ការឡើងទម្ងន់ក្នុងរដូវកាលឈប់សម្រាកបុណ្យទាន គឺជារឿងធម្មតា?

បុណ្យ​ភ្ជុំបិណ្ឌ ជា​ពិធីបុណ្យ​ដ៏​សំខាន់បំផុត​មួយនៅ​​ប្រទេស​កម្ពុជា ក្នុងការ​​​ជួបជុំ​គ្រួសារនិងធ្វើបុណ្យ​ឧទ្ទិស​កុសល​​ ដល់​បុព្វការី​ជន។ ខណៈពេលដែលការ​ឈប់សម្រាក​កំឡុង​​ពិធីបុណ្យ​​នេះនាំមក​នូវ​ភាព​រីករាយជារឿយៗ​ការ​ញ៉ាំ​អាហារ​​​បរិបូណ៌​ និងការ​ខកខាន​បញ្ចេញពលកម្ម​ហាត់ប្រាណ​​ងាយ​នឹងធ្វើ​ឱ្យ​មនុស្ស​​ឡើង​​​ទម្ងន់​ណាស់។

​ឥទ្ធិពល​​​​ការ​ញ៉ាំ​អាហារ​រដូវបុណ្យទាន​

​ក្នុងឱកាស​បុណ្យ​ភ្ជុំបិណ្ឌ នំអន្សម សម្ល​ការី មាន់ ទា ត្រី សាច់​ បង្អែម ​និង​ម្ហូបអាហារ​សម្បូរ​កាឡូរី​ផ្សេងៗ​ទៀត​ត្រូវបាន​​រៀបចំ​តាមប្រពៃណី។

រយៈពេល​នៃ​ការ​បណ្ដោយ​ខ្លួនញ៉ាំឆ្ងាញ់ៗ​បែប​​នេះ​អាច​នាំឱ្យមាន​ការឡើង​ទម្ងន់​គួរឱ្យកត់សម្គាល់​មិនថា​សម្រាប់​ប្រជាជន​ខ្មែរ ឬ​នៅ​ប្រទេសណានោះទេ។ ទំនោរ​ឡើងទម្ងន់​កំឡុងពេលបុណ្យទាន​វិស្សមកាល និង​ថ្ងៃ​ឈប់​​សម្រាក​​នៅ​បណ្ដា​ប្រទេស​ផ្សេង ក៏​ត្រូវបានគេ​សម្គាល់​ឃើញថាអាច​ធ្វើ​ឱ្យ​ប្រជាជន​គ្រប់ជាតិសាសន៍​​​ឡើងទម្ងន់​​ផង​ដែរ។

យោងតាម​អ្នក​ស្រី Christina Badaracco អ្នកជំនាញ​ខាង​ចំណីអាហារនិង​ប្រឹក្សា​ផ្នែក​ថែទាំ​សុខភាព​ដែលមាន​មូលដ្ឋាន​នៅ​ទីក្រុង Washington, DC បាន​និយាយថា៖«មនុស្ស​ទំនងជាគិត​ដឹងមុន​ថា ​​ពួកគេ​នឹង​ឡើង​ទម្ងន់​កំឡុងពេល ឬ​ក្រោយចប់​​​ថ្ងៃឈប់សម្រាក​​ប៉ុន្តែកម្រិត​​គីឡូ​​​​​នឹង​កើនឡើង​តាម​ពេលវេលា ប្រសិនបើ​ពួកគេ​មិន​មាន​វិធានកា​រ​ទប់ទល់ជាមុន»។

យោង​តាមការ​ចុះផ្សាយ​ដោយ www.everydayhealth.com អ្នកស្រី​​​បាន​លើកឡើង​ថា ការយល់ដឹងពី​ការ​​​បម្រុង​នឹង​ឡើងគីឡូដូច្នេះអាច​ជួយ​ឱ្យ​មនុស្ស​​គ្រប់គ្រង​​ទម្ងន់​នៅ​ថ្ងៃបុណ្យ ក៏ដូចជា​ការពារ​បញ្ហា​សុខភាព​យូរអង្វែង​ទៅ​ថ្ងៃ​មុខផង​ដែរ។​

​កត្តា​ដែល​រួមចំណែក​ដល់​ការឡើង​ទម្ងន់​

​អ្នកស្រី​ Katherine D. McManus, MS, RD, LDN មកពី Harvard Health បាន​ពន្យល់ថា​៖ «​ម្ហូបម្ហាអាហារ​​សម្រន់ អាហារ​ប៊ូ​ហ្វេ​ដ៏​សម្បូរបែបនិង​កម្មវិធី​ជប់លៀង​ថ្ងៃ​សម្រាក​ធ្វើឱ្យ​ការរក្សា​ទម្ងន់ជារឿង​មួយ​ដ៏លំបាក​​​​ក្នុង​អំឡុង​វិស្សមកាល»។

ការ​ចុះផ្សាយដោយ www.health.harvard.edu អ្នកស្រី​បានបន្ថែមថា ទិដ្ឋភាព​សង្គម​នៃ​ពិធីបុណ្យ​ជារឿយៗ​​ពាក់ព័ន្ធ​នឹង​ការជួបជុំ និង​ពិធីជប់លៀង​ជាច្រើនដែល​បង្កើន​លទ្ធភាព​នៃ​ការ​ញ៉ាំ​ច្រើនពេកលើសតម្រូវការ។​

​​គ្រប់គ្រង​ការឡើង​ទម្ងន់​ក្រោយ​វិស្សមកាល​

​ដើម្បី​គ្រប់គ្រង​ការឡើង​ទម្ងន់​ក្រោយ​បុណ្យ​ភ្ជុំបិណ្ឌ វា​ចាំបាច់​ណាស់​ក្នុងការ​ត្រឡប់​ទៅរក​ទម្លាប់​ទទួលទាន​អាហារនិង​ការហាត់​ប្រាណ​ជាប្រចាំ​។

អ្នកជំនាញបាន​​ណែនាំ​យុទ្ធសាស្ត្រ​ជាច្រើន​ដូចជា រក្សា​ទម្លាប់​ទទួលទាន​អាហារជ្រើសរើស​អាហារ​ដែលមាន​ជាតិ​ខ្លាញ់​ទាប និងគោលដៅ​ដើរ​ឱ្យបាន​ ១ម៉ឺន​​ជំហាន​ក្នុង​មួយថ្ងៃបន្ទាប់ពីវេលាឈប់សម្រាក​នោះកន្លងផុត។

ការអនុវត្ត​ទាំងនេះ​អាចជួយ​បន្ធូរបន្ថយ​ផលប៉ះពាល់​នៃការឡើងគីឡូនិង​លើកកម្ពស់​ការវិលត្រឡប់​ទៅរក​របៀប​រស់នៅ​ដែលមាន​សុខភាព​ល្អ​ជាង​មុន​។​

​​សរុបសេចក្តី​មក ខណៈពេលដែលថ្ងៃឈប់សម្រាក​​បុណ្យ​ភ្ជុំបិណ្ឌ គឺ​ជា​​វេលា​មាស​ក្នុងការ​ជួបជុំ​ក្រុមគ្រួសារវា​ក៏​ជា​អំឡុង​ពេលមនុស្សមួយ​ចំនួន​ត្រូវ​ប្រឈម​នឹង​រឿង​ឡើង​ទម្ងន់​ដោយសារតែ​អាហារ​បុណ្យ និងការ​ខកខាន​ធ្វើ​លំហាត់ប្រាណ​​។

តាមរយៈ​ការយល់ដឹង​អំពី​កត្តា​ដែល​រួមចំណែក​ដល់​ការឡើង​ទម្ងន់​នេះនិង​ការអនុវត្ត​យុទ្ធសាស្ត្រ​ដែល​អ្នកជំនាញ​ណែនាំខាងលើ អាចឱ្យ​បុគ្គល​ម្នាក់ៗ​អាច​រីករាយ​ជាមួយថ្ងៃឈប់សម្រាក​ពិធីបុណ្យនិងថែ​រក្សាសុខ​ភាព​របស់​ពួកគេ​ពេលវិលត្រឡប់​ចូលធ្វើការ និង​ដំណើរអាជីវកម្មឡើងវិញ៕

‍