ព្រះវិហារ៖ តារាចម្រៀង លោក អ៊ួន បឋមដែលភាគច្រើនអ្នកគាំទ្រស្គាល់ថា សាយ បាននឹងកំពុងរៀបចំព្រឹត្តិការណ៍រត់ប្រណាំង (Preah Vihear Temple Run2024) ដើម្បីអបអរសាទរថ្ងៃខួប១៦ ឆ្នាំ (ថ្ងៃ០៧ កក្កដា ឆ្នាំ២០០៨ - ថ្ងៃ០៧ កក្កដា ២០២៤)ដែលប្រាសាទព្រះវិហារបានចូលក្នុងបញ្ជី បេតិកភណ្ឌពិភពលោករបស់អង្គការយូណេស្កូ UNESCO។
លោកអ៊ួន បឋម (សាយ) ស្ថាបនិកព្រឹត្តការណ៍ Preah Vihear Temple Run2024 បានប្រាប់ សារព័ត៌មាន SR Digital Media ឱ្យដឹងថាគោលបំណងនៃការបង្កើតព្រឹត្តការណ៍រត់ប្រណាំងនេះ ធ្វើឡើងដើម្បីផ្សព្វផ្សាយពីតំបន់ប្រាសាទព្រះវិហារទៅកាន់ឆាកអន្តរជាតិជាពិសេសដើម្បីទាក់ទាញប្រជាជនខ្មែរ និងជនបរទេសឱ្យមកទស្សនាប្រាសាទព្រះវិហារនិងបានសិក្សាស្វែងយល់ពីសារៈសំខាន់ នៃប្រាសាទព្រះវិហារផងដែរ។
ចំពោះការដាក់ឈ្មោះកម្មវិធី PreahVihear Temple Run 2024 លោកសាយ បញ្ជាក់ថា៖ «ឈ្មោះកម្មវិធីជាភាសាអង់គ្លេសនេះ គឺដើម្បីឱ្យកម្មវិធីល្បាញល្បីទៅលើឆាកអន្តរជាតិហើយទាំងភ្ញៀវជាតិ និងអន្តរជាតិក៏មកចូលរួមរត់ដែរដើម្បីជាសក្ខីភាពដែលប្រាសាទព្រះវិហារជាបេតិកភណ្ឌពិភពលោក តាំងពីថ្ងៃទី៧ ខែកក្កដា ឆ្នាំ២០០៨ មកទល់នឹងពេលនេះមានរយៈពេល១៦ឆ្នាំ» ។
បើតាមលោកសាយអ្នកចូលរួមរត់ប្រណាំងក្នុងកម្មវិធីនេះ មានចំនួនប្រមាណ៧ ទៅ៨រយនាក់ដែលក្នុងនោះមានភ្ញៀវទេសចរអន្តរជាតិជាង១០ប្រទេសដូចជា ចិន នូវែលសេឡង់កូឡុំប៊ី ឡាវ នេប៉ាល់ ឥណ្ឌា អៀរឡង់ កាមេរ៉ូន បារាំង អាមេរិក កាណាដានិងកម្ពុជាដែលជាម្ចាស់ផ្ទះ។
សម្រាប់ការជ្រើសរើ់សទីតាំងប្រាសាទព្រះវិហារក្នុងការរៀបចំកម្មវិធីនេះឡើងដោយសារលោក មើលឃើញពីលក្ខណៈល្អនៃភូមិសាស្ត្រ ដែលអាចរៀបចំជាឧបសគ្គផ្សេងៗដូចជាផ្លូវដីគ្រោះ ផ្លូវឡើងភ្នំ ផ្លូវរត់ឆ្លងកាត់ជណ្ដើរបុរាណដើម្បីឡើងទៅកាន់ប្រាសាទព្រះវិហារជាដើម។
នៅក្នុងកម្មវិធីរត់ប្រណាំងនេះមានច្រើនវិញ្ញាសារជាច្រើនដូចជា ផ្លូវរត់ជញ្ជាំងដងរែក រយៈចម្ងាយ ៣០គីឡូម៉ែត្រ, ផ្លូវរត់សួគ៌ាល័យរយៈចម្ងាយ ២១ គីឡូម៉ែត្រ, ផ្លូវរត់ឌីទេពសែនជ័យ រយៈចម្ងាយ ៧ គីឡូម៉ែត្រ, ផ្លូវរត់នាគរាជ រយៈចម្ងាយ ៧ គីឡូម៉ែត្រនិងយាត្រាចរបេតិកភណ្ឌ រយៈចម្ងាយ ៧០០ ម៉ែត្រ ដោយចាប់ផ្ដើមរត់ចេញពីជើងភ្នំក្បែរបារាយណ៍ខាងលិច ឆ្ពោះទៅដល់គោបុរ:ទី ៤ នៃប្រាសាទព្រះវិហារ។
សម្រាប់ខួប១៦ឆ្នាំ ក្នុងការដាក់បញ្ជូលប្រាសាទព្រះវិហារក្នុងបញ្ជីបេតិកភណ្ឌពិភពលោកនេះវិញ តារាចម្រៀងឯករាជ្យរូបនេះយល់ឃើញថា៖ «វាពិតជាមានសារៈសំខាន់ណាស់ មានន័យថាតំបន់នៅប្រាសាទព្រះវិហារទាំងមូល គឺស្ថិតនៅប្រទេសកម្ពុជាមួយទៀតខ្ញុំរៀបចំកម្មវិធីនេះ គឺចង់ផ្សារភ្ជាប់ជនជាតិខ្មែរមកកាន់ប្រាសាទព្រះហារ ដើម្បីមកបង្ហាញភាពជាម្ចាស់នៃប្រាសាទក៏ដូចជាធ្វើឱ្យតំបន់ប្រាសាទនេះអ៊ូអរមួយឆ្នាំយើងមកម្ដងដើម្បីផ្ដល់កម្លាំងចិត្តទៅដល់អាជ្ញាធរ សមត្ថកិច្ចដែលឈរជើងនៅប្រាសាទព្រះវិហារនេះផងដែរ»។
ទន្ទឹមនឹងនេះតារាចម្រៀងដែលតែងតែធ្វើកាងារសង្គមរូបនេះក៏បានបង្ហើបពីគម្រោងមួយស្រដៀងនឹង កម្មវិធីនៅប្រាសាទព្រះវិហារផងដែរគឺការរៀបចំកម្មវិធីនៅប្រាសាទកោះកេរ ដើម្បីអបអរសាទរប្រាសាទកោះកេរដែលបានចុះចូលបញ្ជីបេតិកភណ្ឌពិភពលោកនៅថ្ងៃទី១៧ ខែកញ្ញា។
ជាចុងក្រោយលោក បានអំពាវនាវដល់សាធារណទាំងអស់ ឱ្យចូលរួមគាំទ្រនូវការរៀបចំកម្មវិធីកីឡាផ្សេងៗ ដែលផ្សារភ្ជាប់ទៅលើទិដ្ឋភាពអ្វីមួយនៅក្នុងប្រទេសកម្ពុជាយើងព្រោះកីឡាគឺជាសកម្មភាពមួយដើម្បីសុខភាព ជាពិសេសការចូលរួមនោះ នឹងជួយផ្សព្វផ្សាយកម្មវិធីទាំងនោះទៅកាន់ឆាកអន្តរជាតិ ដើម្បីជួយជំរុញវិស័យទេសចរណ៍របស់កម្ពុជាបានផងដែរ។
គួរបញ្ជាក់ថា ប្រាសាទព្រះវិហារគឺជាប្រាសាទដ៏ពិសិដ្ឋរបស់កម្ពុជាស្ថិតនៅលើភ្នំដងរែក មានកម្ពស់ ៦២៥ម៉ែត្រធៀបផ្ទៃទឹកសមុទ្រ ដែលមានទីតាំងស្ថិតក្នុងភូមិសាស្ត្រ ឃុំស្រអែមស្រុកជាំក្សាន្ត ខេត្តព្រះវិហារ និងមានចម្ងាយប្រហែល១០០គីឡូម៉ែត្រខាងជើងទីក្រុងព្រះវិហារ។ ប្រាសាទព្រះវិហារ ជាកម្មសិទ្ធិនិងមរតកដ៏មហាសាលរបស់ខ្មែរ បានដាក់បញ្ជូលក្នុងបញ្ជីបេតិកភណ្ឌពិភពលោករបស់អង្គការយូណេស្កូ នៅថ្ងៃទី៧ ខែកក្កដា ឆ្នាំ២០០៨៕
.jpg)