ត្រសក់ ឬតាសក់ គឺជាបន្លែពិសេសមួយប្រភេទ ដែលយើងអាចទទួលទានបានទាំងឆៅ និងឆ្អិន ជាពិសេស ត្រសក់ក៏អាចយកមកប្រើប្រាស់ធ្វើជាម៉ាសបិតមុខសម្រាប់ថែរក្សាស្បែកបានយ៉ាងមានប្រសិទ្ធភាពដែលជួយឱ្យស្បែកមុខស្រស់ថ្លា កាត់បន្ថយការរលាកពីកំដៅថ្ងៃ និងផ្តល់សំណើមដល់ស្រទាប់ស្បែកបានយ៉ាងល្អ។
ក្នុងអត្ថបទនេះក្រុមការងារសារព័ត៌មាន SR News នឹងលើកយកវិធីសាស្ត្រធ្វើម៉ាសបិតមុខដែលផ្សំពីត្រសក់តាមបែបធម្មជាតិមកបង្ហាញដូចខាងក្រោម៖
១គ្រឿងផ្សំ
- ត្រសក់ ១ ផ្លែ(ចិតសំបក និងយកគ្រាប់ចេញ)
- ទឹកឃ្មុំ ១ស្លាបព្រាបាយ (សម្រាប់ស្បែកស្ងួត ឬស្បែកធម្មតា)
- ទឹកក្រូចឆ្មា(សម្រាប់ស្បែកប្រេង)
២វិធីធ្វើ
- ត្រសក់:លាងសម្អាតត្រសក់ ចិតសំបក និងយកគ្រាប់ចេញ រួចហើយកាត់ជាដុំតូចៗរួចយកទៅកិនឱ្យម៉ត់សព្វល្អ ។
- លាយគ្រឿងផ្សំៈប្រសិនបើអ្នកមានស្បែកស្ងួត ឬធម្មតា, លាយត្រសក់ដែលកិនហើយជាមួយនឹងទឹកឃ្មុំ ១ ស្លាបព្រាបាយ តែប្រសិនបើអ្នកមានស្បែកប្រេង , លាយត្រសក់នឹងទឹកក្រូចឆ្មារ ១ ស្លាបព្រាបាយ។
៣វិធីប្រើ
- យកម៉ាសដែលបានលាយហើយមកលាបលើផ្ទៃមុខជាស្រទាប់ស្មើៗ រួចទុកវាចោលរយៈពេលប្រហែល ១៥-២០ នាទីបន្ទាប់មកលាងទឹកចេញ ជាមួយនិងទឹកត្រជាក់ ឬទឹកក្តៅឧណ្ហៗជាការស្រេច។ បន្ទាប់ពីលាងម៉ាសចេញ អ្នកអាចលាបគ្រីមផ្តល់សំណើមបន្ថែមសម្រាប់ជួយឱ្យស្បែកទន់រលោង និងស្រស់ស្រាយ។
ការធ្វើម៉ាសត្រសក់បិតមុខជាប្រចាំ អាចជួយឱ្យមុខសស្អាតភ្លឺរលោងហើយផ្ដល់សំណើម ដល់ស្បែកបានយ៉ាងល្អ និង ក្មេងជាងវ័យ៕
.jpg)
