.jpg)
អស់រយៈពេលជាង១ទសវត្សរ៍អតីតនិស្សិតស្ថាបត្យកម្មខ្មែរ និងបរទេស បានបង្កើត Khmer Architecture Tours (ឬ KA-Tours) នាំភ្ញៀវទេសចរជិះស៊ីក្លូទស្សនាសំណង់ប្រវត្តិសាស្ត្រអមដោយការបរិយាយរឿងរ៉ាវពីមគ្គុទ្ទេសក៍ដែលសុទ្ធសឹងតែស្ថិតក្នុងវិស័យស្ថាបត្យកម្ម។
KA-Tours ជាអង្គការមិនគិតពីប្រាក់ចំណេញ ដែលត្រូវបានបង្កើតនៅឆ្នាំ ២០០៣ដើម្បីលើកកម្ពស់ការយល់ដឹងពីសំណង់អគារក្រោយឆ្នាំ ១៩៥៣ជាឆ្នាំដែលកម្ពុជាទទួលបានឯករាជ្យភាពពីអាណានិគមនិយមបារាំង។
.jpeg)
ភ្ញៀវទេសចរ Owen Bentley បានបង្ហោះរូបភាពដំណើរទស្សនាសំណង់ស្ថាបត្យកម្មកាលពី ឆ្នាំ២០២៣ ជាមួយចំណាប់អារម្មណ៍រីករាយ។
រីឯអ្នកបញ្ចេញមតិម្នាក់ទៀតឈ្មោះ Felicity Flowerdew បានបង្ហាញចំណាប់អារម្មណ៍ស្រដៀងគ្នានេះដែរថាខ្លួនធ្លាប់បានទាក់ទង KA-Tours ដោយបញ្ចូលកម្មវិធីទស្សនាស្ថាបត្យកម្មនៅភ្នំពេញក្នុងដំណើរកម្សាន្តដែលរៀបចំឡើងដោយទីភ្នាក់ងារទេសចរណ៍ Dragonfly Tours Cambodia។
ភ្ញៀវឈ្មោះ Flowerdewបានកោតសរសើរថា៖ «KA-Tours ពិតជាល្អឥតខ្ចោះហើយដំណើរកម្សាន្តនេះបានផ្ដល់នូវចំណេះដឹងស៊ីជម្រៅពីប្រវត្តិសាស្ត្រនៅរាជធានីភ្នំពេញ»។
.jpeg)
ភ្ញៀវឈ្មោះ Bentley ដែលបានជួយណែនាំ KA-Tours លើបណ្ដាញសង្គមបានលើកឡើងថា៖ «វាជាដំណើរកម្សាន្តដ៏អស្ចារ្យលើស៊ីក្លូជាមួយក្រុមទេសចរណ៍ស្ថាបត្យកម្មខ្មែរ ខ្ញុំត្រូវបានណែនាំបន្តពីមិត្តភក្ដិដែរ។ កញ្ញា ជាមគ្គុទេសក៍ពោរពេញដោយចំណេះដឹង និងរួសរាយណាស់។ តៃកុងស៊ីក្លូរបស់យើងពិតជាអស្ចារ្យ នេះពិតជាសកម្មភាពដ៏គួរឱ្យចាប់អារម្មណ៍មួយ ប្រសិនបើអ្នកមកលេងភ្នំពេញ»។
អ្នកស្រី សុកញ្ញាជាស្ថាបត្យករបញ្ចប់ការសិក្សាពីមហាវិទ្យាល័យស្ថាបត្យកម្មនិងនគរូបនីយវិទ្យានៃសាកលវិទ្យាល័យភូមិន្ទវិចិត្រសិល្បៈបានចាប់ផ្ដើមបម្រើការនៅ KA-Tours តាំងពីឆ្នាំ ២០១៦។
មគ្គុទេសក៍មានជំនាញស្ថាបត្យកម្មរូបនេះបានបន្តថា៖«ខ្ញុំចូលចិត្តនាំ Tour ហ្នឹងដោយសារយើងអាចបង្ហាញពីអ្វីដែលយើងបានដឹងពីសំណង់ស្ថាបត្យកម្មជាសម្បត្តិបេតិកភណ្ឌដូចជាអគារសម័យបារាំង ឬក៏អគាររបស់លោកតា វណ្ណ មូលីវណ្ណហើយខ្ញុំចូលចិត្តជួបមនុស្សថ្មីៗប្លែកៗ និងបានចែករំលែកប្រាប់គាត់ពីអ្វីដែលយើងដឹងពីអគារទាំងអស់ហ្នឹង»។
.jpeg)
ក្នុងចំណោមអគារស្ថាបត្យកម្មដ៏ចំណាស់នៅរាជធានីភ្នំពេញ អ្នកស្រីពេញចិត្តស្នាដៃស្ថាបត្យករល្បីលោក វណ្ណ មូលីវណ្ណ ដោយសារអគាររបស់លោកជាក់ស្ដែងធ្វើឱ្យអ្នកប្រើប្រាស់មានអារម្មណ៍ផាសុកភាព។
អ្នកស្រីបានលើកឡើងថា៖ «ខ្ញុំចូលចិត្តអគារនៅសាលាវិទ្យាស្ថានភាសាបរទេសជាងគេ ព្រោះវានៅសល់គូទឹក នៅសល់សួនច្បារ ហើយនៅពេលយើងនៅក្នុងអគារហ្នឹងមានអារម្មណ៍ថាវាត្រជាក់ស្រួលខ្លួន។ ទាំងប្រព័ន្ធទឹកប្រព័ន្ធខ្យល់អីគឺល្អនៅក្នុងហ្នឹង ព្រោះគាត់បានគិតគូររួចហើយមុនពេលសង់»។
.jpeg)
អគារប្រមាណជាង ១០កន្លែង ត្រូវបានរៀបចំជាគោលដៅនាំភ្ញៀវទៅទស្សនាក្នុងនោះតំបន់អគារប្រៃសណីយ៍កម្ពុជាទទួលបានការចាប់អារម្មណ៍ជាងគេ។
កញ្ចប់ដំណើរទស្សនាស្ថាបត្យកម្មចែកចេញជា៣ គឺការជិះស៊ីក្លូនៅកណ្ដាលទីក្រុង, ការទស្សនាស្ថាបត្យកម្មខ្មែរទសវត្សរ៍ឆ្នាំ ១៩៦០ និងស្ថាបត្យកម្មសាសនាទាំង ៤ នៅភ្នំពេញ។
ស្ថាបត្យករនិងមគ្គុទ្ទេសក៍ ហ៊ុន សុកញ្ញា បានលើកឡើងថាភ្ញៀវទេសចរអាចទស្សនាស្វែងយល់ពីអគារចាស់ៗនៅសេសសល់ថ្ងៃនេះ ដោយពុំដឹងថាវាអាចស្ថិតស្ថេរបានដល់ពេលណាឡើយ។
អ្នកស្រីបាននិយាយថា៖ «ប្រសិនបើអគារចាស់ៗទាំងអស់ហ្នឹងត្រូវបានប្ដូរជាសំណង់ខ្ពស់ៗវិញ ខ្ញុំអត់មានអ្វីនិយាយច្រើនក្រៅតែអំពីពាក្យថា សោកស្ដាយ ហើយរាល់ថ្ងៃខ្ញុំក៏ព្យាយាមចងក្រងឯកសារខ្លះៗ ហើយខ្ញុំធ្វើការនៅសាលារាជធានីភ្នំពេញដែរ ទាក់ទងជាមួយគម្រោងឆ្នាំ ២០១៩ លើអគារបេតិកភណ្ឌហ្នឹង»។
តម្លៃសម្រាប់ភ្ញៀវម្នាក់២០ដុល្លារ ហើយប្រាក់ចំណូលទាំងអស់នៅ KA-Tours ត្រូវបានផ្ដល់ទៅខាងដឹកជញ្ជូន និងមគ្គុទ្ទេសក៍។ ដំណើរទស្សនាអគារស្ថាបត្យកម្មធ្វើឡើងរៀងរាល់ថ្ងៃអាទិត្យដោយការជួបជុំគ្នានៅទីតាំងប៉ុស្ដិ៍ប្រៃសណីយ៍។ ដើម្បីចុះឈ្មោះ សូមទំនាក់ទំនងអ៊ីម៉ែល contact@ka-tours.org/ ឬ WhatsApp និង Telegram ០៨៩៨២១៧១២៕
.jpg)