.jpg)
ភ្នំពេញ: បន្ទាប់ពីភាពជោគជ័យកាលពីឆ្នាំមុនជាមួយចំនួនអ្នកចូលរួមប្រមាណ ២ម៉ឺនក្នុងរយៈពេល៣ ថ្ងៃ ព្រឹត្តិការណ៍តាំងពិព័រណ៍ TAG(Technology Anime Game Expo)ពីបច្ចេកវិទ្យា Anime ជប៉ុន និងហ្គេម បានវិលត្រឡប់មកវិញកាន់តែធំនៅទីតាំង Factory Phnom Penh ចុងសប្ដាហ៍នេះ ចាប់ពីថ្ងៃទី២៥ ដល់ ថ្ងៃទី ២៧ ខែតុលា ឆ្នាំ ២០២៤។
.jpeg)
លោកស្រី ហាក់ សំបូរ អ្នកតំណាងព្រឹត្តិការណ៍តាំងពិព័រណ៍ TAG EXPO បានឱ្យដឹងថា៖ «គោលបំណងដែលខ្ញុំបង្កើតព្រឹត្តិការណ៍តាំងពិព័រណ៍ TAG EXPO នេះឡើងគឺដោយសារខ្ញុំចង់បង្កើតសហគមន៍ធំមួយសម្រាប់អ្នកចូលចិត្តបច្ចេកវិទ្យាទាំងអ្នកស្រឡាញ់ការ Cosplay ក៏ដូចជាចូលចិត្ត Anime និងអ្នកស្នេហាវិស័យហ្គេមឱ្យគាត់បានជួបជុំគ្នានៅកន្លែងតែមួយ»។
អ្នករៀបចំកម្មវិធីរូបនេះ យល់ឃើញថា ទោះជាមនុស្សចាប់អារម្មណ៍លើវិស័យខុសៗគ្នាក៏ម្នាក់ៗនៅតែអាចផ្លាស់ប្ដូរគំនិត និងការយល់ឃើញ តាមរយៈការចូលរួមកម្សាន្តបែបនេះ។
លោកស្រីក៏សម្គាល់ឃើញផងដែរថា ក្នុងចំណោមអ្នកចូលរួម ត្រូវបានចាត់ទុកថាជាជំនាន់ Gen Z (អ្នកកើតជំនាន់ឆ្នាំ ១៩៩៧ ដល់ឆ្នាំ២០១២) គឺជាក្រុមដែលចាប់អារម្មណ៍នឹងបច្ចេកវិទ្យាខ្លាំងជាងគេ។
លោកស្រីបានឱ្យដឹងទៀតថា៖ «បច្ចុប្បន្នខ្ញុំឃើញថាយុវវ័យ Gen Z យើង គាត់ចាប់អារម្មណ៍ទៅលើបច្ចេកវិទ្យារួមទាំងគាំទ្រខ្លាំងមែនទែនទៅលើវិស័យ Anime និងហ្គេម ហើយក៏មានកម្មវិធី Cosplay និងការប្រកួតហ្គេមច្រើនគួរសមដែរទាំងហ្គេមទូរស័ព្ទនិងកុំព្យូទ័រ។ មួយវិញទៀតកម្មវិធីដែលខ្ញុំឃើញមួយៗហ្នឹងសុទ្ធតែមានអ្នកចូលរួមច្រើនអ៊ីចឹងហើយទើបខ្ញុំបង្កើតកម្មវិធី TAGEXPO នេះឡើងដំបូងតាំងពីឆ្នាំ ២០២៣ ដែលយើងមានវិស័យទាំង៣ បញ្ចូលគ្នាតែម្ដង ហើយទទួលបាន feedback ល្អៗពីអ្នកចូលរួមច្រើនមែនទែន ទើបកម្មវិធីយើងនៅតែបន្តមានក្នុងឆ្នាំ២០២៤ នេះ។
.jpeg)
ព្រឹត្តិការណ៍តាំងពិព័រណ៍ TAG នឹងមានការចូលរួមបង្ហាញពី បច្ចេកវិទ្យា Anime ជប៉ុន និងហ្គេម ជាច្រើនពីប៊្រេនធំៗនៅស្រុកខ្មែរ ក៏ដូចជា Cosplayer ល្បីឈ្មោះពីជាតិ និងអន្តរជាតិ។
ការតាំងពិព័រណ៍ TAG ក៏មាន mascot ផ្ទាល់ខ្លួន ឈ្មោះថា GIGI និងមានមនុស្សតែងខ្លួន Cosplay ពេញកម្មវិធីតែម្ដង។ ស្តង់ចូលរួមភាគច្រើនបង្ហាញពីបច្ចេកវិទ្យាទំនើបៗនិងហ្គេម សម្រាប់យុវវ័យសម័យថ្មី Gen។ កម្មវិធីលើឆាកធំ មានតាំងពីព្រឹកដល់យប់ រួមមានការប្រកួតហ្គេម ប្រកួត Cosplayការសម្ដែង និងការដេញថ្លៃអីវ៉ាន់បច្ចេកវិទ្យាជំនាន់ក្រោយ។
ទន្ទឹមនឹងនោះ អ្នកចូលរួមអាចបំពេញបេសកកម្មសប្បាយៗតម្រូវតាមលក្ខខណ្ឌកម្មវិធីដើម្បីមានឱកាសឈ្នះរង្វាន់១០០ភាគរយ ជាវត្ថុអនុស្សវរីយ៍ កាសស្ដាប់សំបុត្រយន្តហោះ និងម៉ូតូអគ្គីសនី។ ពិព័រណ៍ TAG ក៏មានលក់ Merchandise គុណភាពខ្ពស់ ដែលមានរូបស្អាតៗរបស់ mascot GIGI។
សំបុត្រចូលរួមព្រឹត្តិការណ៍តាំងពិព័រណ៍ TAGEXPO 2024 មានតម្លៃចាប់ពី២ដុល្លារឡើងទៅ៕
.jpg)
