បទ «Baby MAMA» របស់ វណ្ណដា ឈរលើកំពូលតារាង YouTube

ភ្នំពេញៈតារាចម្រៀងរ៉េប លោក ម៉ាន់ វណ្ណដា បានបញ្ចេញបទចម្រៀងចុងក្រោយរបស់ខ្លួនចំណងជើង «Baby MAMA» លើ YouTube នៅថ្ងៃទី ២១ ខែមិថុនា ឆ្នាំ ២០២៤ ដោយចម្រៀងមួយបទនេះបានឡើងមកឈរចំណាត់ថ្នាក់លេខ១ នៃបទចម្រៀងដែលពេញនិយមរបស់ YouTube។

ការឈរលើកំពូលតារាងបែបនេះមិនមានអ្វីប្លែកនោះទេ សម្រាប់តារារ៉េបឈានមុននៃកម្ពុជារូបនេះ បើទោះជាវណ្ណាបង្អន់ចេញបទចម្រៀងមួយរយៈក៏ដោយ ប៉ុន្តែសម្ទុះនៃការគាំទ្រមិនថមថយទាំងក្នុងប្រទេស និងក្រៅប្រទេស។

សូមជម្រាបថា នៅក្នុងថ្ងៃដែលវណ្ណដាទម្លាក់បទ «Baby MAMA» គឺតារារ៉េបដែលជ្រកក្រោមផលិតកម្មបារមីរូបនេះ កំពុងបំពេញការងារនៅឯក្រៅប្រទេស។ ចំណែកនៅលើគេហទំព័រហ្វេសប៊ុកផ្លូវការរបស់តារាចម្រៀងវណ្ណដាកាលពីថ្ងៃទី ២៣ ខែមិថុនា បានបង្ហោះសារយ៉ាងដូច្នេះថា៖ «Thanks y'all for 600K views and Trending #1 on YouTube »។ ជាមួយនឹងការបង្ហោះសាររបស់វណ្ណដាបែបនេះ អ្នកគាំទ្រជាច្រើន បានចូលបញ្ចេញមតិសាទរ និងបង្ហាញក្តីស្រឡាញ់ជូនចំពោះអាយដល។  

គិតត្រឹមព្រឹកថ្ងៃទី២៥ខែមិថុនា ឆ្នាំ២០២៤ បទចម្រៀង «Baby MAMA» របស់វណ្ណដា មានការចូលទស្សនា រហូតដល់ជិត១លាន ១សែនដង៕