កំពង់ស្ពឺ៖ផុសឡើងនៅកណ្តាលធម្មជាតិព្រៃស្រល់រាប់លានដើមលើភ្នំគិរីរម្យហាងកាហ្វេសំរាម បានក្លាយជាទីចាប់អារម្មណ៍របស់ភ្ញៀវទេសចរជាតិ និងអន្តរជាតិទៅភ្លក្សរសជាតិកាហ្វេ និងភេសជ្ជៈ ថតរូបលេងកម្សាន្តក៏ដូចជាបានសិក្សាឈ្វែងយល់ពីដំណើរការនៃហាងកាហ្វេដែលផ្តុំទៅដោយគំនិតច្នៃប្រឌិតមួយនេះផងដែរ។
យុវតី ហុង ស្រីនិច្ច អ្នកទេសចរទៅកម្សាន្តនៅកាហ្វេសំរាមបានឱ្យដឹងថាជារៀងរាល់ឆ្នាំ កញ្ញា តែងតែមកកម្សាន្តនៅឧទ្យានជាតិគិរីរម្យប្រមាណ២ទៅ៣ដង ហើយកញ្ញា ក៏តែងតែចូលមកលេងនៅកាហ្វេសំរាម និងសាលាដូងជានិច្ច ដោយសារតែកាហ្វេមានរសជាតិឆ្ងាញ់ហើយទីតាំងមានបរិយាកាសល្អ និងការរចនាលម្អ មានភាពទាក់ទាញ។
កញ្ញា ស្រីនិច្ច បញ្ជាក់ដូច្នេះថា៖ «ខ្ញុំជាប់ចិត្តនឹងរសជាតិកាហ្វេនៅទីនេះ វាឆ្ញាញ់ ហើយបើឈ្មោះវិញគឺគួរឱ្យអស់សំណើច ដូចអាយអាពេឡេហេ តែវាជាអាយឡាតេហើយតណ្ហាស្រៀវអញ្ចាញ តាមពិតផាសិនសោះ បើការដេគ័រឡូយណាស់នៅទីនេះមានវត្ថុចាស់ដែលខ្ញុំអត់ធ្លាប់ឃើញជាច្រើនដូចជាទូរទស្សន៍ជំនាន់មុន រូបគំនូរប្លែកៗ ម៉ូតូសេរីចាស់ហើយអីដែលមិនសរសើរមិនបាន គឺសំរាមទុយោ គម្របដប ដប ស្លាកលេខ គេច្នៃយកទៅតុបតែងសឹងគ្រប់កន្លែងតាំងពីផ្លូវចូលមក»។
យុវតីវ័យ២៣ ឆ្នាំរូបនេះបន្តថាមិនត្រឹមតែជាហាងហ្វេប៉ុណ្ណោះទេ ទីតាំងមួយនេះ ក៏ជាកន្លែងផ្សព្វផ្សាយចំណេះដឹងមួយ ឱ្យអ្នកមកលេងនៅទីនេះបានដឹងថាវត្ថុនៅជុំវិញខ្លួនយើង គឺសុទ្ធតែមានតម្លៃ បើយើងចេះយកទៅកែច្នៃនិងយល់ពីតម្លៃនៃវត្ថុទាំងនោះ ហើយក៏ជាសារដាស់តឿនឱ្យមនុស្សគ្រប់គ្នាចេះទុកដាក់សំរាមឱ្យបានត្រឹមត្រូវ និងចូលរួមស្រឡាញ់បរិស្ថានផងដែរ។
ចំណែកយុវជន លី សុខាអ្នកទេសចរម្នាក់ទៀតបានរៀបរាប់ថា៖ «នេះជាលើកទី១ហើយ ដែលខ្ញុំបាន មកកាហ្វេសំរាមនេះពេលឃើញសំរាមដែលគេធ្លាប់តែបោះចោល ប៉ុន្តែគេអាចយកមកកែច្នៃចេញកន្លែងដែលស្អាតអ៊ីចឹង វាប្លែកភ្នែក ប្លែកអារម្មណ៍វាប្រៀបដូចកន្លែងដ៏អស្ចារ្យ ដែលមិនធ្លាប់ឃើញ ពីមុនមក ហើយនៅពេលដែលដឹងថាទីតាំងនេះ ជាកន្លែងជួយឱ្យក្មេងៗនៅលើភ្នំគិរីរម្យ បានរៀនសូត្រទៀតវាកាន់តែអស្ចារ្យខ្លាំងណាស់»។
ជាផ្នែកមួយរបស់សាលាដូង ហាងកាហ្វេសំរាមបង្កើតឡើងនៅពាក់កណ្តាលឆ្នាំ២០១៩ ដោយបើកដំណើរការរៀងរាល់ចុងសប្តាហ៍ចាប់ពីថ្ងៃសុក្រ ដល់ថ្ងៃអាទិត្យ និងចាប់ពីម៉ោង៦ព្រឹក ឬ៧ព្រឹកដល់ម៉ោង៥ល្ងាច ចំណែកថ្ងៃចន្ទ ដល់ថ្ងៃព្រហស្បត្តិ៍ហាងកាហ្វេពុំដំណើរការឡើយ ត្បិតសាលាដូង ត្រូវការបង្រៀនសិស្សានុសិស្ស។
នៅកាហ្វេសំរាមមានបម្រើជូននូវកាហ្វេនិងភេសជ្ជៈជាច្រើនដូចជា កាហ្វេក្តៅ (Hot Coffee),កាហ្វេទឹកកក (Ice Coffee)និងភេសជ្ជៈក្រឡុក (Frappe) តែ (Tea) រួមជាមួយភេសជ្ជៈផ្សេងៗទៀត។
លោក អ៊ុក ឧត្តមគ្រូស្ម័គ្រចិត្តនៅសាលាដូងបានប្រាប់សារព័ត៌មានឌីជីថល SR ឱ្យដឹងថា ភ្ញៀវទេសចរដែលនិយមចូលមកលេងនិងទទួលទានភេសជ្ជៈនៅហាងកាហ្វេសំរាមនេះ មានចំនួនច្រើនក្នុងឆ្នាំ២០២៤នេះដោយសារភ្ញៀវទេសចរ ហាក់ចាប់អារម្មណ៍លើការយកសំរាមមកដេគ័រលើទីតាំងហាងកាហ្វេសំរាមក៏ដូចជាក្នុងគោលបំណងជួយដល់ដំណើរការរបស់សាលាដូងផងដែរ។
«អ្វីដែលពួកយើងធ្វើគឺសុទ្ធតែជារបស់របរដែលយើងបានឃើញនៅតាមដងផ្លូវ នៅតាមកន្លែងគេចោល សំរាមអ៊ីចឹងមហាជនគាត់មានការស្ងើចសរសើរ ពួកគាត់ប្លែកក្នុងចិត្ត នឹកស្មានអត់ដល់ហើយមែនទែន ចំនួនអ្នកថតរូបទៅលើរបស់ទាំងអស់ហ្នឹង គឺច្រើនមែនទែន។ម្យ៉ាងទៀត ភ្ញៀវមកទិញកាហ្វេនៅហាង យើងនេះពួកគាត់មានគោលបំណងចង់ជួយសាលាដូងដែរ ដោយសារតែយើងប្រាប់ព័ត៌មានដល់ពួកគាត់ថា នៅពេលដែលអ្នកទាំងអស់ជួយទិញកាហ្វេ ដូចជួយពួកខ្ញុំឱ្យមានថវិកាដើម្បីឧបត្ថម្ភដល់គ្រូៗនិងចំណាយទូទៅក្នុងសាលាដូងមួយចំណែកអ៊ីចឹង»។ នេះបើតាមការបញ្ជាក់របស់លោក អ៊ុក ឧត្តម។គ្រូស្ម័គ្រចិត្តរូបនេះបន្តថាគំនិតច្នៃប្រឌិត និងការដេគ័រនៅហាងកាហ្វេសំរាមទាំងមូលនេះ គឺជាកើតចេញពីគំនិត និងស្នាដៃរបស់លោកលោក អ៊ុក វណ្ណដេ ដែលជាស្ថាបនិកសាលាដូង ដោយលោកវណ្ណដេ បានប្រើពេលប្រមាណជាង៣ខែ ទាំងថ្ងៃ ទាំងយប់ ក្នុងការកែច្នៃសំរាមទាំងនេះ។
សម្រាប់ការដេគ័រនៅហាងកាហ្វេមួយនេះ ស្ថាបនិកសាលាដូងបានប្រើនូវដបស្រាបៀរជិត ២ លានដបមករៀបធ្វើជាជញ្ជាំងនៅជុំវិញរានលក់កាហ្វេ យកសំបកដបធ្វើជាការ៉ូយកដបប្លាស្ទិកទឹកសុទ្ធចំនួន ៤ ពាន់ដបមកកែច្នៃជាទង់ជាតិនិងយកបំពង់បឺត និងផ្នែកគម្របដបធ្វើជារីដូ យកសម្បកកង់ និងធុងដែកច្នៃជាគ្រឿងសង្ហារឹមជាដើម។
គួរគូសបញ្ជាក់ថា ហាងកាហ្វេសំរាមគឺជាផ្នែករបស់សាលាដូង ដែលបង្កើតឡើងក្នុងគោលបំណងស្វែងរកចំណូលដើម្បីទ្រទ្រង់សាលាដូង ដែលមានលោកអ៊ុក វណ្ណដេ ជាស្ថាបនិក។ លោកវណ្ណដេ បានបង្កើតសាលាដូងនៅអំឡុងឆ្នាំ២០១៧ដើម្បីបង្រៀនកូនអ្នកស្រុករស់នៅក្នុងសហគមន៍ក្នុងតំបន់នេះហើយនៅឆ្នាំ២០២៤នេះ សាលាដូងមានសិស្សប្រុសស្រីចំនួនជាង ១៧០ នាក់ ដែលរៀនពីថ្នាក់ទី១ដល់ថ្នាក់ទី៦។ សាលាដូង និងកាហ្វេសំរាម មានទីតាំងស្ថិតនៅលើភ្នំគិរីរម្យនៃស្រុកភ្នំស្រួច ខេត្ដកំពង់ស្ពឺ។ ទំនាក់ទំនងគេហទំព័រហ្វេសប៊ុកៈ កាហ្វេសំរាមឬលេខទូរស័ព្ទ 069 647 302៕
.jpg)
