អ្នកប្រើប្រាស់ប្រព័ន្ធផ្សព្វផ្សាយសង្គមរាប់លាននាក់នៅក្នុងប្រទេសឥណ្ឌាត្រូវបានជាប់គាំងបន្ទាប់ពី Koo ដែលជាវេទិកា microblogging ក្នុងស្រុក ដែលត្រូវបានចាត់ទុកថាជាបណ្តាញសង្គមសម្រាប់ជំនួសបណ្តាញសង្គមX នោះបានប្រកាសបិទសេវារបស់ខ្លួន។
លោក Aprameya Radhakrishna ស្ថាបនិករបស់Koo បានលើកឡើងពីកង្វះថវិកា និងការចំណាយលើបច្ចេកវិទ្យាខ្ពស់ដែលជាហេតុផលនៅពីក្រោយការសម្រេចចិត្តមួយនេះ។
បើកដំណើរការនៅឆ្នាំ ២០២០ បណ្ដាញសង្គម Koo បានផ្តល់សេវាផ្ញើសារជាង ១០ ភាសាឥណ្ឌាផ្សេងគ្នា។ វាទទួលបានការចាប់អារម្មណ៍យ៉ាងខ្លាំងនៅក្នុងអំឡុងឆ្នាំ ២០២១ បន្ទាប់ពីរដ្ឋមន្ត្រីរដ្ឋាភិបាលជាច្រើនបានគាំទ្រKoo ចំពេលមានជម្លោះរវាងរដ្ឋាភិបាលឥណ្ឌា និងបណ្តាញសង្គម X ដែលពីមុនត្រូវបានគេស្គាល់ថាជាTwitter។
ជម្លោះបានចាប់ផ្តើមនៅពេលដែលរដ្ឋាភិបាលរបស់លោកនាយករដ្ឋមន្រ្តី NarendraModi បានស្នើសុំឱ្យក្រុមហ៊ុនបណ្តាញសង្គម X ដែលមានមូលដ្ឋាននៅសហរដ្ឋអាមេរិក ទប់ស្កាត់គណនីដែលខ្លួនបានអះអាងថាកំពុងផ្សព្វផ្សាយព័ត៌មានក្លែងក្លាយ។
បញ្ជីឈ្មោះនោះរួមមាន អ្នកកាសែត អង្គការព័ត៌មាននិងអ្នកនយោបាយប្រឆាំង។ ដំបូង X បានធ្វើតាមសំណើនាយករដ្ឋមន្ត្រីModi ប៉ុន្តែក្រោយមកបានស្ដារគណនីទាំងនោះឡើងវិញដោយលើកឡើងថា «ហេតុផលមិនគ្រប់គ្រាន់» ក្នុងការបិទគណនីខាងលើ។ ការប្រឈមមុខដាក់គ្នាកាន់តែខ្លាំងឡើងនៅពេលដែលរដ្ឋាភិបាលបានគំរាមចាត់វិធានការផ្លូវច្បាប់ប្រឆាំងនឹងបុគ្គលិករបស់ X នៅក្នុងប្រទេសឥណ្ឌា។
ក្នុងអំឡុងពេលនោះអ្នកគាំទ្រជាច្រើន គណៈរដ្ឋមន្ត្រីនិងមន្ត្រីមកពីគណបក្ស Bharatiya Janata (BJP) របស់ Modi បានប្តូរការប្រើប្រាស់ទៅកាន់បណ្តាញសង្គម Koo ដោយជំរុញឱ្យX ត្រូវបានហាមឃាត់នៅក្នុងប្រទេសឥណ្ឌា។ នៅចុងឆ្នាំ ២០២១កម្មវិធីនេះបានឈានដល់ការទាញយក ២០ លានដងនៅក្នុងប្រទេស។
ថ្វីបើពេលចាប់ផ្តើមមានការជោគជ័យក៏ដោយ ក៏ Koo នៅតែមានការលំបាកក្នុងការទទួលបានមូលនិធិក្នុងរយៈពេលប៉ុន្មានឆ្នាំចុងក្រោយនេះ។ កាលពីថ្ងៃពុធ ស្ថាបនិក Aprameya Radhakrishna និង MayankBidawatka បានបង្ហាញថា Koo នៅសល់ «តែប៉ុន្មានខែទៀត»ដើម្បីផ្តួលបណ្តាញសង្គម X នៅក្នុងប្រទេសឥណ្ឌាក្នុងឆ្នាំ ២០២២ប៉ុន្តែ «ដំណាក់កាលយឺតយូរនៃមូលនិធិវិនិយោគ» បានបង្ខំឱ្យពួកគេកាត់បន្ថយមហិច្ឆតារបស់ពួកគេ។
ពួកគេបានសរសេរនៅលើបណ្ដាញសង្គម LinkedIn ថា៖ «យើងបានស្វែងរកភាពជាដៃគូជាមួយក្រុមហ៊ុនអ៊ីនធឺណេតធំៗក្រុមហ៊ុនសាជីវកម្ម និងប្រព័ន្ធផ្សព្វផ្សាយ ប៉ុន្តែការពិភាក្សាទាំងនេះមិនទទួលបានលទ្ធផលដែលយើងចង់បាននោះទេ។ ពួកគេភាគច្រើនមិនចង់ផ្សងគ្រោះថ្នាក់ជាមួយក្រុមហ៊ុនប្រព័ន្ធផ្សព្វផ្សាយសង្គម ដែលមានមាតិកាបង្កើតដោយអ្នកប្រើប្រាស់នោះទេ»។
កាលពីខែកុម្ភៈគេហទំព័រព័ត៌មានរបស់ប្រទេសឥណ្ឌាបានរាយការណ៍ថា Koo កំពុងស្ថិតក្នុងការចរចាទិញពីសារព័ត៌មាន Dailyhunt ប៉ុន្តែការចរចានោះមិនបានជោគជ័យ។
នៅក្នុងខែមេសា ឆ្នាំ ២០២៣ បណ្ដាញសង្គម Koo បានបញ្ឈប់បុគ្គលិកចំនួន ៣០% នៃកម្លាំងពលកម្ម ដែលមានសមាជិកចំនួន២៦០ នាក់ ខណៈដែលក្រុមហ៊ុនបានប្រឈមមុខនឹងបញ្ហាហិរញ្ញវត្ថុធ្ងន់ធ្ងរ។
ស្ថាបនិក Koo បានបង្ហាញពីបំណងចង់រក្សាកម្មវិធីឱ្យដំណើរការប៉ុន្តែតម្លៃខ្ពស់នៃសេវាកម្មបច្ចេកវិទ្យាបានធ្វើឱ្យពួកគេមិនអាចទ្រាំទ្របានដែលនាំឱ្យមានការសម្រេចចិត្តដ៏លំបាកក្នុងការបិទនេះ៕
.jpg)
