«ព្រះរាជបណ្ណាល័យហ្លួងម៉ែ» ឃ្លាំងចំណេះដឹង និងរក្សាទុកឯកសារប្រវត្តិសាស្ត្រដ៏មានតម្លៃ

ភ្នំពេញៈ «ព្រះរាជបណ្ណាល័យហ្លួងម៉ែ» គឺជាទីតាំង​ដាក់​តម្កល់​សៀវភៅ​ និង​ឯកសារ​​ប្រវត្តិសាស្ត្រ​កម្ពុជារាប់ពាន់ដែល​បង្កើតឡើង​ដើម្បី​ឱ្យ​យុវជន​មាន​មូលដ្ឋាន​សម្រាប់​ការសិក្សា​ស្រាវជ្រាវដើម្បី​ស្វែងយល់​អំពី​អត្តសញ្ញាណ​ខ្លួនឯង។

លោក រស់ សំពៅ អ្នកគ្រប់គ្រងបណ្ណាល័យសម្តេចម៉ែឬហ្លួងម៉ែ បានប្រាប់សារព័ត៌មាន SR ឱ្យដឹងថា ព្រះរាជបណ្ណាល័យហ្លួងម៉ែ បង្កើតឡើងនៅក្នុងឆ្នាំ២០២០មាន​ឯកសារជាសៀវភៅប្រមាណ ២៤០០ ក្បាល និងឯកសារផ្សេងជាច្រើនទៀត ទាក់ទងនឹងសិល្បៈវប្បធម៌ ច្បាប់ ទំនាក់ទំនងអន្តរជាតិ មានទាំងភាសាអង់គ្លេស បារាំង និងខេមរៈភាសាក្រៅពីនេះក៏មាននូវសៀវភៅប្រវត្តិសាស្ត្រ ឯកសារស្តីពីព្រះរាជកិច្ចរបស់ព្រះមហាក្សត្រ និងរាជវង្សានុវង្សនិងតម្កល់នូវរូបថត ភាពយន្ត ខ្សែអាត់សំឡេង នៅក្នុងសម័យខ្មែរក្រហមផងដែរ។

លោក រស់ សំពៅ បន្ថែមថាបណ្ណាល័យហ្លួងម៉ែបើកដំណើរការចាបពីម៉ោង ៧:៣០ នាទីព្រឹក ដល់ម៉ោង ១២:០០ នាទីថ្ងៃត្រង់ និងពីម៉ោង ១:៣០ នាទីរសៀល ដល់ម៉ោង ៥:០០ នាទីល្ងាចរៀងរាល់ថ្ងៃចន្ទ ដល់ថ្ងៃសុក្រ ដោយសិស្ស និស្សិត និងសាធារណជនអាចចូលរួមដោយសេរីឬផ្ញើសារប្រាប់ជាមុនបាន តាមរយៈគេហទំព័រហ្វេសប៊ុក The Queen Mother Library។  

បើតាមអ្នកគ្រប់គ្រងបណ្ណាល័យសម្តេចម៉ែរូបនេះបញ្ជាក់ថា៖ «ក្នុង១ថ្ងៃ មានអ្នកចូលទស្សនាប្រមាណ១០នាក់ ភាគច្រើនជាសិស្សថ្នាក់វិទ្យាល័យ មហាវិទ្យាល័យ អ្នកថតមាតិកា យូធូប( Youtube) ជាដើម និងមានអ្នកមួយចំនួនមកថតរូបលេងហើយពេលខ្លះមានក្រុមសិស្សានុសិស្ស មកពីតាមបណ្តាខេត្ត មកធ្វើកម្មសិក្សាស្រាវជ្រាវផងដែរ។ នៅបណ្ណាល័យនេះ ភាគច្រើន យើងមានតាំងជាឯកសារឌីជីថល ដោយយើងបានស្កេនជាហ្វាល់(File) PDS ស្រាប់ អ៊ីចឹងសិស្សដែលគាត់មិនបានមក អាចយកអានជា PDS បាន យើងផ្ញើឱ្យបាន ហើយយើងក៏មានការបង្ហាញជាផ្ទាំងវីដេអូឬភាពយន្តខ្លីៗ ដែលជាកុន ឯកសារទាក់ទងព្រះករុណា និងឯកសារប្រវត្តិសាស្ត្រផងដែរ»។

ដោយឡែក ទាក់ទងនឹងការដាក់ឈ្មោះបណ្ណាល័យសម្តេចម៉ែបែបនេះលោក ឆាំង យុ នាយក​មជ្ឈមណ្ឌល​ឯកសារ​កម្ពុជា ធ្លាប់បានបញ្ជាក់យ៉ាងដូច្នេះថា៖ «ប្រវត្តិសាស្ត្រវា​មាន​តម្លៃ​ធំធេង​ណាស់ហើយ​ការអភិរក្ស​ប្រវត្តិសាស្ត្រ​នេះ​វា​ជា​រឿង​សំខាន់​ដែល​ «​សម្តេចម៉ែ​ផ្ទាល់​តែងតែ​យកចិត្ត​ទុកដាក់​លើ​បញ្ហា​នេះអ៊ីចឹង​ហើយ​យើង​ក៏​សម្រេច​ថា យកតាម​ព្រះនាម​របស់​សម្តេចម៉ែដើម្បី​បង្ហាញ​អំពី​ទឹកចិត្ត​របស់​សម្តេចម៉ែ​ក្នុង​ការអភិរក្ស​ប្រវត្តិសាស្ត្រ​»​។

គួរបញ្ជាក់ថា ព្រះរាជបណ្ណាល័យហ្លួងម៉ែមានទីតាំង​ស្ថិត​នៅផ្ទះ​លេខ​ ៦៦ មហាវិថី​ព្រះសីហនុ​ ត្រូវបាន បង្កើតឡើងដោយមជ្ឈមណ្ឌលឯកសារកម្ពុជា។ មជ្ឈមណ្ឌលឯកសារកម្ពុជាត្រូវបានបង្កើតឡើងនៅ ឆ្នាំ១៩៩៥ ហើយបានក្លាយជាស្ថាប័នស្រាវជា្រវឯករាជ្យនៅឆ្នាំ១៩៩៧។មជ្ឈមណ្ឌលឯកសារកម្ពុជា គឺជាកន្លែងតម្កល់និងស្រាវជ្រាវនូវឯកសារនានាក្នុងរបបខ្មែរក្រហមសម្រាប់មនុស្សជំនាន់ក្រោយ៕

‍