ភ្នំពេញៈ កីឡាករកម្ពុជា ទូច ប្រុសណុច បានជាប់ឈ្មោះជាកីឡាករប្រដាល់ ដែលប្រើពេលប្រកួតខ្លីបំផុត ដែលអាចផ្តួលដៃគូប្រកួតបរទេស (អ្នកប្រដាល់ចិន) ឱ្យសន្លប់ដោយប្រើពេលត្រឹម៥០វិនាទី កាលពីថ្ងៃទី២២ ខែមិថុនាកន្លង។ កំណត់ត្រាថ្មីក្នុងការផ្តួលដៃគូបរទេសប្រើរយៈពេលខ្លីប្រចាំសង្វៀនប៉ុស្តិ៍លេខ៥នេះ នៅមិនទាន់មានកីឡាករកម្ពុជារូបណាមួយ អាចបំបែកកំណត់ត្រាបាននៅឡើយទេ គិតត្រឹមថ្ងៃទី ០៣ ខែកក្កដា ឆ្នាំ ២០២៤។
ក្នុងការប្រកួតនាគ្រោះ កីឡាករចិន លូ ជ័រសៀង (Lu Zuoxiang) មិនទាន់បានបញ្ចេញក្បាច់អ្វីសោះ ក៏ត្រូវបានប្រុសណុច ទាត់ឆ្វេងចូលថ្គាម បណ្តាលឱ្យដួលទាំងវង្វេង និងត្រូវបានអាជ្ញាកណ្តាលរាប់ជាលើកទី១ ត្រឹមរយៈពេល១វិនាទី។
បន្ទាប់ពីការរាប់នេះ ទូច ប្រុសណុច បានប្រើជង្គង់ហោះបុកចូលដើមទ្រូង រួចទាត់ស្តាំចូលផ្ទៃមុខ បណ្តាលឱ្យ លូ ជ័រសៀង ដួល និងត្រូវបានអាជ្ញាកណ្តាលរាប់ជាលើកទី២ ហើយក្នុងពេលដែល ជ័រសៀង មិនទាន់បាត់វង្វេងនេះ ប្រុសណុច ក៏បានស្ទុះចូលម៉ាត់ចំផ្ទៃមុខពេញៗ ប្រមាណ៧ដៃ បណ្តាលឱ្យកីឡាករចិនម្នាក់នេះ ដួលសន្លប់តែម្តង។
កីឡាករ ទូច ប្រុសណុច បាននិយាយក្រោយការប្រកួតថា៖ «ខ្ញុំគិតថាការឡើងប្រកួតលើកនេះ ដឹងតែតានតឹងហើយ ព្រោះខ្ញុំឃើញការប្រកួតរបស់គាត់ (លូជ័រសៀង) គឺគាត់ស៊ូ និងស្វិតណាស់ ប៉ុន្តែពេលការប្រកួតជាក់ស្តែង ខ្ញុំមិនត្រូវបានដៃគូវាយត្រូវកន្លែងណាសោះព្រោះគ្រាន់តែចូលភ្លាម ខ្ញុំបានទាត់ស្កាត់ចូលថ្គាម។ បន្ទាប់មកខ្ញុំប្រើជង្គង់ហោះ រួចទាត់ផ្កាប់ចាន និងចុងក្រោយប្រើកណ្តាប់ដៃផ្តួលគាត់ឱ្យសន្លប់»៕
