ក្រុងព្រះសីហនុៈ កីឡាលើទឹកក្បាលឆាយខេត្តព្រះសីហនុ(BACAI DRIFT) គឺជារមណីយដ្ឋានថ្មីមួយប្លែកពុំធ្លាប់ មានពីមុនមកដែលមានកីឡាលើទឹកនេះប្លែកខុសពីកីឡាលើទឹកដ៏ទៃទៀត គឺជាការជិះទូកបង្ហូតខ្លួនតាមដងទឹកធ្លាក់ក្បាលឆាយជ្រែកកាត់ធម្មជាតិព្រៃភ្នំដ៏ខៀវស្រងាត់។
មានចម្ងាយប្រមាណ ១៥ គីឡូម៉ែត្រពីក្រុងព្រះសីហនុ កីឡាលើទឹកក្បាលឆាយបើកដំណើរជារៀងរាល់ថ្ងៃ ដោយភ្ញៀវទេសចរអាចធ្វើការទិញសំបុត្រដើម្បីចូលកម្សាន្តបានក្នុងតម្លៃ១៥ដុល្លារ សម្រាប់ភ្ញៀវជាតិ និងតម្លៃ ៣០ ដុល្លារ សម្រាប់ភ្ញៀវបរទេស ជាពិសេសភ្ញៀវក៏អាចយកម្ហូបអាហារចូលបានដោយសេរីពុំមានគិតប្រាក់នោះឡើយ។
បើតាមបុគ្គលិកនៅរមណីយដ្ឋានកីឡាលើទឹកក្បាលឆាយ បានប្រាប់សារព័ត៌មានSRDigital Media ឱ្យដឹងថា កីឡាលើទឹកនេះមានតែនៅបរទេសប៉ុណ្ណោះ ប៉ុន្តែពេលនេះបានមកដល់ទឹកដីខេត្តព្រះសីហនុហើយដោយការជិះ ទូកតាមទឹកធ្លាក់នេះមានប្រវែង២,៣គីឡូម៉ែត្រនិងកម្ពស់ទឹកជ្រោះពី៨០ម៉ែត្រទៅ១០០ម៉ែត្រ មិនត្រឹមតែប៉ុណ្ណោះ ទីតាំងនេះអំណោយផលល្អសម្រាប់កីឡាលើទឹកទាំងក្នុងរដូវប្រាំង និងរដូវវស្សា។
សម្រាប់ការជិះទូកនេះ បុគ្គលិករមណីយដ្ឋាន នឹងរៀបចំពាក់អាវពោងសុវត្ថិភាពនិងមួកសុវត្ថិភាព ជូនភ្ញៀវជាមុនសិន ក្នុងការកម្សាន្តនេះគេមានស្រោមការពារទឹកសម្រាប់ដាក់ទូរសព្ទផ្តិលសម្រាប់ដងទឹក និងកាំភ្លើងបាញ់ទឹកផងដែរ ទុកសម្រាប់ភ្ញៀវលេងជះទឹកកម្សាន្ត។សម្រាប់ទូកមួយ ភ្ញៀវអាចជិះបានប្រមាណ ២ ទៅ ៣ នាក់ ដោយចាប់ផ្តើមចេញពី ដំណាក់ខាងលើចុះទៅដំណាក់ខាងក្រោម។
.jpg)
នៅតាមផ្លូវកាត់ទឹកជ្រោះដ៏ស្រស់ស្អាត ភ្ញៀវនឹងបានសប្បាយបុកពោះដោយសារតែល្បឿនទឹកហូរ និងការទម្លាក់ ខ្លួននៃទូកតាមល្បាក់ទឹកធ្លាក់ ជាពិសេសទេសភាពធម្មជាតិពីកន្លែងមួយទៅកន្លែងមួយសុទ្ធសឹងតែរំលេចនូវ ផ្ទាំងទស្សនីយភាពដ៏ស្រស់ស្អាត នៃព្រៃឈើ ក្រំថ្មំ ជាពិសេសសំឡេងស្រែកហ៊ោកញ្ជ្រៀវកងរំពងព្រៃរបស់ក្រុមអ្នកជិះទូកកម្សាន្ត។
ក្រៅពីការជិះទូក អ្នកទេសចរក៏អាចចតទូក និងចុះងូតទឹកលេងយ៉ាងសប្បាយនៅទីតាំងដែលមានទឹកធ្លាក់ស្អាតៗក្រោមអាកាសធាតុត្រជាក់ ស្តាប់សំឡេងទឹកហូរ សំឡេងសត្វបក្សាបក្សីស្រែកច្រៀង ដែលនេះហាក់ដូចជាវង់ភ្លេងធម្មជាតិ ដែលកំពុងប្រគុំបំពេរសោតទិន្ទ្រីយារម្មណ៍របស់អ្នកដូច្នោះដែរ។
នៅរមណីយដ្ឋាន កីឡាលើទឹកក្បាលឆាយ មានបុគ្គលិករង់ចាំបម្រើនិងការពារសុវត្ថិភាពភ្ញៀវជាប់ជានិច្ច ដោយទីនេះ មានបុគ្គលិកប្រចាំការតាមដំណាក់នៃទឹកធ្លាក់ចាំជួយភ្ញៀវទេសចរដូចជាការជាប់ទូក ឬទូកក្រឡាប់ជាដើម។ ក្រោយពីជិះទូកកម្សាន្តរួច ទីនេះក៏មានសេវាជូនភ្ញៀវទេសចរទៅកាន់កន្លែងដើមផងដែរ។
ជាមួយគ្នានេះ ទីតាំងកម្សាន្តកីឡាទឹកនេះ ក៏បន្ទប់ស្នាក់នៅប្រកបដោយផាសុកភាពកន្លែងស្ទូចត្រី ក្យូសសម្រាប់អង្គុយលេង កន្លែងអាំងសាច់ និងមានកន្លែងកម្សាន្តផ្សេងៗជាច្រើនទៀត។
អ្នកទេសចរអាចមកដកបទពិសោធន៍ថ្មីនៃការលេងកីឡាលើទឹកនេះបានដែលរមណីយដ្ឋានកីឡាលើទឹក ក្បាលឆាយខេត្តព្រះសីហនុ មានទីតាំងស្ថិតនៅភូមិអូរត្រាវឃុំអណ្ដូងថ្ម ស្រុកព្រៃនប់ ខេត្តព្រះសីហនុ ឬទាក់ទាងតាមគេហទំព័រហេ្វសប៊ុកកីឡាលើទឹកក្បាលឆាយខេត្តព្រះសីហនុ BA CAI DRIFT៕
.jpg)
.jpg)
