.jpg)
អស់រយៈពេលប្រមាណជិត ៤ខែ លោក អ៊ុំ ប៊ុនរ៉េត ដែលបានធ្វើដំណើរដោយជិះម៉ូតូពីអឺរ៉ុបមកកម្ពុជាតែម្នាក់ឯង បានបញ្ចប់បេសកកម្មដោយឆ្លងកាត់២២ប្រទេស លើចម្ងាយ ២៩០០០គីឡូម៉ែត្រ។
លោកបានមកដល់រាជធានីភ្នំពេញ នៅថ្ងៃទី ១០ ខែវិច្ឆិកា ឆ្នាំ ២០២៤ ជាមួយការស្វាគមន៍ពីក្រុមម៉ូតូ BMW កម្ពុជា និងការថតរូបអនុស្សាវរីយ៍នៅមុខវត្តភ្នំ។
ក្នុងដំណើរជិះម៉ូតូចម្ងាយជិត ៣ពាន់គីឡូម៉ែត្រមកដល់រាជធានីភ្នំពេញ ដោយសុវត្ថិភាពនោះលោក ប៊ុនរ៉េត បានសម្ដែងចំណាប់អារម្មណ៍ថា៖ «សូមអរគុណ លោកនាយក និងសហការីដែលនៅចាំបដិសណ្ឋារកិច្ចការមកដល់របស់ខ្ញុំ។ ជាពិសេសអរគុណដល់បងៗក្រុមគ្រូពេទ្យដែលខិតខំជួយសង្គ្រោះជីវិតកុមាររាល់ថ្ងៃដោយមិនខ្លាចនឿយហត់»។
លោក ប៊ុនរ៉េតដែលជាប្រធាន BMW Club កម្ពុជា បានចាប់ផ្ដើមចេញដំណើរពីទីក្រុងមូនិកប្រទេសអាល្លឺម៉ង់នៅព្រឹកព្រលឹមថ្ងៃទី ៥ ខែកក្កដា ឆ្នាំ២០២៤។
លោកបានរៀបរាប់ពីដំណើររយៈពេលជិត ៤ ខែនេះថា៖ «ប្រទេសទាំង ២២ ដែលខ្ញុំបានឆ្លងកាត់មាន អាល្លឺម៉ង់ អូទ្រីស អ៊ីតាលី ស្វីស បារាំង អង់ដូរ៉ាអេស្ប៉ាញ ស្លូវ៉ានី ក្រូអាត បូស្នី-អ៊ែរហ្សេហ្គោវីន ម៉ុងតេណេហ្គ្រោ កូសូវ៉ូ ម៉ាសេដូនីខាងជើងអាល់បានី ក្រិក ប៊ុលហ្គារី តួកគី អ៊ីរ៉ង់ បាគីស្ថាន ចិន ឡាវ ថៃ និងកម្ពុជា»។
បុរសវ័យ៤៤ឆ្ន ាំដែលចូលចិត្តជិះម៉ូតូធំផ្សងព្រេងនិងបំពេញបេសកកម្មសប្បុរសធម៌បានគំនិតធ្វើយុទ្ធនាការជិះម៉ូតូឆ្លងទ្វីបម្នាក់ឯងដើម្បីរៃអង្គាសថវិកាសប្បុរសធម៌ ដើម្បីកុមារជាមួយនឹងមូលនិធិគន្ធបុប្ផាក្រោយពីលោកបានស្ដាប់បទបង្ហាញរបស់លោកគ្រូ ឃុន លាងឈុន ដែលជាអនុប្រធានមន្ទីរពេទ្យ។
មុនពេលចេញដំណើរលោក ប៊ុនរ៉េត បានលើកឡើងថា៖ «កុមារគឺជាធនធានដ៏មានតម្លៃហើយក៏ជាក្តីសង្ឃឹមនៃអនាគតរបស់ពិភពលោកផងដែរ។ កុមារកម្ពុជាសរុបជិត ១លាននាក់ បានមកសម្រាក និងព្យាបាលនៅមន្ទីរពេទ្យគន្ធបុប្ផានាឆ្នាំ២០២៣ និងប្រមាណ ២៨លាននាក់ចាប់តាំងពីពេលមន្ទីពេទ្យចាប់បើកមក»។
ក្រៅពីបំណងចម្បងជួយដល់មូលនិធិគន្ធបុប្ផា ដែលផ្តល់ការព្យាបាលដោយឥតគិតថ្លៃដល់កុមាររាប់លាននាក់ក្នុងប្រទេសកម្ពុជាប្រធាន BMW Club រូបនេះ បន្ថែមថាបេសកកម្មជិះម៉ូតូធំតែម្នាក់ឯងនេះលោកមានបំណងបង្ហាញពីទំនាក់ទំនងប្រវត្តិសាស្ត្រ និងវប្បធម៌ដ៏រឹងមាំរវាងប្រទេសអាឡឺម៉ង់ និងកម្ពុជា។
លោកក៏ចង់បញ្ជាក់ផងដែរថាកម្ពុជាគឺជាប្រទេសមានសុខសន្តិភាពពេញលេញពោរពេញទៅដោយក្តីស្រឡាញ់ និងរួសរាយរាក់ទាក់សម្រាប់ភ្ញៀវទេសចរណ៍មកពីអឺរ៉ុប និងពិភពលោក។
ការជិះម៉ូតូនេះក៏ទទួលបានការគាំទ្រពីប្រទេសអាល្លឺម៉ង់សហគមន៍អ្នកធុរកិច្ចអាល្លឺម៉ង់នៅកម្ពុជា (GBC) ស្ថានទូតអាល្លឺម៉ង់ប្រចាំនៅកម្ពុជា។ ដើមឡើយ លោកគ្រោងនឹងជិះម៉ូតូមកដល់រាជធានីភ្នំពេញនៅថ្ងៃទី ២៥ ខែតុលាឆ្នាំ២០២៤ ដើម្បីប្រារព្ធពិធីបុណ្យស្រាបៀរដ៏ធំរបស់អាល្លឺម៉ង់។ តែដោយសារកត្តាយថាហេតុបេសកកម្មនេះត្រូវបានពន្យាពេល ហើយដំណើរផ្លូវកាន់តែវែងឆ្ងាយពីត្រឹម ២៥០០០គីឡូម៉ែត្រ ឡើងដល់ជាង ២៩០០០គីឡូម៉ែត្រ។
យុទ្ធនាការ កៀរគរជួយដល់កុមារកម្ពុជារបស់លោក នឹងនៅបន្តដល់ថ្ងៃទី២៥ ខែវិច្ឆិកា ឆ្នាំ២០២៥។ សម្រាប់ការបរិច្ចាគដល់មូលនិធិគន្ធបុប្ផាសូមចូលទៅកាន់តំណភ្ជាប់ មូលនិធិគន្ធបុប្ផា៕
.jpg)
