កំពង់ឆ្នាំង: ឆ្លៀតពេលទំនេរពីការងារ លោក វន សុវី គឺជាបុរសម្នាក់មានចំណង់ចំណូលចិត្តក្នុងការកែច្នៃរបស់ចាស់ៗដែលគេបោះបង់ចោលទៅជារបស់មានសោភ័ណភាពក្នុងបំណងអភិរក្សវត្ថុតាំងវប្បធម៌មរតកពីដូនតាឱ្យបន្តរស់រានសម្រាប់ក្មេងៗជំនាន់ក្រោយ។
មូលហេតុដែលប្រជាជនមួយចំនួនបានបោះបង់ទូកត្នោតហើយងាកមកប្រើប្រាស់ទូកស្មាច់ជំនួសវិញ ដោយសារតែទូកស្មាច់ស្រាលហើយងាយស្រួលទុកដាក់។
ស្របពេលដែលលោកសម្គាល់ឃើញថាប្រជាជនខ្មែរបានងាកមកប្រើប្រាស់ទូកស្មាច់ និងបោះបង់ទូកត្នោតចោល ស្ថាបនិកសិប្បកម្មរូបនេះបានចាប់ផ្ដើមប្រមែប្រមូលទូកត្នោតចាស់ៗយកមកកែច្នៃជាគ្រឿងតាំងលម្អរំលេចដានប្រវត្តិសាស្ត្រនៃយានជំនិះជាមធ្យោបាយធ្វើដំណើរផ្លូវទឹកពីបរមបុរាណខ្មែរ។សិប្បកម្មរបស់លោកក៏រួមចំណែកផ្ដល់ការងារដល់សិស្ស-និស្សិតទំនេរពីការសិក្សាផងដែរ។
លោកបានប្រាប់សារព័ត៌មានSR News យ៉ាងដូច្នេះថា៖ «សិប្បកម្មនេះបង្កើតឡើងនៅឆ្នាំ២០២០ ។ ពេលនោះខ្ញុំបានចុះទៅតាមភូមិនៅស្រុកស្រែចម្ការខ្ញុំបានឃើញទូកត្នោតដែលគេបោះបង់ចោល ដែលទូកត្នោតទាំងនោះទូកខ្លះនៅប្រើបាននិងទូកខ្លះប្រើមិនបាន»។
លោកបានបន្តទៀតថា៖«ខ្ញុំក៏បានសាកល្បងប្រមូលទូកត្នោតទាំងនោះមកកែច្នៃលមើលពេលនោះ ក៏មានការផ្ទុះចាប់អារម្មណ៍ខ្លាំង ទើបខ្ញុំចាប់ផ្តើមប្រមូលទិញទូកត្នោតលក្ខណៈទ្រង់ទ្រាយធំតែម្ដង»។
ការផលិតនេះទៀតសោត លោកសុវីមិនបានទៅកាប់គាស់ខ្លួនឯងនោះទេគឺលោកយកតែទូកដែលគេបោះបង់ចោល ប្រភេទទូកចាស់ៗឬក៏ទូកដែលគេធ្វើរួចហើយបាន៥០-៦០ភាគរយ ប៉ុណ្ណោះយកមកកែច្នៃ។
ម្ចាស់សិប្បកម្មរូបនេះបញ្ជាក់ថា៖«ខ្ញុំមិនបានចូលរួមក្នុងការកាប់បំផ្លាញ់ដើមត្នោតនោះទេ»។
លោកបានឱ្យដឹងទៀតថា៖«ដើមត្នោត ដែលមានអាយុលើសពី១០ឆ្នាំទៅវាមានខ្លឹមល្អពេល យកមកធ្វើទូកនោះរឹងមាំប្រើបានយូរតែបើដើមត្នោតនៅស្ទើរ ពេលយកមកធ្វើទូក វាប្រើមិនបានយូរនេះទេឆាប់ពុកផុយ»។
ទូកត្នោតដែលលោកបានកែច្នៃរួចហើយអាចយកទៅប្រើប្រាស់សម្រាប់ដាក់តាំងលម្អដាំផ្កា ឬចិញ្ចឹមត្រីក្រឹម នៅតាមភោជនីដ្ឋាន គេហដ្ឋាន ឬតាមពិធីជប់លាងផ្សេងៗដោយគេនិយមយកទៅដាក់ទឹកកកត្រាំភេសជ្ជៈបានទៀតផង។ដំណើរការកែលម្អទូកនិមួយៗលោកត្រូវចំណាយរយៈពេលពីរទៅបីថ្ងៃ។
លោកបាននិយាយថា៖ «ចំពោះទូកដែលជាផលិតផលពាក់កណ្តាលសម្រេចនេះគឺយើងត្រូវ មកហាលថ្ងៃឲ្យស្ងួតទើបយើងចាប់ធ្វើទូកបាន»។
ទោះបីជាការកែច្នៃទូកត្នោតចាស់ៗពុំមានអ្វីជាឧបសគ្គតែលោកត្រូវទិញជើងទម្រពីកន្លែងផ្សេងដើម្បីផ្ដល់លំនឹងដល់ទូកសម្រាប់ការដាក់តាំងលម្អ។
ទូកត្នោតចាស់ៗត្រូវបានលោកប្រមូលទិញស្ទើរតែពីគ្រប់ខេត្តក្រុង។ទូកត្នោតដែលលោកបានកែច្នៃរួចហើយអាចមានតម្លៃចាប់ពី១៥០ដុល្លារទៅតាមប្រភេទទូកខ្លីវែង ឬទូកតូច ទូកធំ។
នៅក្នុង១ខែៗលោកសុវី អាចរកចំណូលបានចន្លោះ៥00 ដុល្លារដល់១000 ដុល្លារ។ ក្នុងខែដែលលោកលក់ដាច់ខ្លាំងលោកអាចរកចំណូលបានរហូតទៅដល់២០០០-៣០០០ដុល្លារឯណោះ។
លោកអាចលក់ទូកត្នោតបានច្រើនបំផុតចន្លោះពេលពិធីបុណ្យអុំទូករហូតដល់ចូលឆ្នាំខ្មែរដោយវាជារដូវកាលមានតម្រូវការខ្ពស់ចំពោះការទិញគ្រឿងដាក់តាំងលម្អ។
លោកបាននិយាយថា៖ «ភាគច្រើនគេយកទូកត្នោតនេះ យកទៅតាំងលម្អជាមួយនឹងរទេះគោដែលតាំងនៅតាមភោជនីយដ្ឋានឬក៏នៅតាមក្រសួង មន្ទីរ មួយចំនួន»។
នៅថ្ងៃអនាគតសិប្បកម្មរបស់លោក ក៏មានបំណងពង្រីកនិងកែច្នៃទូកត្នោតចាស់ៗឲ្យមានគុណភាពកាន់តែល្អដើម្បីនាំចេញទៅទីផ្សារអន្តរជាតិ ដូចជាសហគមន៍ខ្មែរនៅក្រៅប្រទេស និងអតិថិជនបរទេសដែលស្រឡាញ់វប្បធម៌ប្រពៃណីខ្មែរផងដែរ។
សិប្បកម្មរបស់លោកសុវី ស្ថិតនៅភូមិស្មែត ឃុំក្រាំងដីមាស ស្រុករលាប្អៀរ ខេត្តកំពង់ឆ្នាំង។ព័ត៌មានបន្ថែមពីសិប្បកម្មនេះ អាចស្វែងរកលើគេហទំព័រហ្វេសប៊ុក កំពង់ឆ្នាំងលក់រទេះគោតាំង លម្អ(https://www.facebook.com/profile.php?id=100063278285867:) និងទំនាក់ទំនងទូរសព្ទលេខឬតេលេក្រាម ០៨៧ ៥៤៩ ០៦១៕
.jpg)
.jpg)
.jpg)