បាត់ដំបងជាទីក្រុងច្នៃប្រឌិតដំបូងគេរបស់អង្គការយូណេស្កូ ដែលឆ្លុះបញ្ចាំងសិល្បៈចម្អិននិងទទួលទានអាហារប្រកបដោយនិរន្តរភាព និងមានអត្ថន័យចំពោះបេតិកភណ្ឌម្ហូបខ្មែរ។
នៅថ្ងៃទិវាអាហាររូបត្ថម្ភប្រកបដោយនិរន្តរភាពដែលត្រូវបានប្រារព្ធធ្វើឡើងនៅថ្ងៃទី ១៨ ខែមិថុនា ជារៀងរាល់ឆ្នាំនៅទូទាំងពិភពលោកអង្គការយូណេស្កូសាទរពិធីធ្វើម្ហូបអាហារជាទម្រង់នៃការបញ្ចេញមតិវប្បធម៌លើកកម្ពស់ការយល់ដឹងអំពីសក្តានុពលរបស់ខ្លួនក្នុងការផ្សះផ្សាគោលដៅជាមូលដ្ឋានចំនួនពីរ៖ការការពារបរិស្ថាន និងការការពារភាពចម្រុះធម្មជាតិ និងវប្បធម៌។
អាហារូបត្ថម្ភប្រកបដោយនិរន្តរភាពអាចលើកកម្ពស់ការរក្សានូវទម្លាប់ធ្វើម្ហូបបែបប្រពៃណីក៏ដូចជាលើកទឹកចិត្តដល់ការប្រើប្រាស់ផលិតផលក្នុងស្រុកនិងគ្រឿងផ្សំតាមរដូវកាល។
ការប្រើប្រាស់បន្លែបង្កា និងគ្រឿងផ្សំក្នុងស្រុកក្នុងការចម្អិន តួយ៉ាងមានដូចជាបបរផិ ចម្អិនពីបន្លែចម្រុះពណ៌រួមមានផ្សិតចំបើង ផ្សិតអំបោះ ផ្សិតភ្លៅមាន់ ស្លឹកផ្ទី ស្លឹកបាស ស្អំស្នៀតពោត ពោតក្រហម ននោង ល្ពៅ និងសាច់ត្រី ជាដើម។
បបរផិមានប្រវត្តិយូរលង់មកហើយ ហើយប្រជាជនវ័យចំណាស់គ្រាន់តែឮឈ្មោះបបរនេះភ្លាម ធ្វើឲ្យពួកគាត់រឭកដល់អតីតកាល ដែលធ្លាប់ទទួលទានតាំងពីមុនរបបអាវខ្មៅទៅទៀត។
ស្ថិតក្នុងវ័យជាង៣០ឆ្នាំកញ្ញា គិត ចរណៃ ជាអ្នកលក់បបរនេះបានលើកឡើងថា៖ «ដឹងត្រឹមតែថាគេចូលចិត្តធ្វើញ៉ាំនៅតាមផ្ទះធម្មតាវាដូចជាសម្លប្រហើរអ៊ីចឹងគ្រាន់តែបន្ថែមអង្ករឲ្យក្លាយជាបបរផិហ្នឹងហើយគេចូលចិត្តញ៉ាំណាស់ហើយបបរផិនេះក៏ជាអាហារប្រចាំខេត្តបាត់ដំបងដែរព្រោះថាអ្នកនៅបាត់ដំបងគេស្គាល់បបរនេះទាំងអស់»។
នេះជាឧទាហរណ៍មួយនៅក្នុងប្រទេសកម្ពុជាដែលវប្បធម៌អាហារប្រកបដោយនិរន្តរភាពនៅក្នុងក្រុងបាត់ដំបង បានឆ្លុះបញ្ចាំងតាមរយៈទំនៀមទម្លាប់ធ្វើម្ហូបដែលចាក់ឫសយ៉ាងជ្រៅនិងផលិតផលក្នុងស្រុកដ៏សម្បូរបែប។
គោលការណ៍ទាំងនេះជាផ្នែកមួយនៃកិច្ចខិតខំប្រឹងប្រែងជាសាកលដើម្បីនិរន្តរភាព ដែលរួមមានការកាត់បន្ថយកាកសំណល់អាហារការបង្កើតយុទ្ធសាស្ត្រផលិតផលគិតគូរដល់ធនធានធម្មជាតិនិងការលើកកម្ពស់ការយល់ដឹងអំពីប្រភពដើមនៃគ្រឿងផ្សំសម្រាប់ចម្អិនអាហារ។
យោងតាមការចុះផ្សាយដោយអង្គការយូណេស្កូនៅថ្ងៃទី១៩ ខែមិថុនា ឆ្នាំ ២០២៤ បាត់ដំបងបានបង្ហាញពីការប្តេជ្ញាចិត្តយ៉ាងមុតមាំក្នុងការលើកកម្ពស់បេតិកភណ្ឌធ្វើម្ហូបខ្មែរជាពិសេសតាមរយៈការផ្តួចផ្តើមគំនិតច្នៃប្រឌិត ដូចជាការរៀបចំពិព័រណ៍និងពិព័រណ៍ម្ហូបអាហារ ការបង្កើតផ្សាររាត្រីថ្មីនិងការដាក់ឱ្យប្រើប្រាស់ប្រព័ន្ធកែច្នៃប្រកបដោយភាពច្នៃប្រឌិត ដើម្បីការអភិវឌ្ឍប្រកបដោយចីរភាពនិងកំណើនសេដ្ឋកិច្ច។
ដោយសារការអភិវឌ្ឍន៍ទាំងនេះទីក្រុងបានការពារយ៉ាងសកម្មនូវរូបមន្ត និងបច្ចេកទេសប្រពៃណីរបស់ខ្លួន ហើយបានផ្ដល់តម្លៃផលិតផលក្នុងស្រុកពិសេសរបស់ខ្លួនរួមមានបន្លែ ផ្លែឈើស្រស់ ផលិតផល និងមុខម្ហូបបែបប្រពៃណីពីត្រី អង្ករផ្ការំដួលនិងអង្ករផ្កាម្លិះដែលទទួលបានពានរង្វាន់ប្រចាំតំបន់។
ដូច្នេះហើយអាហារូបត្ថម្ភប្រកបដោយនិរន្តរភាពបានប្រែក្លាយទៅចំណុចមួយគាំទ្រដល់វិស័យទេសចរណ៍ប្រកបដោយនិរន្តរភាពរបស់ខេត្តបាត់ដំបងជំរុញភាពជាសហគ្រិន បង្កើតការងារនៅក្នុងតំបន់ និងរក្សាបាននូវបេតិកភណ្ឌធ្វើម្ហូបរបស់ម្ចាស់ស្រុកផងដែរ។
សម្រាប់ខេត្តបាត់ដំបងនេះបង្ហាញពីឱកាសមួយដើម្បីបំភ្លឺមុខម្ហូបប្រពៃណីខ្មែរនិងផលិតផលក្នុងស្រុកអន្តរជាតិទទួលបានការទទួលស្គាល់ជាចំណុចកណ្តាលនៃការច្នៃប្រឌិត និងច្នៃប្រឌិតវប្បធម៌ទន្ទឹមនឹងការបង្ហាញពីបេតិកភណ្ឌធ្វើម្ហូបរបស់កម្ពុជា ដែលជាការបង្ហាញជាមូលដ្ឋាននៃអត្តសញ្ញាណរបស់ប្រទេសនិងតស៊ូមតិសម្រាប់ សារៈសំខាន់នៃការធានាការអភិរក្ស និងការបន្តបេតិកភណ្ឌម្ហូបអាហារនេះទៅកាន់មនុស្សជំនាន់ក្រោយ៕
