.jpg)
ភ្នំពេញៈ អ្នកលេងបណ្តាញសង្គមជាច្រើនបានបង្ហាញប្រតិកម្ម និងបញ្ចេញមតិខុសគ្នា ទៅលើ វីដេអូមួយដែលនារីម្នាក់កំពុងកូរម្សៅប្រូតេអ៊ីនក្នុងចានដែកយ៉ាងធំហើយច្រកម្សៅនោះ ទៅដាក់កំប៉ុង ថ្លឹងគីឡូសម្រាប់លក់។មតិក្នុងបណ្តាញសង្គមទាំងនោះ បានបង្ហាញពីការព្រួយបារម្ភអំពីគុណភាពនិងសុវត្ថិភាពនៃផលិតផលម្សៅប្រូតេអ៊ីននេះ ថាជាផលិតផលគ្មានស្តង់ដារនិងគួរមានអ្នកជំនាញត្រួតពិនិត្យឱ្យត្រឹមត្រូវ មុនពេលដាក់លក់នៅលើទីផ្សារ។
ទាក់ទងនឹងមតិខាងលើនេះបើតាមការស្រាវជ្រាវបានបង្ហាញថា ម្សៅប្រូតេអ៊ីន មិនត្រូវបានគ្រប់គ្រងដោយរដ្ឋបាលចំណីអាហារ និងឱសថ (FDA) ពិភពលោក ដូចជាថ្នាំពេទ្យនិងចំណីអាហារផ្សេងៗទៀត នោះទេ។
កង្វះបទប្បញ្ញត្តិនិងទទួលស្គាល់ដោយរដ្ឋបាលចំណីអាហារ (FDA) នេះ បានបញ្ជាក់ន័យថាម្សៅប្រូតេអ៊ីនគ្រប់ប្រភេទ មិនត្រូវបានធ្វើតេស្តដោយទីភ្នាក់ងារ (FDA)ដែលអាចធានាពីសុវត្ថិភាពនិងប្រសិទ្ធភាពដល់អ្នកប្រើប្រាស់នោះឡើយហើយវាអាចបង្កហានិភ័យដល់អ្នកប្រើប្រាស់ បើសិនជាផលិតផលនេះមិនមានវិញ្ញាបនបត្រចេញពីមន្ទីរពិសោធន៍ត្រឹមត្រូវ ព្រោះថាកន្លងមកម្សៅប្រូតេអ៊ីនមួយចំនួននៅលើទីផ្សារ មានផ្ទុកសារធាតុកខ្វក់ដូចជាថ្នាំសម្លាប់សត្វល្អិត និងបាក់តេរី ដែលបង្កគ្រោះថ្នាក់ដល់សុខភាព។
ដំណោះស្រាយចំពោះអ្នកប្រើប្រាស់
អ្នកដែលប្រើប្រាស់ផលិតផលម្សៅប្រូតេអ៊ីនអាចជ្រើសរើសវិធីសាស្ត្រមួយដែលធានាសុវត្ថិភាពបានគឺ អ្នកប្រើប្រាស់ត្រូវទិញផលិតផលដែលមានការធ្វើតេស្តដោយភាគីទីបីពោលសំដៅដល់ មន្ទីរពិសោធន៍ឯករាជ្យ ដើម្បីផ្ទៀងផ្ទាត់ពីសុវត្ថិភាពប្រសិទ្ធភាពដល់អ្នកប្រើប្រាស់ ព្រោះថាការដែលមានមន្ទីរពិសោធន៍ឯករាជ្យចូលរួមធ្វើតេស្តវានឹងបង្ហាញពីលទ្ធផលដោយមិនលំអៀង ទាំងគុណប្រយោជន៍និងផលអាក្រក់ដល់អ្នកប្រើប្រាស់។
សូមជម្រាបថាមន្ទីរពិសោធន៍ឯករាជ្យ ដែលរដ្ឋបាលចំណីអាហារ (FDA) ទុកចិត្ត និងទទួល មានដូចជា NSFInternational, Informed-Sport, និងConsumer Lab ព្រោះ ស្ថាប័ន ទាំងនេះធ្វើការធ្វើតេស្តហ្មត់ចត់ដើម្បីធានាថាផលិតផលបំពេញតាមស្តង់ដារគុណភាពគ្មានការបំពុលដែលបង្កគ្រោះថ្នាក់ដល់អ្នកប្រើប្រាស់។
គួរបញ្ជាក់ថាម្សៅប្រូតេអ៊ីន គឺជាអាហារបំប៉នសុខភាពដែលផ្តល់នូវ សារធាតុចិញ្ចឹម សម្រាប់ការសាងសង់ ជួសជុលជាលិកា ផលិតអង់ស៊ីម អរម៉ូន និងជួយគាំទ្រដល់មុខងាររាងកាយទាំងមូល។ម្សៅប្រូតេអ៊ីនមានច្រើនប្រភេទដែលមានសារធាតុផ្សំផ្សេងៗគ្នាជាច្រើនដូចជាផ្សំពី រុក្ខជាតិ បន្លែ ផ្លែឈើ ទឹកដោះគោ ស៊ុត សាច់ សណ្តែកសៀង អង្ករ ដំឡូងប័រ និងស៊ុត ជាដើម។
វាមានប្រជាប្រិយភាពជាពិសេសក្នុងចំណោមអត្តពលិកអ្នកហាត់កាយវប្បកម្ម និងបុគ្គលដែលកំពុងស្វែងរកការបន្ថែមប្រូតេអ៊ីនដើម្បីការលូតលាស់សាច់ដុំ ការសម្រកទម្ងន់ ឬថែទាំសុខភាពទូទៅ។មូលហេតុដែលនាំឱ្យម្សៅប្រូតេអ៊ីន មានភាពល្បី និងជ្រៀបចូលទៅក្នុងទម្លាប់ប្រចាំថ្ងៃរបស់មនុស្ស ដោយសារតែការផ្សព្វផ្សាយតាមណ្តាញសង្គមពីអត្ថប្រយោជន៍ជាច្រើនរបស់វាចំពោះសុខភាព៕
.jpg)
.jpg)
