កណ្ដាល: អ្នកដែលស្ដាប់រឿងរ៉ាវបុណ្យកឋិនអាចធ្លាប់ឮគេនិយាយតៗគ្នាថា អ្នកទូលត្រៃ ទាល់តែមានវ័យចំណាស់បន្តិចហើយអ្នកមានវ័យក្មេងទូលត្រៃគឺជារឿងអភ័ព្វទៅវិញ។ ទោះជាការតំណាលតៗគ្នាពុំមានប្រភពច្បាស់លាស់តែជំនឿក្មេងមិនអាចទូលត្រៃកឋិនទាននេះ នៅបន្តដិតដាមក្នុងសង្គមពុទ្ធសាសនាខ្មែរ។
កន្លងមក ព្រះសង្ឃនិងមន្ត្រីជាន់ខ្ពស់ក្រសួងធម្មការក៏ធ្លាប់បានច្រាលចោលបម្រាមក្មេងទូលត្រៃកឋិននេះផងដែរ។
.jpeg)
យោងតាមព្រះចៅអធិការហោ ម៉េងខេង នៃវត្តមហាសាគរកោះប្រាំរយ (ហៅ បឹងប្រាំរយ)ដែលស្ថិតនៅស្រុកស្អាងខេត្តកណ្តាល បុណ្យកឋិនទាន ប្រារព្វចាប់ពីថ្ងៃ ១រោច ខែអស្សុជដល់ថ្ងៃទី១៥កើតខែកត្តិក មានរយៈពេល ២៩ថ្ងៃ។
ពិធីនេះអាចធ្វើបានគ្រប់វ័យឲ្យតែបុគ្គលនោះមានប្រាក់កាសធនធានគ្រប់គ្រាន់ដើម្បីរៀបចំ។
ព្រះអង្គមានសង្ឃដីកាបញ្ជាក់ប្រាប់សារព័ត៌មានSR News យ៉ាងដូច្នេះថា៖ «ពាក្យចចាមអារ៉ាម ដែលថា ក្មេងៗមិនអាចទួលត្រៃបានទេព្រោះបណ្ដាលឲ្យមានគ្រោះថ្នាក់បណ្ដាលឲ្យស្លាប់ ឬអាយុខ្លី ជាដើមជាពាក្យដែលមិនពិតនោះទេ។ ចំពោះការទូលត្រៃនេះ អាចទូលបានមិនប្រកាន់ចាស់ឬក្មេង ឡើយ»។
ព្រះអង្គក៏សំណូមពរឱ្យឈប់បន្តប្រើពាក្យនេះបន្តទៀត។
ដូចគ្នានេះដែររដ្ឋលេខាធិការនៃក្រសួងធម្មការនិងសាសនា និងជាសមាជិក គណៈកម្មាធិការជាតិរៀបចំបុណ្យជាតិ លោកញៀន ភឿន ត្រូវបានដកស្រស់ប្រសាសន៍ដោយទីភ្នាក់ងារសារព័ត៌មាន កម្ពុជា AKPថា តាមពិតទៅអ្នកមានវ័យប៉ុន្មានក៏អាចធ្វើបុណ្យនេះបានដែរមិនទាស់ខុសអីទេ។
ក្នុងការចុះផ្សាយកាលពីឆ្នាំ២០២២ លោកបានច្រានចោលមតិថា អ្នកនៅវ័យក្មេងមិនអាចផ្តើមធ្វើបុណ្យកឋិនទានឬទូលត្រៃបានឡើយដែលនាំឱ្យអាយុខ្លីរកស៊ីដាក់ និងជួបគ្រោះចង្រៃផ្សេងៗជាដើម។
លោកបានបញ្ជាក់ច្បាស់ៗថា៖«វាមិនដែលបុណ្យឯណាធ្វើមិនបាន គឺអាចធ្វើបុណ្យកឋិនបានទាំងក្មេងទាំងចាស់ធ្វើបានទាំងអស់ព្រោះបុណ្យប្រែថាសទ្ធាជ្រះថ្លា»។
សម្ដេចព្រះព្រហ្មរតនមុនី សិរីសុវណ្ណោ ពិន សែម ក៏បានចេញវីដេអូផ្សាយពីវត្តរាជបូណ៌ក្រុងសៀមរាបអំពីជំនឿមិនត្រឹមត្រូវនេះផងដែរ។
ព្រះអង្គមានសង្ឃដីកាថា៖«មានមតិចង្រៃនិយាយថាក្មេងៗទូលត្រៃកឋិនអាយុខ្លីឆាប់ងាប់ បើមិនអ៊ីចឹងទេគេថាវាឆុងធ្វើអ្វីក៏មិនមានដែរ បើមន្ត្រីរាជការធ្វើការក៏មិនឡើងបុណ្យឡើងស័ក្ដិ។ បើនិយាយពីពាក្យអ៊ីចឹងវិញវាកើតមាន ហើយអ្នកជឿនោះជឿហើយជឿងាប់ជឿរស់ថានៅក្មេងមិនទាន់ធ្វើបានទេទាល់តែមានកូន មានដន្លងដងស្នែង មានកូនប្រសា បានធ្វើមេកឋិនបាន»។
ព្រះអង្ឃ ពិន សែមបានស្នើសុំឱ្យលប់ជំនឿនេះចេញ ដោយវាពុំមានទេក្នុងព្រះពុទ្ធសាសនា។
ព្រះអង្គមានសង្ឃដីកាថា៖«អ្នកដែលអាចធ្វើជាមេកឋិននាំសំពត់កឋិនយកទៅប្រគេនប្រសង្ឃបានជាតិជាទេវតាក៏នាំបាន ជាមនុស្សក៏បាន មនុស្សអត់គិតថាមនុស្សស្រី មនុស្សប្រុសចាស់ក្មេងអីទេ។ នរណាក៏ដោយ អាយុប៉ុន្មានក៏ដោយឱ្យតែមានសទ្ធាជ្រះថ្លាក៏អាចធ្វើកឋិនបានដែរ»។
ឆ្នាំនេះបន្ទាប់ពីបុណ្យចេញវស្សាបុណ្យកឋិនទានចាប់ផ្ដើមពីថ្ងៃទី ១៨ ខែតុលា រហូតដល់ថ្ងៃទី ១៥ ខែវិច្ឆិកា។ បុណ្យកឋិនតែងត្រូវបានដង្ហែចូលគ្រប់ទីអារាមទាំងអស់។ពុំមានទីវត្ដណាមួយ ត្រូវបានខកខានឡើយ។
យោងតាមសំណេរភិក្ខុតេជវរោ ថាច់ដេវ គង់នៅវត្តផ្នោដូងលើគេហទំព័រ WordPressពាក្យថា «កឋិន» ជាភាសាបាលីសំដៅយកក្របក្ដារដែលភិក្ខុសង្ឃសម័យបុរាណឥណ្ឌាប្រើ សម្រាប់ដេរសំពត់ធ្វើជាស្បង់ចីវរ។សំពត់ដែលបានរៀបចំតាក់តែងឡើងនោះមានឈ្មោះថា «សំពត់កឋិន។
ព្រះចៅអធិការវត្តមហាសាគរកោះប្រាំរយនៅស្រុកស្អាងក៏មានសង្ឃដីកាបន្ថែមទៀតថា បើទីវត្តអារាមណាមួយមិនមានកឋិនទានហែចូលទេនោះ គណៈកម្មការវត្ត ត្រូវតែប្រមូលកៀរគរពុទ្ធបរិស័ទចំណុះជើងវត្តដើម្បីប្រារព្វពិធីដង្ហែកឋិនទានចូលវត្តដែរ ។
កម្មវិធីហែអង្គកឋិនទានចូលទៅទីវត្តអារាមនីមួយៗតែងត្រូវបានរៀបចំយ៉ាងអធិកអធមនិងមានភាពសប្បាយរីករាយបំផុត។ អ្នកផ្ដើមបុណ្យបានរៀបចំគ្រឿងបរិក្ខាកឋិនទានមានដូចជា ត្រៃចីវរ ចិវរ សង្ឃាដិ ស្បង់ និងទេយ្យទានផ្សេងៗទៀតដូចជា បាត ចានស្រាក់ កាំបិត ចេស ម្ជុល ថង់យាម ឆ័ត្រជាដើមដើម្បីហែចូលទីអារាម ដែលបានកំណត់ ។
នៅក្នុងកម្មវិធីបុណ្យកឋិននេះមានមនុស្សម្នាប្រុសស្រី ក្មេងចាស់ តែងខ្លូន លាបម្សៅ ស្លៀកពាក់ថ្មីៗ ចម្រុះពណ៌គ្នាក្នុងការហែនេះ គេក៏មានការប្រគំភ្លេងឆៃយ៉ាំ ដែលបង្កឲ្យមាន បរិយាកាសសប្បាយរីករាយយ៉ាងក្រៃលែង ។
លុះរសៀលជ្រៀលជ្រេរបន្ដិចទើបនាំគ្នាដង្ហែ អង្គកឋិនទានព័ទ្ធជុំវិញព្រះវិហារចំនួនបីជុំ ទើបនាំគ្នាចូលក្នុងព្រះវិហារ ហើយវេរអង្គកឋិនទានប្រគេនព្រះសង្ឃជាកិច្ចឆ្លងបង្ហើយបុណ្យ៕
