.jpg)
ដោយសារតែចង់ឃើញអាហារអត្តសញ្ញាណជាតិដែលប្រជាជនខ្មែរស្ទើរតែគ្រប់រូប តែងតែនឹកនារាល់ពេលចាកឆ្ងាយពីប្រទេសកំណើតនោះប្ដីប្រពន្ធខ្មែរនៅកូរ៉េខាងត្បូងបានសាកល្បងច្នៃនំបញ្ចុកក្រៀមច្រកកំប៉ុងដោយជោគជ័យហើយលក់ចែកចាយទៅកាន់ច្រើនប្រទេស។
ខុសប្លែកពីអ្នករស់នៅប្រទេសកម្ពុជាដែលងាយស្វែងរកនំបញ្ចុកអន្លក់ស្រស់ៗស្រូបទឹកសម្លក្ដៅ នៅក្នុងផ្សារ តូបនិងរទេះតាមផ្លូវនោះ ប្រជាជនខ្មែរដែលរស់នៅបរទេសត្រូវធ្វើដំណើររាប់សិបគីឡូម៉ែត្រស្វែងរកហាងម្ហូបខ្មែរ។ បើពុំដូច្នោះទេ ពួកគាត់ត្រូវស្វែងរកទិញគ្រឿងផ្សំចឹបចុបជាច្រើនមុខនិងចំណាយពេលយូរទំរាំចម្អិនបាននំបញ្ចុកបែបខ្មែរទទួលទាន។
.jpeg)
សម្រាប់អ្នកមិនសូវមានពេលទំនេរក្នុងការធ្វើម្ហូបអាហារប្រចាំថ្ងៃលោក ព្រីង ឆេង និង លោកស្រី ឌក គឹមស្រៀង ជាអ្នកខេត្តកំពង់ចាមរស់នៅប្រទេសកូរ៉េខាងត្បូងមានគំនិតច្នៃនំបញ្ចុកខ្មែរទៅជានំបញ្ចុកក្រៀមច្រកក្នុងកំប៉ុង ដែលអាចឆុងទទួលទានបានគ្រប់ពេលវេលាដូចមីកំប៉ុងដែរ។
លោកបានប្រាប់សារព័ត៌មានSR News ពីដើមចមនៃការធ្វើនំបញ្ចុកកំប៉ុងយ៉ាងដូច្នេះថា៖«ដោយសារចង់ឃើញនំបញ្ចុកខ្មែរប្រែក្លាយដូចជាមីកំប៉ុង ចង់ញ៉ាំពេលណា នៅទីណាក៏បាន ពិសេសទុកបានយូរ និង ជាអត្តញាណខ្មែរ»។
លោកបានបន្ថែមទៀតថាការធ្វើនំបញ្ចុកក្រៀម ទឹកសម្លរ និងល្បោយត្រូវបានឆ្លងកាត់ដំណាក់ កាលច្រើននិងចំណាយពេលក៏ច្រើន។
លោក ព្រីង ឆេង បានរៀបរាប់ថា៖«ដោយសារយើងពីរនាក់ប្ដីប្រពន្ធ ជាអ្នកចាប់ផ្តើមមុនគេដូច្នេះយើងត្រូវគិតច្រើន ដូចជាការស្រាវជ្រាវ លើបច្ចេកទេស និងសម្ភារៈជាដើម។និយាយឱ្យខ្លីគឺគិតគ្រប់យ៉ាង ដើម្បីឱ្យចេញជាផលិតផលសម្រេចប្រកបដោយគុណភាពសុវត្ថិភាព អនាម័យ ព្រមទាំងរសជាតិផងដែរ»។
ថ្វីត្បិតតែដំណាក់កាលផលិតនិងស្រាវជ្រាវមានភាពលំបាក តែគ្រឿងផ្សំនិងរូបមន្តធ្វើមិនសូវខុសគ្នានឹងនំបញ្ចុកខ្មែរទូទៅនោះទេ។
លោកបានបញ្ជាក់យ៉ាងដូចច្នេះថា៖«ចំពោះសសៃនំគឺធ្វើពីម្សៅអង្ករម្សៅដំឡូង និងស្រូវសាឡី និងធាតុផ្សំមួយចំនួនទៀត។ រីឯទឹកសម្លរគឺដូចទឹកសម្លរយើងធ្វើដែរទេ គ្រាន់តែយើង បន្ថែមដំឡូងជ្វានិងដំឡូងបារាំង»។
.jpeg)
នំបញ្ចុកក្រៀមកំប៉ុងនេះមាន៣ រសជាតិគឺ សម្លប្រហើរ ណាំយ៉ា និងការី ដែលអាចរក្សាទុកបានរហូតដល់កន្លះឆ្នាំ។
ចំពោះកំប៉ុងនំបញ្ចុកក្រៀមវិញត្រូវបានរចនាដោយមានរូបប្រាសាទអង្ករវត្ត ប្រាសាទព្រះវិហាររូបព្រះបាទជ័យវរ្ម័នទី៧ ជាមួយការរំលេចរូបភាពបញ្ជាក់ថាជាផលិតផលខ្មែរ។
លោក ព្រីង ឆេង និងភរិយាអាចឆ្លៀតនំបញ្ចុកកំប៉ុងនេះ តែកំឡុងពេលចុងសប្តាហ៍ប៉ុណ្ណោះ។ការផលិតក៏អាស្រ័យទៅតាមចំនួនកម្មង់តិច ឬច្រើនពីសំណាក់ភ្ញៀវ។
នំបញ្ចុក ១កេសតូចមាន ៦កំប៉ុង តម្លៃ ១៧០០០ វ៉ុនប្រហែល ១៣ ដុល្លារ។ តម្លៃលក់នំបញ្ចុកំប៉ុងអាចខុសគ្នាតិចតួចនៅប្រទេសកម្ពុជានិងបណ្ដាប្រទេសដទៃទៀត។
ទន្ទឹមនឹងមានការគាំទ្រនេះដែរលោក ព្រីង ឆេង ក៏ទទួលស្គាល់ពីតម្លៃខ្ពស់ក្នុងការផលិតវេចខ្ចប់ផងដែរ។
លោកបានឱ្យដឹងថា៖ «យើងក៏នៅជួបបញ្ហាដែរដោយសារតែការទិញទៅបរិភោគនៅមានកម្រិត ដោយសារមានតម្លៃថ្លៃទាំងតម្លៃថ្លៃដើមក្នុងការផលិត និងការដឹកជញ្ជូនឆ្លងប្រទេស»។
លោកបានបញ្ជាក់ប្រាប់ថា៖«យើងក៏កំពុងស្វែងរកវិធីសាស្ត្រកាត់បន្ថយចំណាយលើការផលិត ដើម្បីឱ្យតម្លៃនំបញ្ចុកនៅទាបសមរម្យអាចលក់លើទីផ្សារស្រុកខ្មែរបានទូទៅ»។
សព្វថ្ងៃនេះនំបញ្ចុកខ្មែរច្រកក្នុងកំប៉ុងមានលក់នៅខ្មែរកូរ៉េ ជប៉ុន និងកាណាដា។ អតិថិជនដែលជាវយកទៅបរិភោគ ពួកគាត់ភាគច្រើនសសើរថា ឆ្ងាញ់ដូចរសជាតិដើម។
នៅថ្ងៃអនាគតលោករំពឹងថានឹងអាចចែកចាយរសជាតិនំបញ្ចុកកំប៉ុងបែបខ្មែរនេះទៅគ្រប់ទីកន្លែង។
ដោយទទួលបានជោជ័យក្នុងការផលិតនំបញ្ចុកក្រៀមកំប៉ុងនេះលោក ព្រីង ឆេង ក៏បានបង្ហើបប្រាប់ដែរថា៖ «យើងក៏កំពុងសាកល្បងផលិតអាហារកំប៉ុងខ្មែរយើងមានដូចជា សម្លរ បង្អែម និងនំខ្មែរយើងផងដែរ»។
សិប្បកម្មរបស់លោកព្រីង ឆេង និង លោកស្រី ឌក គឹមស្រៀង ស្ថិតនៅប្រទេសកូរ៉េខាងត្បូង។ព័ត៌មានបន្ថែមអាចស្វែងរកលើគេហទំព័រហ្វេសប៊ុក ChhengPring៕
.jpg)
