កូរ៉េៈ ច្បាប់របស់កូរ៉េខាងត្បូង ស្តីពីការហាមឃាត់ ការសម្លាប់ឆ្កែ ការចែកចាយសាច់ឆ្កែ និងការហាមប្រាមការបង្កាត់ពូជឆ្កែ ដើម្បីយកសាច់ បានចូលជាធរមានកាលពីថ្ងៃពុធ ដោយរដ្ឋាភិបាលកូរ៉េខាងត្បូង បានផ្តល់សំណងដល់ហាងដែលធ្វើអាជីវកម្មឆ្កែចំនួនជាង ៥៦០០កន្លែងបន្ទាប់ពីការចេញសេចក្តីប្រកាសឱ្យបិទមុខរបរមួយនេះ។
បន្ទាប់ពីការប្រកាសពីស្តីការហាមឃាត់ការសម្លាប់ឆ្កែបានចូលជាធរមានរដ្ឋាភិបាលនៃទីក្រុងសេអ៊ូល បានបង្កើតគណៈកម្មាធិការថ្មីមួយដែលគ្រប់គ្រងលើការបញ្ចប់ការប្រើប្រាស់សាច់ឆ្កែ ខណៈច្បាប់នេះនឹងត្រូវបានអនុវត្តយ៉ាងពេញលេញក្នុងខែកុម្ភៈ ឆ្នាំ២០២៧ហើយអ្នកល្មើសច្បាប់ដែលនៅតែ សម្លាប់សត្វឆ្កែដើម្បីយកសាច់នឹងត្រូវប្រឈមមុខនឹងការជាប់ពន្ធនាគាររហូតដល់ ៣ឆ្នាំ ឬពិន័យជាប្រាក់ចំនួន ៣០ លានវ៉ុន (២១៨០០ ដុល្លារ)ចំណែកដែលអ្នកដែលចិញ្ចឹមឆ្កែសម្រាប់លក់សាច់ ឬលក់ឆ្កែអាចត្រូវបានផ្តន្ទាទោសដាក់ពន្ធនាគាររហូតដល់ ២ ឆ្នាំ ឬពិន័យជាប្រាក់ ២០លានវ៉ុន (១៤៥០០ដុល្លារ) ។
ការដាក់នូវច្បាប់ថ្មីនេះអាជ្ញាធរក៏នឹងជួយសម្រួលដល់ម្ចាស់អាជីវកម្មលក់សាច់ឆ្កែនេះផងដែរដោយផ្តល់រយៈពេលអនុគ្រោះពី ១ឆ្នាំកន្លះ ទៅ២ឆ្នាំដើម្បីឱ្យពួកគេផ្លាស់ប្តូរមុខរបរ ឬបិទអាជីវកម្មចិញ្ចឹម និងលក់សត្វឆ្កែ(សុនខ)។
បន្ថែមពីនេះរដ្ឋាភិបាលកូរ៉េ នឹងរៀបចំផែនការផ្តល់សំណងដល់អ្នកដែលពាក់ព័ន្ធក្នុងឧស្សាហកម្មសាច់ឆ្កែរួមទាំងកសិដ្ឋានចិញ្ចឹមឆ្កែ និងភោជនីយដ្ឋានសាច់ឆ្កែផងដែរហើយមានអាជីវកម្មសរុបចំនួន ៥៦២៥កន្លែង ដែលនឹងត្រូវរងផលប៉ះពាល់និងទទួលបានសំណងពីរដ្ឋ។
គួររំឮកឡើងវិញថាច្បាប់មួយផ្នែក នៃការហាមប្រាមនៃការធ្វើអាជីវកម្មសត្វឆ្កែពោលការហាមឃាត់ការ បង្កើតកសិដ្ឋានចិញ្ចឹមឆ្កែ បានចូលជាធរមានកាលពីខែកុម្ភៈដោយបានដាក់ពិន័យរហូតដល់ ៣ លានវ៉ុនលើអ្នកបំពាន។
បន្ទាប់មកនៅក្នុងខែមីនាអ្នកចិញ្ចឹមឆ្កែជាច្រើន បានបង្ហាញការមិនពេញចិត្ត ហើយសមាគមសត្វឆ្កែដែលការពារអ្នកបរិភោគសាច់ឆ្កែនៅក្នុងប្រទេសកូរ៉េតំណាងឱ្យកសិករចិញ្ចឹមឆ្កែចំនួនប្រហែល ១,៥លានក្បាល បានដាក់ពាក្យបណ្ដឹងប្រឆាំងនឹងរដ្ឋាភិបាល ដោយអះអាងថាទង្វើនេះបានរំលោភលើសេរីភាពក្នុងការជ្រើសរើសមុខរបរ និងសេរីភាពក្នុងការជ្រើសរើសអាហារ។
រហូតដល់ខែកក្កដាក្រុមសមាគមទាំងនោះ បានស្នើសុំក្រុមប្រឹក្សាសវនកម្មនិងអធិការកិច្ចក្នុងប្រទេស កូរ៉េខាងត្បូង ធ្វើការពិនិត្យមើលពីការរំលោភអំណាចដែលត្រូវបានចោទប្រកាន់ថា បានបង្អាក់ដល់អាជីវកម្ម និងធ្វើឱ្យមានបញ្ហាជីវភាពនៃអ្នកចិញ្ចឹមសត្វឆ្កែប៉ុន្តែទោះជាយ៉ាងណា ការទាមទារ និងតវ៉ាហាក់មិនទទួលបានជោគជ័យដោយសារប្រជាជនកូរ៉េ ជាពិសេសយុវវ័យជំនាន់ក្រោយ បានសម្តែងការមិនពេញចិត្តនិងមិនអាចទទួលយកបាននូវការបរិភោគសាច់ឆ្កែ និងស្នើឱ្យមានការបង្កើតច្បាប់ការពារសត្វចិញ្ចឹម។
សូមជម្រាបថាការទទួលទានសាច់ឆ្កែនៅលើឧបទ្វីបកូរ៉េគឺជាទម្លាប់ដែលមានអាយុកាលរាប់សតវត្សរ៍មកហើយ ដោយសារអ្នកខ្លះជឿថាសាច់ឆ្កែជួយមនុស្សឱ្យស្តារភាពរឹងមាំឡើងវិញបានហើយទំនោរនៃការបរិភោគសាច់ឆ្កែក៏មានការថយចុះផងដែរ ដោយពលរដ្ឋកូរ៉េភាគច្រើនងាកមកជ្រើសរើសសាច់ពពែខ្មៅជំនួសសាច់ឆ្កែវិញដែលធ្វើឱ្យតម្លៃសាច់ពពែខ្មៅមានការឡើងថ្លៃ៕
ប្រភព៖ ANN
.jpg)
.jpg)