មណ្ឌលគិរី:ប្រជាសហគមន៍ត្រពាំងក្អើម នាំគ្នាចូលក្នុងព្រៃស្វែងរកនិងប្រមូលទឹកឃ្មុំព្រៃសុទ្ធធម្មជាតិ  ដើម្បីរកប្រាក់ចំណូលបន្ថែមផ្គត់ផ្គង់គ្រួសារខណៈទឹកឃ្មុំព្រៃមណ្ឌលគិរី ត្រូវបានទទួលស្គាល់ថាជាម៉ាកផលិតផលសម្គាល់ភូមិសាស្ត្រទំនិញរបស់កម្ពុជា។

អ្នកស្រី ស្រូវ ផារីគណៈកម្មការក្រុមឃ្មុំនៃសហគមន៍ត្រពាំងក្អើម បានប្រាប់សារព័ត៌មាន SR Digital Media ឱ្យដឹងថា ការប្រមូលទិន្នផលទឹកឃ្មុំនៅក្នុងខេត្តមណ្ឌលគិរីចាប់ផ្តើមចាប់ពីចុងខែមករាទៅ ព្រោះអំឡុងពេលនេះរុក្ខជាតិចាប់ផ្ដើមលូតលាស់មានស្លឹកខៀវខ្ចី និងមានផ្ការីកស្គុះស្គាយ ហើយសត្វឃ្មុំក៏ចាប់ផ្ដើមធ្វើសម្បុកផងដែរ។

អ្នកស្រី ស្រូវ ផារី បន្ថែមថា៖ «ការយកទឹកឃ្មុំរបស់ពួកគាត់ (ប្រជាសហគមន៍) គឺពួកគាត់យកតែ ៨០ភាគរយនៃក្បាលទឹកឃ្មុំទាំងមូលប៉ុណ្ណោះ ដោយយើងទុកទឹកឃ្មុំ២០ភាគរយនៅលើបង្គងដើម្បីទុកឲ្យវាចិញ្ចឹមកូន និងឲ្យឃ្មុំខិតខំក្រេបលំអងផ្កាដើម្បីបំពេញក្បាលទឹកដែលបាត់បង់ទៅឲ្យពេញឡើងវិញ»។

សម្រាប់ការប្រមូលផលទឹកឃ្មុំក្នុងមួយបង្គងប្រជាសហគមន៍អាចប្រមូលបានចំនួនពីរដង ដោយក្នុងនោះការ ប្រមូលលើកទី១ ទទួលបានបរិមាណទឹកឃ្មុំតិចជាងការប្រមូលផលទឹកឃ្មុំលើកទី២ ហើយការប្រមូលផលទឹកឃ្មុំបានច្រើនបំផុត គឺចន្លោះពីខែមីនា រហូតដល់ខែមិថុនា។

គណៈកម្មការក្រុមឃ្មុំខាងលើបានឱ្យដឹងថាទិញទឹកឃ្មុំក្នុងមួយលីត្រ មានតម្លៃចាប់ពី ៥៨០០០រៀល រហូតដល់ ៦០០០០រៀល(តាមការវាយតម្លៃពីកម្រិតគុណភាពទឹកឃ្មុំ)។ ជាមួយគ្នានេះ សហគមន៍បានលក់ទឹកឃ្មុំជូនដល់ក្រុមហ៊ុនចំនួន ៦ ដែលមានទីតាំងនៅរាជធានីភ្នំពេញ, មណ្ឌលគិរី, សៀមរាប និងនៅក្រុងតាខ្មៅ។

តម្លៃទឹកឃ្មុំរបស់សហគមន៍ត្រពាំងក្អើមខាងលើហាក់មានតម្លៃថ្លៃជាងទឹកឃ្មុំរបស់សហគមន៍នៃខេត្ត ដ៏ទៃ បន្តិចត្បិតទឹកឃ្មុំនេះប្រមូលបានពីសត្វឃ្មុំធម្មជាតិដែលមានក្នុងដែនជម្រកសត្វព្រៃភ្នំព្រេចនិងស្រែពក។ ម៉្យាងទៀតទឹកឃ្មុំនៃសហគមន៍ត្រពាំងក្អើមក៏ត្រូវបានទទួលស្គាល់ពីក្រសួងពាណិជ្ជកម្ម ក្នុងការចុះបញ្ជីម៉ាកសម្គាល់ភូមិសាស្រ្តទំនិញ «ទឹកឃ្មុំព្រៃមណ្ឌលគិរី»ផងដែរ នេះបើតាមអ្នកស្រីផារី។

ទាក់ទងនឹងបញ្ហាលំបាករបស់សហគមន៍វិញ អ្នកស្រីផារីវ័យ៣៦ឆ្នាំបានរៀបរាប់ថា៖ «សព្វថ្ងៃនេះសហគមន៍យើងខ្វះថវិកា គ្មានទុនបម្រុងទុក សម្រាប់ទិញទឹកឃ្មុំពីពួកគាត់ (ប្រជាសហគមន៍)ផលទឹកឃ្មុំរបស់សមាជិក មានច្រើន តែយើងទិញបានតិចត្រឹមតែ២ ទៅ៣តោនប៉ុណ្ណោះក្នុងមួយឆ្នាំ ហើយយើងខ្វះខាតធនធានមនុស្ស ដោយសារពួកគាត់មិនចេះអក្សរ មិនចេះរៀបចំរបាយការណ៍ហិរញ្ញវត្ថុនិងគ្មានចំណេះជំនាញ ក្នុងការទំនាក់ទំនងធ្វើទីផ្សារ ដើម្បីលក់ទឹកឃ្មុំនោះទេអ៊ីចឹងយើងត្រូវការពេលវេលាថែមទៀត»។  

សហគមន៍នៅក្នុងខេត្តមណ្ឌលគិរីនេះ មានសមាជិកសរុប១០៣នាក់ ដែលធ្វើការងាយក្នុងការប្រមូលទឹកឃ្មុំ ពីព្រៃធម្មជាតិ។ ក្រៅពីការយកឃ្មុំប្រជាសហគមន៍ត្រពាំងក្អើម ក៏ទទួលបានផលពីអនុផលព្រៃឈើផ្សេងៗ ទៀតផងដែរដូចជារកផ្កាអ័រគីដេ បេះផ្សិតប៉ក់ បន្លែបង្ការ បោចវល្លិ ផ្ដៅនិងជីវចម្រុះផ្សេងៗទៀតផងដែរ។

សហគមន៍ត្រពាំងក្អើម បង្កើតឡើងនៅឆ្នាំ២០០៧​ ក្នុងគោលបំណងលើកកម្ពស់ជីវភាពប្រជាជន តាមរយៈការបង្កើតការងារនិងស្វែងរកប្រាក់ចំណូលបន្ថែមជូនដល់ប្រជាជនក្នុងតំបន់និងគោលដៅរួមគ្នាជួយការពារព្រៃឈើ, សត្វព្រៃនិងជីវចម្រុះផ្សេងៗទៀត ព្រោះអនុផលទាំងឈើទាំងនេះគឺជាប្រភពចំណូលដ៏សំខាន់របស់ប្រជាពលរដ្ឋ។

សហគមន៍ត្រពាំងក្អើម មានទីតាំងស្ថិតនៅភូមិពូតាងឃុំពូជ្រៃ ស្រុកពេជ្រាដា ខេត្តមណ្ឌលគិរី។ ទំនាក់គេហទំព័រហ្វេសប៊ុក និង លេខទូរសព្ទ៖https://www.facebook.com/Mondulkiriwildhoneygi/   097548 5331

 Mondulkiri Wild Honey ទឹកឃ្មុំព្រៃមណ្ឌលគិរី

‍

‍

‍