កណ្តាលៈទីងមោងមុខយក្សមានពណ៌លាយឡំចម្រុះស្រស់ស្អាត ដែលផលិតចេញពីស្មាច់ គឺជាស្នាដៃរបស់លោកស៊ីវ សាំងងី ដែលបានយកតាមមុខចម្លាក់យក្សទាញព្រ័ត្រ នៅតំបន់អង្គរធំ ដើម្បីត្រៀមបង្ហាញក្នុងឱកាសពិធីប្រពៃណីខ្មែរនានា។
លោក ស៊ីវ សាំងងី ជាងចម្លាក់ក្បាច់ស៊ីម៉ងត៍និងជាអ្នកផលិតទីងមោងនៅស្រុកស្អាង ខេត្តកណ្តាល បានប្រាប់សារព័ត៌មាន SR Digital Media ឱ្យដឹងថា កាលពីមុន លោកផលិតទីងមោងជាមុខមនុស្សធម្មតានិងមុខយក្ស ដោយយកតាមយក្សដែលគេគូរសម្តែងតាមវង់ល្ខោនតែប៉ុណ្ណោះ ប៉ុន្តែថ្ងៃមួយលោកបានទៅកម្សាន្តនៅតំបន់អង្គរ លោកក៏បានឃើញរូបចម្លាក់យក្សទាញព្រ័ត្រនៅខាងមុខក្លោងទ្វារប្រាសាទអង្គរធំដែលចម្លាក់យក្សនេះមានក្បូរក្បាច់រចនាល្អវិចិត្រ លោកក៏មានគំនិតថា នឹងយកលំនាំមុខយក្សទាញព្រ័ត្រនេះទៅរំលេចលើមុខយក្សទីងមោង ដើម្បីបង្កើតឱ្យចេញជារូបមានភាពស្អាតប្លែកភ្នែកផងដែរ។
អ្នកផលិតទីងមោងរូបនេះបានផលិតទីងមោងមុខយក្សដែលយកចេញពីរូបចម្លាក់យក្សដ៏អស្ចារ្យនៃរចនាប័ទ្មអង្គរដោយជោគជ័យក្នុងឆ្នាំ ២០២២ រហូតមកដល់ឆ្នាំ២០២៤នេះ លោកបានផលិតទីងមោងមុខយក្សខាងលើបានចំនួនប្រមាណ១០គ្រឿងហើយ កាន់តែពិសេស នៅក្នុងឆ្នាំ២០២៤នេះផងដែរ លោក សាំងងី ក៏បានផលិតទីងមោងមុខយក្សដែលមានទំហំធំ និងមានកម្ពស់ខ្ពស់រហូតជាង៣ម៉ែត្រ។
លោកបញ្ជាក់ដូច្នេះថា៖«ខ្ញុំធ្វើទីងមោងខ្ពស់ មានកម្ពស់៣ម៉ែត្រហើយទម្ងន់ប្រហែល ៣០គីឡូក្រាម កម្ពស់៣ម៉ែត្រហ្នឹង បូកនឹងអ្នកចូលឡកប្រហែកន្លះម៉ែត្រទៀតអ៊ីចឹង៣ម៉ែត្រកន្លះ វាជាកម្ពស់មួយស្តង់ដាហើយ ព្រោះបើយើងធ្វើកម្ពស់ខ្ពស់ជាងនេះទៀតធ្វើឲ្យអ្នកឡកពិបាក ក្នុងការទប់នឹងកម្លាំងខ្យល់ អីចឹងការធ្វើទីងមោង៣ម៉ែត្រគឺវាជាកម្ពស់ សមល្មមដែលយើងអាចទ្រាំទ្រ នឹងកម្លាំងខ្យល់បាន»។
អ្វីដែលកាន់តែប្លែកទៀតនោះទីងមោងរូបយក្សដ៏មានអំណាចនេះ គឺផលិតចេញពីស្មាច់ ដែលស្នាដៃ ធ្វើពីស្មាច់នេះក៏ជាគំនិតច្នៃប្រឌិតមួយថ្មីមួយទៀត និងដំបូងគេផងដែររបស់អ្នកផលិតទីងមោង ដែលមានដើមកំណើតនៅស្រុកស្អាងរូបនេះ។
.jpg)
ទាក់ទងនឹងមូលហេតុផលិតទីងមោងពីស្មាច់បែបនេះលោក សាំងងី បញ្ជាក់ថា៖ «ធ្វើទីមោងពីមុនយើងប្រើក្រដាស វាប្រើពេលវេលាយូរណាស់ក្នុងការធ្វើទីងមោងដោយយើងបិទបាយម៉ានកាន់តែបិទ ក្រដាសកាន់តែក្រាស់ វាធ្វើឱ្យបាត់បង់ទម្រង់មុខកាន់តែច្រើន ឧបមាថាបបូរមាត់យើងខំធ្វើពុម្ពដីស្អាត តែភ្នែកអី យើងបិទទៅវាលុបបូរមាត់ លុបទម្រង់អស់វាអត់ស្អាតដូច្នេះខ្ញុំក៏នឹកឃើញថាមានតែធ្វើពីស្មាច់វិញ ប្រហែលជាស្អាត ព្រោះនៅជាប់ជាមួយស្មាច់នេះខ្ញុំជាជាងចម្លាក់ក្បាច់ស៊ីម៉ងត៍ម្នាក់ដែរ»។
លោក រៀបរាប់បន្តថា៖ «ធ្វើទីងមោងពីស្មាច់នេះទទួលបានជោគជ័យក្នុងឆ្នាំ២០២១ រូបដំបូងជារូបយក្សបុរាណ ពេលហ្នឹងខ្ញុំមើលឃើញថាធ្វើពីស្មាច់ វាងាយស្រួល ចំណេញពេលវេលា ហើយទីងមោង អត់បាត់បង់ទម្រង់មុខទេ បើនិយាយពីអារម្មណ៍វិញសប្បាយចិត្តខ្លាំងព្រោះអ្វីដែលយើងប៉ងធ្វើ គឺឱ្យប្លែកពីគេ ស្អាតជាងគេ ហើយពេលនោះក្មេងៗ គេទទួលស្គាល់ច្រើនហើយបើមកដល់ ១ឆ្នាំ ២ឆ្នាំនេះ ស្មាច់ហ្នឹងវាសាយភាយពេញស្រុកស្អាងហើយ»។
សព្វថ្ងៃនេះ លោក ស៊ីវ សាំងងីនិងលោក ចុង យុនិន្ទ ដែលត្រូវជាក្មួយ កំពុងសហការគ្នាផលិតទីងមោងឱ្យបានទាន់ពេលវេលាតាមតម្រូវការរបស់ភ្ញៀវរួមមានទាំងការផលិតទីងមោងមុខមនុស្សធម្មតា និងមុខយក្ស។
ជាងចម្លាក់ក្បាច់ស៊ីម៉ងត៍វ័យ៣៧ឆ្នាំរូបនេះ បានឱ្យដឹងទៀតថា ការធ្វើទីមោងយក្ស១គ្រឿង ត្រូវចំណាយពេលប្រមាណ២០ថ្ងៃចំណែកទីមោងមនុស្សធម្មតា ត្រូវចំណាយពេលប្រមាណ១សប្តាហ៍ ដោយរួមបញ្ចូលទាំងការផលិតពុម្ពគូរមុខ ធ្វើជាលសម្រាប់ដងខ្នួន និងដេរសំលៀកបំពាក់ទីមោងផង។ ទីងមោងរូបយក្សដែលមានកម្ពស់៣ម៉ែត្រមានតម្លៃ១លាន៥០ម៉ឺនរៀល (តម្លៃតាមក្បាច់រចនានិងម្កុដរបស់យក្ស) ហើយទីងមោងមនុស្សប្រុសស្រីធម្មតាវិញមានតម្លៃ៨០ម៉ឺនរៀល។
លោកបន្ថែមទៀតថា ទីផ្សារទីងមោងនៅស្រុកស្អាងនេះមានការប្រកួតប្រជែងខ្លាំង ព្រោះទឹកដីខេត្តកណ្តាលនេះ ជាកន្លែងបណ្ដុំនៃអ្នកនិយមអ្នកលេងទីងមោងដោយពេលហែម្តងៗ មានទីងមោងរហូតដល់៣០ ទៅ ៤០គ្រឿងឯណោះ។ មិនត្រឹមតែផលិតទីងមោងសម្រាប់ផ្គត់ផ្គង់ក្នុងតំបន់ប៉ុណ្ណោះទេ ជាងចម្លាក់ខាងលើនេះ ក៏ធ្វើទីងមោងសម្រាប់ចែកចាយកាន់រាជធានី- ខេត្តនានាផងដែរ។
ទាក់ទងនឹងការរៀនធ្វើទីងមោងនេះលោក ស៊ីវ សាំងងី បានសិក្សាពីចាស់ព្រឹទ្ធាចារ្យ ក្នុងភូមិដែលធ្លាប់មានបទពិសោធន៍ចេះដឹងពីក្បួនខ្នាតនៃការធ្វើទីមោងនេះម្យ៉ាងកើតចេញពីចិត្តស្រឡាញ់ និងអនុស្សាវរីយ៍ដែលបានដិតជាប់ក្នុងការចងចាំតាំងពីកុមារព្រោះពេលនោះលោកតែងតែឈរមើល គេហែទីងមោងតាមផ្លូវ និងក្នុងកម្មវិធីនានា។
ជាចុងក្រោយលោក សាំងងីបានស្នើដល់ប្រជាពលរដ្ឋជួយគាំទ្រ និងថែរក្សាការធ្វើទីងមោងខ្មែរនេះ ក៏ដូចជាការចូលរួមហែទីងមោងតាមកម្មវិធីផ្សេងៗផងដែរព្រោះទីងមោងតែងតែផ្សារភ្ជាប់ក្នុងពិធី របស់ព្រះពុទ្ធសាសនា ដូចជាកឋិនទាន និងហែទៀនព្រះវស្សាជាដើម៕
