.jpg)
ក្រោយពីជោគជ័យនឹងអាជីវកម្មគិតគូរបរិស្ថានកែច្នៃសម្បកពោតស្លឹករុក្ខជាតិ និងផ្កាស្មៅទៅជាបាច់ផ្កា កន្ត្រក ឬផ្ទាំងផ្កាផុសសម្រាប់ដាក់តាំងយ៉ាងស្រស់សោភានោះស្ថាបនិកហាង ផ្កាខ្មែរបានបើកឱកាសបង្រៀនជំនាញនេះដល់អ្នកចាប់អារម្មណ៍ទាំងឡាយក្រោមរូបភាពជាងវគ្គបង្រៀនគិតថ្លៃ និងមិនគិតថ្លៃ។
សហគ្រិនផ្កាខ្មែរ បានលើកឡើងថា៖ «គុណតម្លៃដ៏ធំរបស់ផ្ទះផ្កាខ្មែរមិនមែនដើម្បីតែប្រាក់កម្រៃមួយមុខទេ ប៉ុន្តែជាការចង់បង្កើតផលិតផលមួយដែលជារបស់ខ្មែរយ៉ាងពិតប្រាកដនិងអាចជួយផ្ដល់ការងារដល់មនុស្សជាច្រើននាក់ផ្សេងទៀត»។
.jpeg)
បង្កើតឡើងតាំងពីជាង៣ឆ្នាំមុន ផ្ទះផ្កាខ្មែរត្រូវបានគេទទួលស្គាល់ពីទឹកដៃច្នៃសម្បកពោត ស្លឹកចាកស្មៅក្រៀម ស្លឹកទ្រាំង និងផ្កាពោត ដែលងាយស្រួល និងសុទ្ធតែជាវត្ថុធាតុដើមសម្រាប់ផលិតផ្កាដ៏ស្រស់ស្អាត។
ផ្ទះផ្កាខ្មែរមានធ្វើកន្ត្រកផ្កា ស៊ុមផ្កា ថូផ្កា បាច់ផ្កា ដេគ័រផ្កាក្នុងកម្មវិធី ជាមួយជម្រើសផ្កាដ៏ច្រើនរាប់តាំងពីផ្ការំដួលផ្កាកុលាប ផ្កាលីលី ផ្កាអ័រគីដេ ផ្កាឈូករ័ត្ន ចម្រុះពណ៌ ទាំងស្អាតនិងរក្សាទុក្ខបានយូរ។
.jpeg)
លោក វង្ស ហិរញ្ញនិយុទ្ទម្ចាស់ហាងផ្កាខ្មែរ មានចំណូលចិត្ដស្រឡាញ់ការកាច់ផ្កាក្រដាសនិងចាប់ផ្ដើមបង្ហោះលក់តាមអនឡាញលេងៗ រហូតដល់បង្កើតបានជាហាងផ្កាមួយកាលពីប្រមាណ៣ឆ្នាំមុន។
អតីតអ្នកបម្រើការក្នុងវិស័យទេសចរណ៍រូបនេះបានរំឭកប្រាប់ថា៖«មិត្តភកិ្តខ្ញុំ ជាជាងកាត់សក់ ពេលទំនេរគាត់កាច់ផ្កា ដោយផ្ដើមការច្នៃផ្កាពីក្រដាស រួចបង្ហោះលក់អនឡាញធម្មតា»។
ដើមឡើយ លោកបានដើរប្រមូលវត្ថុធាតុដើមក្នុងការកែច្នៃតាមចិញ្ចើមផ្លូវ។ នោះគឺសម្បកពោតពីកន្លែងលក់ពោតស្ងោរ និងពោតអាំង គួបផ្សំនឹងការដើរបេះបោចដើមស្មៅបន្ថែមជាគ្រឿងលម្អ។
.jpeg)
លោកហិរញ្ញនិយុទ្ទ បានឱ្យដឹងថា៖ «យើងបានផ្ដាំគាត់ឱ្យជួយទុកសម្បកពោតឱ្យយើងដោយពេលខ្លះយើងជួយទិញពោតគាត់ និងថ្ងៃខ្លះក៏ជូនជាថវិកាដល់គាត់។អ៊ឹចឹង ឥឡូវពេលគាត់បកសម្បកពោតហើយ គាត់មិនចោលទៀតទេ។ពួកគាត់ទុកក្នុងថង់សម្រាប់ពួកយើង»។
ប៉ុន្ដែដោយសារតម្រូវការកើនខ្ពស់លោកបានប្រមែប្រមូលវត្ថុធាតុដើមពីសហគមន៍នៅតាមខេត្តវិញ ដែលមិនត្រឹមតែជាសកម្មភាពគិតគូរដល់បរិស្ថានប៉ុណ្ណោះទេថែមទាំងលើកស្ទួយដល់ជីវភាពប្រជាជនផងដែរ។
សព្វថ្ងៃក្រុមការងារផ្ទះផ្កាខ្មែរបានបង្កើនរហូតដល់ជាង ៥០នាក់ ដែលធ្វើការក្នុងដំណាក់កាលច្រើនតាំងពីការប្រមូលវត្ថុធាតុដើមស្ងោរ ធ្វើល័ក្ដពណ៌ ហាលកាត់ បត់ ធ្វើស្រទាប់ និងតម្លើងផ្កាជាដើម។
.jpeg)
លោក ហិរញ្ញនិយុទ្ទបានចាត់ទុកថា ជាមោទនភាពមួយក្នុងការរួមចំណែកលើកស្ទួយជីវភាពនិងសម្រាកបន្ទុករដ្ឋាភិបាល។
លោកបាននិយាយថា៖ «យើងមិនបានជួយអ្វីធំដុំដល់សង្គមជាតិទេតែយ៉ាងហោចណាស់ជាង ៥០នាក់នៅផ្ទះផ្កាខ្មែរដែលអាស្រ័យលើការច្នៃប្រឌិតរបស់ពួកយើងហើយធីមផ្ទះខ្មែរមានមោទនភាពដែលយើងចេះស្រឡាញ់គ្នាហើយខ្ញុំសង្ឃឹមថានឹងមានសហគមន៍ផ្សេងៗទៀតនឹងចាត់ទុកពួកយើងជាគម្រូគឺពួកយើងធ្វើចេញពីបេះដូង ចេញពីចិត្តក្រោមដំបូលតែមួយ»។
លោក វង្សហិរញ្ញនិយុទ្ទ ម្ចាស់ហាងផ្កាខ្មែរ បានប្រកាសតាមបណ្ដាញសង្គមថា៖ «សម្រាប់បងប្អូនដែលចង់រៀនត្រឹមចេះបត់ផ្កានៅត្រឹមតែធ្វើផ្កាគឺបងប្អូនអត់មានចំណាយលុយអីទេ បងប្អូនមានពេលបងប្អូនអាចមកទីតាំងយើងផ្ទាល់ក៏បាន ទៅទីតាំងនៅបឹងត្របែកក៏បានមានក្រុមការងារជួយបង្រៀនដោយឥតគិតថ្លៃ»។
.jpeg)
សម្រាប់អ្នកចាប់អារម្មន៍រៀន មិនចាំបាច់ទាល់តែមានសម្ភារៈទេដោយគ្រប់យ៉ាងមាននៅហាងស្រាប់។
លោកនិយាយថា៖ «មកតែខ្លួនមកបានហើយ ត្រឹមផ្កាម៉ាម៉ូតពីរម៉ូតអីមកតែខ្លួនបានសម្ភាៈយើងមានគ្រប់ទាំងអស់ទាំងសម្បកពោតក៏មាន ស្លឹកស្រស់ ស្លឹកចាក ក្រដាសក៏មានបើសិនជាបងប្អូនគ្រាន់តែរៀនម៉ូដផ្កា គឺអត់អស់លុយទេ»។
.jpeg)
រីឯអ្នកដែលចង់រៀនចាប់យកជាអាជីព លោកបានបញ្ជាក់ថា មានការគិតប្រាក់៨០០ដុល្លារ។ យ៉ាងណាមិញ លោកក៏នឹងជ្រើសរើសបេក្ខភាព ២ រូបបង្រៀនជាអាជីពដោយឥតគិតថ្លៃផងដែរដែលលោកនឹងប្រកាសអ្នកឈ្នះនៅដើមខែតុលា។
ផ្ទះផ្កាខ្មែរស្ថិតនៅផ្ទះ ២៥០ ផ្លូវ ១៤៣ សង្កាត់បឹងកេងកង ៣ ខណ្ឌចំការមន និងមានទីតាំងមួយទៀតនៅម្ដុំបឹងត្របែកដែលជាកន្លែងបណ្ដុះបណ្ដាលដល់អ្នកដែលស្រឡាញ់សិល្បៈបត់ផ្កាស្អាតៗទាំងនេះ៕
.jpeg)
.jpg)
.jpg)
