សៀមរាប: Wake Park Cambodia គឺជាទីកម្សាន្តថ្មីប្លែកមួយដែលមានកីឡាលើទឹកដ៏ទាក់ទាញ គឺការជិះក្តារបន្ទះ ឬក្តារស្គីលើទឹកអូសដោយខ្សែរ៉កដែលធ្វើឱ្យភ្ញៀវទេសចរសប្បាយរីករាយ និងភ័យបុកពោះ បន្ថែមពីនោះក៏មានពោងខ្យល់បណ្ដែតទឹកនិងឆេ្នរខ្សាច់សក្បុសដ៏ស្អាតផងដែរ។
ឧទ្យានកម្សាន្ត Wake Park Cambodia បង្កើតឡើងនៅក្នុងឆ្នាំ២០២១ លើផ្ទៃដីប្រហែល ៦ហិកតា និងមានចម្ងាយប្រមាណ៦គីឡូម៉ែត្រពីក្រុងសៀមរាប។ កន្លែងកម្សាន្តនេះ ទទួលភ្ញៀវទេសចរមក កម្សាន្តចាប់ពីថ្ងៃអង្គារដល់ថ្ងៃអាទិត្យ ដោយថ្ងៃអង្គារ ដល់ថ្ងៃសុក្រ បើកដំណើរការពីម៉ោង១២ថ្ងៃត្រង់ដល់ម៉ោង៨យប់ ចំណែកថ្ងៃសៅរ៍ដល់ថ្ងៃអាទិត្យ បើកដំណើរការពី ៩ព្រឹក ដល់ម៉ោង៩យប់។
អ្នកទេសចរអាចទិញសំបុត្រដើម្បីចូលកម្សាន្តបានដោយសំបុត្រចូលលេងធម្មតាសម្រាប់ភ្ញៀវជាតិ និងអន្តជាតិមានតម្លៃ៥ដុល្លារ(កុមារមិនគិតលុយ) ហើយសំបុត្រអាចប្តូរជាភេសជ្ជៈ និងម្ហូបអាហារបាននៅទីនេះ។សំបុត្រសម្រាប់ជិះក្តារបន្ទះ ឬស្គីលើទឹក តម្លៃ ២៤ដុល្លារ សម្រាប់រយៈពេល២ម៉ោង។សំបុត្រសម្រាប់ជិះក្តារបន្ទះ ឬស្គីលើទឹក តម្លៃ ៣២ ដុល្លារ សម្រាប់មួយថ្ងៃពេញ។បន្ថែមពីនេះ សម្រាប់ការជិះពោងបណ្តែតលើទឹក មានតម្លៃ ៨ ដុល្លារ សម្រាប់មនុស្សគ្រប់វ័យ។
បុគ្គលិកឧទ្យាន Wake Park Cambodia បានប្រាប់ SR News ថា កីឡាជិះស្គីលើទឹក ឬជិះក្តារបន្ទះនេះមានតែនៅបរទេសប៉ុណ្ណោះប៉ុន្តែពេលនេះបានមកដល់ទឹកដីសៀមរាបដំបូងគេ ដោយកីឡាមួយនេះមានបែងចែកទៅតាមកម្រិតរបស់អ្នកលេងជាពិសេសត្រូវជិះឆ្លងកាត់ពីមួយវគ្គទៅមួយវគ្គ កាន់ តែរំភើបសប្បាយរីករាយ។
មុនចូលទៅជិះស្គីកម្សាន្តលេងអ្នកទេសចរត្រូវពាក់អាវពោងសុវត្ថិភាព និងមួកសុវត្ថិភាពជាមុនសិន ដោយបុគ្គលិកទីនេះជាអ្នករៀបចំជូនបន្ទាប់មកគ្រូបង្ហាត់នឹងមកបង្រៀន ឬពន្យល់ណែនាំពីរបៀបលេង និងបច្ចេកទេសផ្សេងៗផងដែរសម្រាប់អ្នកពុំធ្លាប់មានបទពិសោធន៍ប៉ុន្តែចំពោះអ្នកធ្លាប់បានជិះកីឡាលើទឹកនេះហើយ អាចចូលលេងបានតែម្ដង។
ការជិះក្តារបន្ទះឬក្តារស្គីនៅលើទឹកនេះ មាន៤ វគ្គសម្រាប់ភ្ញៀវទេសចរដូចជា វគ្គទី១ ភ្ញៀវត្រូវលុតជង្គង់លើក្ដារបន្ទះហើយនេះគឺជាវគ្គដែលស្រួលជាងគេចំពោះអ្នកមិនចេះលេងសោះ ក្នុងករណីភ្ញៀវមិនអាចធ្វើបានភ្ញៀវត្រូវធ្វើការជិះបែបនេះម្តងហើយម្តងទៀតទាល់តែជាប់ ប្រសិនបើភ្ញៀវអាចធ្វើបានមានន័យថាភ្ញៀវបានជាប់ អាចឆ្លងទៅកាន់វគ្គទី២។
វគ្គទី២ភ្ញៀវត្រូវឈរដាក់ជើងទាំងពីរឱ្យនឹងលើក្ដារស្គីជើង២ ហើយការជិះបែបនេះ ពិបាកជាងវគ្គ១បន្តិច។ឆ្លងមកដល់ វគ្គ៣ ភ្ញៀវត្រូវយកជើងទាំងពីរឈរលើក្តារស្គីមួយវិញ ធ្វើយ៉ាងណាភ្ញៀវត្រូវទប់លំនឹងឱ្យបាន។ចូលមកដល់វគ្គទី៤ វគ្គនេះគឺសម្រាប់អ្នកជំនាញ ដែលជិះបង្ហោះស្គី ឬ Freestyle លើក្តារចំណោតដែលរៀបចំទុកសម្រាប់ភ្ញៀវទេសចរ បញ្ចេញក្បាច់តាមចំណូលចិត្តរបស់ខ្លួនដោយអាចជិះក្នុងល្បឿន ៣៨ ទៅ៤០ គីឡូម៉ែត្រក្នុង ១ម៉ោង ប៉ុន្តែភ្ញៀវទេសចរត្រូវបង់ថ្លៃបន្ថែមសម្រាប់ការលេងវគ្គចុងក្រោយនេះដោយរយៈពេល២ម៉ោងមានតម្លៃ ១៤ដុល្លារ ចំណែករយៈពេលពេញមួយថ្ងៃ តម្លៃ ១៩ដុល្លារ។
ដោយឡែកការកម្សាន្តលើពោងបណ្តែតលើទឹកវិញភ្ញៀវទេសចរអាចលោតលេង ជិះទម្លាក់ខ្លួន ឬស្លាយលេងលើទឹក ក៍ដូចជាការកម្សាន្តត្រូវឆ្លងឧបសគ្គដូចក្នុងកម្មវិធី Ninja Warrior ដូច្នោះដែរ។
បន្ថែមពីការកម្សាន្តលើទឹកទីនេះមានឆ្នេរសប្បនិម្មិតក្រាលដោយខ្សាច់ដ៏សស្រស់ស្អាត ដែលអ្នក អាចអង្គុយលេងមើលផ្ទៃទឹកខៀវស្រងាត់ដែលមានជម្រៅរាក់ ស័ក្កសមសម្រាប់កុមារតូចៗ អាចលេងទឹកបានយ៉ាងសុវត្ថិភាព។ ក្នុងទីកម្សាន្តនៃទឹកដីអង្គរនេះក៏មានភោជនីយដ្ឋាន និងបារ៍ ដែលបម្រើជូនអាហារក្នុងស្រុក បរទេស និងភេសជ្ជៈជាច្រើនតម្លៃចាប់ពី ២ដុល្លារ ដល់ ៧ដុល្លារ។
បន្ទាប់ពីលេងកីឡាលើទឹកនៅឧទ្យានហើយភ្ញៀវទេសចរ អាចចំណាយពេលវេលាដ៏រីករាយជាមួយមិត្តភក្តិ និងក្រុមគ្រួសារបាន នាវេលាកាលថ្ងៃរៀបអស្តង្គតនិងពេលរាត្រី ដោយស្រូបយកខ្យល់អាកាសដ៏ល្អបរិសុទ្ធ ក្រោមជំនោរខ្យល់ត្រជាក់នៃទីកន្លែងគួរជាទីមនោរម្យក្រៃលែង។
ទៅថ្ងៃអនាគតឧទ្យាន Wake Park Cambodia នឹងមានគម្រោងក្នុងការពង្រីក នឹងកែច្នៃបន្ថែមទៀត ដូចជាការសាងសង់ផ្ទះបឹងកាឡូនៅជាប់មាត់ទឹក សម្រាប់ភ្ញៀវស្នាក់នៅ ដែលផ្ទះស្នាក់នេះ នឹងបើកដំណើរការចុងឆ្នាំ។
ឧទ្យាន Wake Park Cambodia មានទីតាំងស្ថិតនៅភូមិភ្ញាជ័យ សង្កាត់ស្វាយដង្គំ ក្រុងសៀមរាបខេត្តសៀមរាប។ គេហទំព័រហ្វេសប៊ុក Wake Park Cambodia ឬទំនាក់ទំនងលេខទូរសព្ទ០៩៥ ៨៨២ ៤២១ ៕
ទីតាំង: Wake Park Cambodia
.jpg)
.jpg)
