.jpg)
កណ្ដាល:យុវជនជាច្រើនក្រុមដែលរស់នៅក្នុងស្រុកស្អាងខេត្តកណ្តាល បាននាំគ្នាចូលរួមការដង្ហែទីងមោងយ៉ាងអធិកអធមតាមដងផ្លូវដែលរួមមានទាំងការដើរការរាំឡកលោតពត់ពេនតាមចង្វាក់ភ្លេងឆៃយ៉ាំដែលបង្កើតបានជារូបភាពមួយសប្បាយរីករាយនៃជនជាតិខ្មែរក្នុងឱកាសពិធីហែទៀនព្រះវស្សា។
ឈរលើរ៉ឺម៉កដឹកបន្លែកំពុងរាំតាមចង្វាក់ភ្លេងឆៃយ៉ាំយុវជនប្រុសពៅ បានប្រាប់សារព័ត៌មានឌីជីថល SR ឱ្យដឹងថា ការដង្ហែទីងមោងនេះជាទំនៀមទម្លាប់ប្រពៃណីមួយរបស់អ្នករស់នៅក្នុងស្រុកស្អាងដែលប្រារព្ធឡើងជារៀងរាល់ឆ្នាំក្នុងនោះមានការហែទីងមោងជាច្រើន ដូចជាទីងមោងមុខមនុស្សនិងមុខយក្សជាដើម។
យុវជនវ័យ១៨ឆ្នាំរូបនេះបន្តថា៖«ខ្ញុំមានអារម្មណ៍សប្បាយរីករាយជាខ្លាំងខំដឹកបន្លែឱ្យរួចដើម្បីបានមកចូលរួមហែទីងមោងនេះព្រោះពេលហែម្តងៗមានមនុស្សចូលរួមច្រើនណាស់ណាមួយខ្ញុំតែងតែហែទីមោងនេះតាំងពីតូចមកជារៀងរាល់ឆ្នាំនៅមុនថ្ងៃចូលព្រះវស្សា»។
កំពុងឈរមើលការហែទីងមោងយុវតី ចន្ធូវ័យ១៧ឆ្នាំបញ្ជាក់ពីអារម្មណ៍ថា៖«ខ្ញុំសប្បាយរីករាយហើយរំភើបណាស់ពេលឃើញមានមនុស្សច្រើនអ៊ូអរដើរដង្ហែតាមទីងមោងអ៊ីចឹងតែខ្ញុំភ័យខ្លាចខ្លះដែរនៅពេលឃើញរូបទីងមោងយក្សមានមាឌធំៗនិងមុខកាចៗដើរដង្ហែតាមផ្លូវ។
សម្រាប់ការដង្ហែទីងមោងនៅក្នុងស្រុកស្អាងខេត្តកណ្តាលនេះត្រូវបានកំណត់កាលវេលាដង្ហែទៅតាមវត្តនីមួយៗដោយពេលហែម្តងៗប្រជាពលរដ្ឋទាំងចាស់ទាំងក្មេង តែងចូលរួមហែយ៉ាងច្រើន ដោយមានទាំងដើរប្រើម៉ូតូរ៉ឺម៉ក និងមធ្យោបាយផ្សេងៗ។
លោកស៊ីវ សាំងងីជាអ្នកឡកទីងមោងបានឱ្យដឹងថា លោកទន្ទឹងរង់ចាំហែទៀនព្រះវស្សានេះដូចជាទន្ទឹងចាំបុណ្យចូលឆ្នាំខ្មែដូច្នេះដែរដោយលោកត្រៀមខ្លួនរយៈពេលបីថ្ងៃមុនដើម្បីហែទៀនព្រះវស្សាព្រោះលោកត្រូវចូលឡកក្នុងទីងមោងយក្សដែលមានទម្ងន់ប្រហែលជាង៣០គីឡូក្រាម។
លោកបញ្ជាក់បែបនេះថា«គិតទៅវាធ្ងន់ណាស់ដែរប៉ុន្តែដោយសារតែការស្រឡាញ់ការចូលចិត្តធ្ងន់ប៉ុណ្ណឹងក៏វាមិនអីដែរសម្រាប់ខ្ញុំឲ្យតែពុកម៉ែបងប្អូននិងយុវជនយុវតីយើងទទួលបានភាពសប្បាយរីករាយ»។
លោកខាត់ ពិសីប្រធានផ្នែកគ្រប់គ្រងទីងមោងវត្តទឹកវិលសង្កេតឃើញថា ការចូលរួមដង្ហែទីងមោងនេះដំណើរការយ៉ាងរលូនដោយមានសណ្តាប់ធ្នាប់ល្អមិនមានការឈ្លោះប្រកែកគ្នានិងមានការចូលរួមការពារសុខសុវត្ថិពីក្រុមយុវជននៅក្នុងស្រុកស្អាងនេះផ្ទាល់។
.jpg)
លោករៀបរាប់ទាំងទឹកមុខញញឹមថា ឆ្នាំនេះ លោកមានអារម្មណ៍ថាសប្បាយរីករាយ ព្រោះការដង្ហែទីងមោងមុនថ្ងៃចូលព្រះវស្សានេះ ក៏ធ្វើឡើងដើម្បីរៃអង្គាសបច្ច័យ សម្រាប់ផ្គត់ផ្គង់ព្រះសង្ឃគង់ចាំព្រះវស្សា និងជាការថែរក្សានូវទំនៀមទម្លាប់ ក៏ដូចជាព្រះពុទ្ធសាសនា ដែលជាសាសនារបស់រដ្ឋផងដែរ៕
_6fzww.jpg)
