កណ្តាល:ក្រោយពីមានការភ្ញាក់ផ្អើល និងប្រតិកម្មយ៉ាងផុសផុលនៅតាមបណ្ដាយសង្គម ទាក់ទងនឹងការបិទមិនឲ្យមានការហែទីងមោងនៅក្នុងស្រុកស្អាងខេត្តកណ្តាល ពីសំណាក់មន្ទីរធម្មការ និងសាសនាខេត្តកណ្តាលមក លោក គួច ចំរើនអភិបាលខេត្តកណ្តាល បានអះអាងថា មិនមានការបិទមិនឱ្យហែទីងមោងនោះឡើយ។
យោងតាមការបង្ហោះសារលើគេហទំព័ររបស់អភិបាលខេត្តកណ្តាលថ្មីលោក គួច ចំរើន នៅព្រឹកថ្ងៃ ទី១២ ខែកក្កដា ឆ្នាំ២០២៤ បានសរសេរថា៖ «ខ្ញុំបានឃើញការផ្សព្វផ្សាយអំពីទីងមោងថាត្រូវបានបិទ។ ខ្ញុំសូមបញ្ជាក់ថា ពុំមានការបិទទេហើយស្នើសុំឱ្យរៀបចំដោយមានសណ្តាប់ធ្នាប់ល្អ រក្សាបានគុណតម្លៃសិល្បៈវប្បធម៌ខ្មែរយើង។ខ្ញុំនឹងជួបជាមួយបងប្អូនផ្ទាល់នៅពេលខាងមុខ»។
លោក ស៊ីវ សាំងងីអ្នកធ្វើទីងមោងនៅស្រុកស្អាង ខេត្តកណ្តាល បង្ហាញពីអារម្មណ៍សប្បាយចិត្តក្រោយពីទទួលបានដំណឹងថា ពុំមានការបិទការហែទីងមោងនៅក្នុងស្រុកស្អាង ខេត្តកណ្តាលឡើយដែលការហែទីងមោង គឺជាទំនៀមតាំងពីយូរមកហើយ និងជាផ្នែកមួយនៃការចូលរួមថែរក្សាព្រះពុទ្ធសាសនា។
លោកបញ្ជាក់យ៉ាងដូច្នេះថា៖ «ខ្ញុំអរគុណលោកចៅហ្វាយខេត្តដើម្បីឱ្យអ្នកស្រុកស្អាងបានលេង បានហែ និងចូលរួមក្នុងព្រះពុទ្ធសាសនាហើយយើងហែកន្លងមក ក៏មិនមែនថាត្រឹមត្រូវតាម ព្រះពុទ្ធសាសនា១០០ភាគរយដែរប្រាកដជាមានចំណុចខុសឆ្គងណាមួយហើយ អ៊ីចឹងបើខុសឆ្គង សូមអាជ្ញាធរគ្រប់ជាន់ថ្នាក់មេត្តាយោគយល់និងមានការអធ្យាស្រ័យ»។
លោក សាំងងី បន្ថែមថាលោកគាំទ្រចំពោះការប្រកាសរបស់អភិបាលខេត្ត ក្នុងការកែតម្រូវចំណុចមួយចំនួនឱ្យត្រឹមត្រូវតាមវប្បធម៌ទំនៀមទម្លាប់ និងសាសនា ក៏ដូចជាការរៀបចំការហែទីងមោងនេះឱ្យមានសណ្តាប់ធ្នាប់ព្រោះការហែទីងមោងនៅស្រុកស្អាង មានលក្ខណៈអធិកអធម សប្បាយរីករាយហាក់ដូចជាអត្តសញ្ញាណអ្នកស្រុកស្អាងដូច្នោះដែរ។
គួរបញ្ជាក់ថាការផ្អាកមិនឱ្យមានការហែទីមោងនេះ ដោយសារកន្លងមក គេសង្កេតឃើញថាមានចំណុចមួយចំនួនបានប៉ះពាល់តម្លៃព្រះសង្ឃ និងព្រះពុទ្ធសាសនា ដូចជាមានបព្វជិតខ្លះបាននិមន្តទៅកាន់អគោចរដ្ឋានពុំគួរគប្បី និងត្រាច់ចរទៅមក,មានព្រះសង្ឃខ្លះ អាចារ្យវត្តខ្លះ ពុទ្ធបរិស័ទខ្លះនាំគ្នាដង្ហែក្បួនធ្វើការឃោសនាដោយប្រើឧគ្ឃោសនសព្ទចងកៀបព្រះពុទ្ធបដិមាដាក់លើរទេះ, ប្រើប្រាស់ទីងមោងឬម៉ុងសាយ ដើរឃោសនារៃអង្គាសប្រាក់បច្ច័យ នៅតាមទីសាធារណៈក្នុងទីប្រជុំជនដែលធ្វើឲ្យប៉ះពាល់ដល់ពុទ្ធបញ្ញត្តិ និងពុទ្ធានុញ្ញាតព្រមទាំងប៉ះពាល់ដល់សណ្ដាប់ធ្នាប់សាធារណៈសង្គម ដល់កិត្តិយសសេចក្ដីថ្លៃថ្នូររបស់ព្រះពុទ្ធសាសនា។
ដូចនេះការផ្អាកហែទីងមោង គឺដើម្បីធ្វើការរៀបចំឱ្យបានត្រឹមត្រូវឡើងវិញនេះក្នុងគោលបំណងលើកកម្ពស់កិត្យានុភាពសាសនា ព្រមទាំងធ្វើឲ្យប្រជាពលរដ្ឋមានភាពកក់ក្តៅក្នុងចិត្តលើសាសនាដែលជាទីពីពឹងរបស់ខ្លួនឲ្យស្របតាមរដ្ឋធម្មនុញ្ញនៃព្រះរាជាណាចក្រកម្ពុជា៕
.jpg)