សៀមរាប៖ ចាប់តាំងពីឆ្នាំ ២០០៧ មក អង្គការទន្លេគ្លីនិក-កម្ពុជា (TLC) បានផ្តល់សេវាសុខភាពទូទៅដោយឥតគិតថ្លៃជាង ៣៦០០០០ ករណី ដោយផ្ទាល់ដល់កុមារនិងមនុស្សពេញវ័យ នៅតាមសហគមន៍ក្រីក្រដាច់ស្រយាលក្នុងភូមិសាស្ត្របឹងទន្លេសាប។
លោកស្រី ឃឹម ចាន់ថា ប្រធានការិយាល័យអង្គការទន្លេគ្លីនិក-កម្ពុជាបានឱ្យដឹងថា អង្គការប្រតិបត្តិការដោយមិនគិតកម្រៃអ្វីទាំងអស់នៅខេត្តសៀមរាបនិងខេត្តកំពង់ធំ ក្នុងបរិវេណភូមិបណ្ដែតទឹក។
លោកស្រីបានប្រាប់សារព័ត៌មាន SR ឱ្យដឹងថា៖ «និយាយទៅយើងជួយដោយសប្បុរសធម៌តែម្ដងមិនថាការពន្យារកំណើត មិនថាថ្នាំលេប ឬពិនិត្យសុខភាពពិនិត្យផ្ទៃពោះអ្វីទេ»។
អង្គការទន្លេគ្លីនិក-កម្ពុជាទទួលព្យាបាលជំងឺទូទៅនិងទៅតាមកម្រិតជំងឺ។ ក្នុងករណីធ្ងន់ធ្ងរ អង្គការនឹងបញ្ជូនអ្នកជំងឺទៅពេទ្យដែលនៅជិតតាមរយៈការសហការជាមួយមណ្ឌលសុខភាព ឬមន្ទីរពេទ្យខេត្ត។
លោកស្រីប្រធានការិយាល័យអង្គការទន្លេគ្លីនិក-កម្ពុជាបានបញ្ចាក់បន្ថែមថា៖ «បើករណីទាក់ទងនឹងអ្នកជំងឺកុមារនិងបញ្ចូលទៅមន្ទីរពេទ្យខេត្ត ឬមន្ទីរពេទ្យគន្ធបុប្ផា ដោយមានលិខិតបញ្ជូនអ្នកជំងឺត្រឹមត្រូវនិងដឹងជញ្ជូនគាត់តាមរយៈទូក និងឡានរបស់អង្គការ»។
សព្វថ្ងៃ អង្គការមានគ្រូពេទ្យប្រចាំការចំនួន៩នាក់ ដែលនៅចាំផ្ដល់សេវាព្យបាលតាមគោលដៅ ព្រមទាំងពេទ្យចុះកម្មសិក្សានិងពេទ្យស្ម័គ្រចិត្តផងដែរ។
ស្ទើរតែគ្រប់គ្រួសារនៅក្នុងតំបន់ដែលអង្គការចុះទៅព្យាបាលពួកគាត់បានរក្សាទុកលេខទូរសព្ទទំនាក់ទំនងជាមួយក្រុមគ្រូពេទ្យប្រចាំការ ដើម្បីងាយស្រួលក្នុងករណីមានបញ្ហាសុខភាពណាមួយ។
លោកស្រី ចាន់ថា បានឱ្យដឹងថា៖ «អ្នកដែលរស់តាមតំបន់នោះគាត់មានលេខទូរសព្ទអង្គការ ឬវេជ្ជបណ្ឌិតរបស់យើងនៅក្នុងភូមិគាត់ហើយហើយយើងមានក្រុមមួយទៀត គឺក្រុមសហគមន៍គាត់តែងតែដើរតាមផ្ទះមើលអ្នកជំងឺមួយចំនួន ដែលដេកឈឺនៅលើផ្ទះនិងមានការរាយការណ៍មកកាន់អង្គការ ឬទៅកាន់វេជ្ជបណ្ឌិតផ្ទាល់ឱ្យចុះទៅពិនិត្យព្យាលបាលនៅនឹងកន្លែងតែម្ដង»។
អង្គការទន្លេគ្លីនិកកម្ពុជាធ្វើការព្យាបាលនៅលើផែបណ្តែតទឹកនៅតាមគោលដៅនៃខេត្តសៀមរាបចំនួន ២ ទីតាំង និងខេត្តកំពង់ធំចំនួន៣ ទីតាំង ។
លោកស្រី ចាន់ថា បានបន្តថា៖ «អង្គការទន្លេគ្លីនិកកម្ពុជាមានចំណតផែបណ្តែតទឹកតូចៗសម្រាប់ទទួលព្យាបាលអ្នកជំងឺនៅខេត្តសៀមរាបចំនួន ២ចំណតផែ នៅក្នុងភូមិមាត់ខ្លា និងភូមិស្ទឹងជ្រៅ ចំណែកខេត្តកំពង់ធំមានចំណតផែ ចំនួន៣ គឺភូមិពេជ្រចក្រី ភូមិពាមបាង និងភូមិខ្សាច់ជីរស់»។
នៅខេត្តកំពង់ធំ អង្គការប្រតិបត្តិការចុះពិនិត្យព្យាបាលជំងឺចំនួន៦ ភូមិ គឺភូមិពៅវើយ ភូមិពេជ្រចក្រី ភូមិពាមបាង ភូមិបាឡតនិងភូមិដូនស្តើង ឃុំពាមបាង ស្រុងស្ទោង (ការិយាល័យស្រុកប្រតិបត្តិស្ទោងមណ្ឌលសុខភាពម្សាក្រង) ព្រមទាំង ភូមិខ្សាច់ជីរស់ ឃុំកំពង់គោស្រុកកំពង់ស្វាយ (ការិយាល័យសុខាភិបាលស្រុកប្រតិបត្តិ កំពង់ធំមណ្ឌលសុខភាពកំពង់គោ)។
ដោយអង្គការទន្លេគ្លីនិកកម្ពុជាមើលឃើញថា នៅតំបន់ស្ទឹងសែន ខេត្តកំពង់ធំ មានអ្នកជំងឺច្រើន និងមិនមានការផ្លាស់ប្ដូរទីតាំងរស់នៅខុសពីអ្នកភូមិបណ្ដែតទឹកមួយចំនួនដែលរស់នៅក្នុងខេត្តសៀមរាបនោះទើបអង្គការសម្រេចដាក់ទីតាំងគ្លីនិកប្រចាំការ ដើម្បីចុះធ្វើសកម្មភាពជួយសង្គ្រោះនិងព្យាបាលជំងឺ។
ចំណែកគ្លីនិកដែលស្ថិតនៅចំណតផែផ្សេងៗទៀតជារៀងរាល់សប្ដាហ៍ ក្រុមគ្រូពេទ្យបានចុះចល័តទៅតាមភូមិគោលដៅ ដោយមិនមានការប្រចាំការនៅទីតាំងផ្ទាល់ដូចទៅនៅភូមិខ្សាច់ជីរស់ តាមដងស្ទឹងសែន ខេត្តកំពង់ធំនោះទេ។
លោកស្រី ចាន់ថា បានបញ្ជាក់ថា៖ «យើងដាក់គ្លីនិកប្រចាំមួយកន្លែងនៅភូមិខ្សាច់ជីរស់ ខេត្តកំពង់ធំដោយសារខាងហ្នឹងសម្បូរអ្នកជំងឺ ហើយនៅរៀងរាល់ថ្ងៃ ច័ន្ទដល់ថ្ងៃពុធយើងមានពេទ្យយើងមួយក្រុម មានឈ្មោះថាក្រុមទន្លេ ចុះទៅទាំង ២ខេត្ត។ នៅខេត្តសៀមរាបយើងចុះទៅភូមិមាត់ខ្លាភូមិស្ទឹងជ្រៅ ឯនៅកំពង់ធំ ភូមិពៅវើយ ភូមិពេជ្រចក្រី ភូមិពាមបាងភូមិបាឡត ភូមិដូនស្ដើង ចំណែកមួយក្រុមទៀតដែលមានឈ្មោះថា ក្រុមស្ទឹងសែនចុះនៅភូមិខ្សាច់ពីរស់ នៅរៀងរាល់ថ្ងៃអង្ការ ដល់ថ្ងៃព្រហស្បតិ៍»។
រៀងរាល់ពេលចុះទៅតាមភូមិនីមួយៗអង្គការទន្លេគ្លីនិកតែងតែផ្ដល់ដំណឹងទៅឱ្យមេភូមិមេឃុំនៅទីនោះដឹងមុនមួយសប្តាហ៍ដើម្បីឱ្យមេភូមិប្រកាសដំណឹងនេះទៅកាន់ដែលមានជំងឺនៅក្នុងភូមិមកទទួលសេវាពិនិត្យសុខភាពដោយពុំបង់ប្រាក់។
លោកស្រី ឃឹម ចាន់ថា បានប្រាប់បន្តថា៖«នៅក្រៅពីការពិនិត្យនិងព្យាបាលអ្នកជំងឺនៅក្នុងតំបន់មួយចំនួននៃបឹងទន្លេសាបហើយអង្គការទន្លេគ្លីនិកក៏មានសកម្មភាពជាច្រើនដូចជាចុះអប់រំអ្នករស់នៅតំបន់ភូមិបណ្ដែតទឹក ការថែទាំសុខភាពតាមផ្ទះមានការចែកជូនធុងចម្រុះទឹកស្អាត ផ្ដល់គ្រាប់ពូជ និងបច្ចេកទេសដាំដំណាំលើសួនបណ្ដែតទឹកផងដែរ»។
នាពេលអនាគត អង្គការមានគម្រោងទៅកាន់ភូមិដទៃទៀត ដែលនៅខ្វះខាតសេវាថែទាំទាំងនេះដើម្បីពង្រីកសេវាកម្មថែទាំសុខភាពឱ្យបានកាន់តែធំទូលាយជាងមុន។
បច្ចុប្បន្នអង្គការទន្លេគ្លីនិក-កម្ពុជាមានផលលំបាកទៅលើថវិការទ្រទ្រង់អង្គការដោយមានការចំណាយច្រើនទៅលើថ្នាំសង្កូវ សម្ភារៈ និងការធ្វើដំណើរជាដើម។ ការរ៉ាប់រងការចំណាយនាពេលនេះគឺបានមកពីថវិកាសប្បុរសធម៌ ដែលត្រូវបានបរិច្ចាគទៅកាន់មូលនិធិរបស់អង្គការប៉ុណ្ណោះ។នេះបើតាមការបញ្ជាក់ពីលោកស្រី ឃឹម ចាន់ថានៃអង្គការទន្លេគ្លីនិក-កម្ពុជា។
ព័ត៌មានបន្ថែម ឬសម្រាប់ការបរិច្ចាគទ្រទ្រង់អង្គការទន្លេគ្លីនិក-កម្ពុជាសូមទាក់ទងទៅកាន់លេខទូរសព្ទ ០១២៣៩០១១៨ ទំព័រហ្វេសប៊ុក The Lake Clinic Cambodia ឬវិបសាយ www.lakeclinic.org៕
