សាលារដ្ឋកាលីហ្វ័រញ៉ា ដាក់ប្រវត្តិសាស្ត្រ និងវប្បធម៌កម្ពុជា ក្នុងកម្មវិធីសិក្សាដើម្បីសហគមន៍ចម្រុះជាតិសាសន៍

ផេក​បណ្ដាញ​សង្គម CambodiaTown នៅ​កាលីហ្វ័រនីញ៉ាបាន​ឱ្យ​ដឹង​ថា៖ «កម្មវិធីសិក្សាគំរូ (Cambodian American Studies) នឹងដាក់ឱ្យដំណើរការនៅរដ្ឋកាលីហ្វ័រញ៉ានៅដើមឆ្នាំ ២០២៥»។

សហគមន៍ Cambodia Town ពិត​ជាមានកិត្តិយស​ក្នុងការ​ធ្វើជាដៃគូ​ជួយ​អភិវឌ្ឍ​កម្មវិធី​សិក្សា​សម្រាប់ខ្មែរ​អាមេរិក​សម្រាប់​ថ្នាក់ទី ១២ នៅសាលារដ្ឋ​កាលីហ្វ័រនីញ៉ា»។

កាលីហ្វ័រញ៉ា ជារដ្ឋដែលគេស្គាល់សម្រាប់ចំនួនប្រជាជនចម្រុះជាតិសាសន៍ និង​ជារដ្ឋ​ដែល​មាន​ពលរដ្ឋ​អាមេរិក​ដើម​កំណើត​ខ្មែរ​ជាច្រើនម៉ឺន​នាក់។ រដ្ឋ​កាលីហ្វ័រនីញ៉ា​កំពុងបោះជំហានឆ្ពោះទៅរកប្រព័ន្ធអប់រំដែលរួម​បញ្ចូល​វប្បធម៌​ចម្រុះ​កាន់តែច្រើន។

ច្បាប់ថ្មីដែលត្រូវបាន​ចុះហត្ថលេខាដោយអភិបាល Gavin Newsom កាល​ខែតុលា ឆ្នាំ ២០២៣ ​បាន​ត្រួសត្រាយផ្លូវសម្រាប់ការអភិវឌ្ឍន៍កម្មវិធីសិក្សាប្រវត្តិសាស្ត្រ និងវប្បធម៌កម្ពុជាសម្រាប់សាលារដ្ឋ។

គំនិតផ្តួចផ្តើមនេះកើ​ត​ចេញ​ពី​កិច្ច​ខិត​ខំ​ប្រឹងប្រែងស្រដៀងគ្នា សម្រាប់សហគមន៍វៀតណាម និងជនជាតិ Hmong ដើម្បី​បង្កើតការយល់ដឹងកាន់តែទូលំទូលាយអំពីបេតិកភណ្ឌអាស៊ីអាគ្នេយ៍ នៅក្នុងរដ្ឋកាលីហ្វ័រនីញ៉ា​។

យោង​តាមអង្គការសង្គមអាស៊ី Asian Society Organization ចំនួន​​ប្រជាជនអាមេរិក​ដើមកំណើតខ្មែរ ​ដែល​ភៀសខ្លួន​ពី​របបខ្មែរ​ក្រហម​នៅ​សហរដ្ឋអាមេរិក​សព្វ​ថ្ងៃ បានកើន​ដល់ប្រមាណ​ជាង ៥០ម៉ឺន​នាក់ ដោយ​ក្នុងនោះ​រដ្ឋ​កាលីហ្វ័រនីញ៉ា​​ គឺជា​ទីដែល​មាន​ជនជាតិដើមកំណើត​ខ្មែរស់នៅច្រើនជាងគេ។

ការដាក់ឱ្យប្រើប្រាស់កម្មវិធីសិក្សាប្រវត្តិសាស្ត្រ និងវប្បធម៌កម្ពុជា នៅក្នុងសាលារៀនរដ្ឋកាលីហ្វ័រញ៉ា គឺ​ជាជំហានដ៏សំខាន់មួយឆ្ពោះទៅរកប្រព័ន្ធអប់រំ ដែលតំណាងឱ្យជាតិសាសន៍​​កាន់តែច្រើននៅ​រដ្ឋ​មួយនេះ​។

តាមរយៈការជំរុញការយល់ដឹង និងការដឹងគុណចំពោះបេតិកភណ្ឌកម្ពុជា គំនិតផ្តួចផ្តើមនេះ ផ្តល់សិទ្ធិអំណាច​ដល់សិស្សានុសិស្ស​ក្នុងការផ្សារភ្ជាប់ជាមួយនឹងឫសគល់របស់ពួកគេ និងអបអរសាទរភាពចម្រុះ ដែល​ធ្វើឱ្យរដ្ឋ​កាលីហ្វ័រញ៉ាក្លាយ​ជារដ្ឋដ៏រស់រវើក។

ការ​ចងក្រង​កម្មវិធីសិក្សាដែលរំពឹងថានឹងបញ្ចប់នៅខែកញ្ញា ឆ្នាំ២០២៤ ដែលនឹងគ្របដណ្តប់លើប្រធានបទជាច្រើន នេះបើយោងតាម ​​Ian Hanigan អ្នកនាំពាក្យនៃនាយកដ្ឋានអប់រំOrange County (OCDE) ដែល​កំពុង​ដឹកនាំ​ការអភិវឌ្ឍន៍​កម្មវិធីសិក្សា​សិក្សាប្រវត្តិសាស្ត្រ និងវប្បធម៌កម្ពុជាសម្រាប់សាលារដ្ឋ​កាលីហ្វ័រនីញ៉ា។

ក្នុងកម្មវិធីសិក្សា​នោះផង​ដែរ លោកបានពន្យល់ថា៖ «យើងកំពុងសម្លឹងមើលអរិយធម៌អង្គរវត្តបុរាណ របប​ខ្មែរ​ក្រហម និងបទពិសោធន៍របស់​ជនភៀស​ខ្លួនកម្ពុជា ដែលមកទឹកដី​អាមេរិកដោយសារ​​សង្រ្គាម»។

លោក Hanigan ​បាន​បន្ត​ថា៖ «គោលបំណងយើង​គឺដើម្បីបង្កើតធនធានដែលមាន​លក្ខណៈទូលំទូលាយ និង​ជំរុញ​ឱ្យមានការកោតសរសើរស្ញប់ស្ញែង ​យល់ដឹងពីវប្បធម៌ដើម​​​ពលរដ្ឋ​មានសាវតា​ចម្រុះជាតិសាសន៍​»។

​ការអភិវឌ្ឍន៍កម្មវិធីសិក្សានេះ នឹងដំណើរដោយមានការសហការជាមួយ OCDE, នាយកដ្ឋានអប់រំមកពីតំបន់ Humboldt, San Diego ដោយនឹងធ្វើការជាមួយអ្នកអប់រំ អ្នកប្រាជ្ញ និងសមាជិកនៃសហគមន៍ខ្មែរអាមេរិកាំងផងដែរ។

លោក Hanigan បានសង្កត់ធ្ងន់ថា៖ «ការគិតគូរ​សហគមន៍​ចម្រុះជាតិសាសន៍​ គឺមានសារៈសំខាន់ណាស់​»។

លោក​លើកឡើង​ទៀត​ថា៖ «យើងបានរៀបចំវេទិកា និង​​ស្តាប់ដោយផ្ទាល់ពីប្រជាជនកម្ពុជា អំពីអ្វីដែលពួកគេ​ចង់​ឱ្យកូនរបស់ពួកគេបានរៀននៅសាលា​។ វាមានសារៈសំខាន់ណាស់ក្នុងការបង្ហាញប្រវត្តិសាស្ត្រ ដែលមានលក្ខណៈរសើប រួមមានទាំងការទទួលស្គាល់ការតស៊ូ និងជ័យជំនះរបស់ប្រជាជនកម្ពុជាផងដែរ។

កម្មវិធីសិក្សាគម្រូ ​មិនត្រូវបានកំណត់ចូលក្នុង​សៀវភៅសិក្សាទេ ចំណែកខ្លឹមសារនៃការ​​បង្រៀន ​ប្រភពឯកសារគោល​ និងព័ត៌មាន ក៏កំពុងត្រូវបានបង្កើតឡើងផងដែរ ដើម្បីផ្តល់ឱ្យគ្រូនូវមធ្យោបាយបង្រៀន​ដ៏សម្បូរបែប។

លោក Hanigan បន្ថែមថា៖ «យើងចង់ធ្វើឱ្យកម្មវិធីសិក្សានេះមានអន្តរកម្ម និងអាចចូលទៅ​កែកុនបំពេញ​បន្ថែម​បាន។ មេរៀន​ក្នុង​កម្មវិធី​សិក្សា​នេះ ​ក៏មានបញ្ចូល​តន្ត្រីប្រពៃណីខ្មែររបាំ និងការងារសិល្បៈ ក៏ដូចជា​​ឱ្យសិស្សភ្ជាប់ទំនាក់ទំនង​ជាមួយ​វាគ្មិនខ្មែរអាមេរិកាំង»។

ខណៈពេលដែលការអភិវឌ្ឍន៍កម្មវិធីសិក្សាគឺជាជំហានវិជ្ជមានបញ្ហាប្រឈមនៅតែមាន។ ការធានាថាគ្រូបង្រៀ​នមាន​ការបណ្តុះបណ្តាល និងធនធានគ្រប់គ្រាន់ដើម្បីអនុវត្តកម្មវិធីសិក្សាប្រកបដោយប្រសិទ្ធភាព គឺជារឿងមួយ​​សំខាន់។ លើសពីនេះទៀត អ្នកតស៊ូមតិសង្ឃឹមថាគំនិតផ្តួចផ្តើមនេះនឹងជំរុញឱ្យរដ្ឋផ្សេងទៀតយកគម្រូតាម នៅ​ឆាប់ៗ​ខាង​មុខ​នេះ​​៕

‍