហ្សែន៖មនុស្សមួយចំនួនអាចមានទំនោរហ្សែនដែលធ្វើឲ្យពួកគេងាយនឹងខាំមូស។
ដូច្នេះតើអ្នកអាចធ្វើយ៉ាងណាដើម្បីកុំឱ្យក្លាយជាអាហារប៊ូហ្វេសរបស់មូស?
វេជ្ជបណ្ឌិត Ng បានផ្តល់អនុសាសន៍ឱ្យប្រើថ្នាំបាញ់សត្វល្អិតដែលមានDEET ឬ picaridin។
.jpg)
អ្នកជំនាញរូបនេះលើកឡើងថា៖«វាមានប្រសិទ្ធភាពខ្ពស់ក្នុងការទប់ស្កាត់មូស។លើសពីនេះ ការស្លៀកពាក់ពណ៌ស្រាល សម្លៀកបំពាក់រលុង និងជៀសវាងតំបន់ដែលមានដក់ទឹកអាចកាត់បន្ថយអត្រាមូសខាំបាន»។
ចំពោះកត្តាមួយចំនួនដូចជាហ្សែន អតិសុខុមប្រាណលើស្បែក ការបញ្ចេញកាបូនឌីអុកស៊ីត សីតុណ្ហភាពរាងកាយនិងអាស៊ីតឡាក់ទិក ជាកត្តាដែលអ្នកមិនអាចគ្រប់គ្រងបានទេ។ ដូច្នេះការយល់ដឹងអំពីមូលហេតុដែលធ្វើឱ្យអ្នកងាយរងបញ្ហាមូសខាំអាចជួយឱ្យរូបអ្នកត្រៀមខ្លួន ជាមួយវិធានការកាត់បន្ថយឱកាសក្លាយជាអាហាររបស់ពួកវា៕
.jpg)
