ភ្នំពេញ៖ បច្ចេកវិទ្យាបញ្ញាសិប្បនិម្មិត ឬ AI ដែលត្រូវបានអភិវឌ្ឍមកប្រមាណ៥០ឆ្នាំមកហើយនោះ ត្រូវបានបែកចែកជា ៣ កម្រិត គឺ Narrow AI, General AI, and Super AI។
ថ្លែងនៅក្នុងសិក្ខាសាលាពិគ្រោះយោបល់ស្តីពី«មគ្គទេសក៍បន្ថែមរបស់អាស៊ានស្តីពីអភិបាលកិច្ចនិងសីលធម៌បញ្ញាសិប្បនិម្មិត សម្រាប់បញ្ញាសិប្បនិម្មិតបង្កើតមាតិកា»បានប្រមូលផ្តុំតំណាងមកពីប្រទេសអាស៊ានទាំង ១០ កាលពីថ្ងៃទី ១៧ តុលា លោក សំ សិទ្ធិសេរី អគ្គនាយកនៃអគ្គនាយកដ្ឋានបច្ចេកវិទ្យាទូរគមនាគមន៍និងព័ត៌មាន នៃក្រសួងប្រៃសណីយ៍និងទូរគមនាគមន៍បានលើកឡើងពីកម្រិតបញ្ញារបស់ AI នេះ។
លោកបានពន្យល់ថា៖«AI កម្រិតទាប ឬ Narrow AI មានន័យថាវាឆ្លាតលើរបស់មួយប៉ុណ្ណោះ ដែលយើងបង្រៀនវា។ AI កម្រិតឆ្លាតដូចមនុស្សឬ General AI មានសមត្ថភាពដូចមនុស្សដែលអាចសិក្សាពីបរិស្ថានជុំវិញ និងបង្កើតជាចំណេះដឹងខ្លួនឯង។វាអាចបង្កជាហានិភ័យច្រើន។ មួយទៀតគឺ Super AIដែលសមត្ថភាពវាឆ្លាតលើសមនុស្ស។ ការអភិវឌ្ឍ AI បច្ចុប្បន្នមានកម្រិតទាប តែជិតដល់កម្រិតដូចមនុស្សហើយ ដែលអាចដល់ឆ្នាំ២០៣០ ឬ ២០៥០»។
លោក ខូវ មករារដ្ឋលេខាធិការក្រសួងប្រៃសណីយ៍ និងទូរគមនាគមន៍ (MPTC) បានលើកឡើងថាបញ្ញាសិប្បនិម្មិតមិនមែនជារឿងថ្មីទេ។ ប៉ុន្តែពិភពលោកកំពុងបង្វែរការយកចិត្តទុកដាក់របស់ខ្លួនទៅកាន់ AI ជំនាន់ថ្មី ជាពិសេសជាមួយនឹងការកើនឡើងនៃបច្ចេកវិទ្យា ដូចជា ChatGPT ដែលបានឈានដល់អ្នកប្រើប្រាស់ ១០០លាននាក់ក្នុងរយៈពេលត្រឹមតែពីរខែនៃការចេញផ្សាយរបស់វានៅក្នុងខែកញ្ញាឆ្នាំ ២០២២។
លោកបានលើកឡើងពីការសិក្សាមួយរបស់ McKinsey ដែលព្យាករណ៍ថាការសិក្សារបស់ McKinsey ថា Generative AI អាចចាក់បញ្ចូល ២,៦-៤,៤ ទ្រីលានដុល្លារក្នុងសេដ្ឋកិច្ចពិភពលោកក្នុងមួយឆ្នាំៗ ត្រឹមឆ្នាំ២០៤០ ខណៈការសិក្សារបស់ Kearney បានបង្ហាញថា AI អាចឱ្យ GDP បណ្តាប្រទេសអាស៊ានកើន ក្នុងចន្លោះពី១០ ទៅ១៨ភាគរយត្រឹមឆ្នាំ២០៣០។
លោកបានគូសបញ្ជាក់ពីការទទួលយកយ៉ាងឆាប់រហ័សនៃគំរូភាសាធំ (LLMs) និងAI បង្កើតពហុម៉ូឌុល ដែលប្រើ «prompts» ជាមធ្យមប្រើប្រាស់ (សរសេរការណែនាំចេញ អត្ថបទ រូបភាព សំឡេង វីដេអូនិងកូដ)។
ក្រុមហ៊ុនធំៗ និងពិភពលោកចាប់ផ្តើមវិនិយោគ និង «ប្រណាំង» គ្នា ដើម្បីការពារនិងបង្កើនសមត្ថភាពប្រកួតប្រជែងផ្នែកសេដ្ឋកិច្ច និងនយោបាយ។
យ៉ាងណាមិញអាស៊ានទាំង ១០ ប្រទេសបានឯកភាពបង្កើតក្រុមការងារអភិបាលកិច្ចបញ្ញាសិប្បនិម្មិតមួយហើយក្រុមការងារនេះ បានរៀបចំសេចក្តីព្រាងមគ្គទេសក៍នេះ ដើម្បីតម្រែតម្រង់ការរចនាការអភិវឌ្ឍនិងការដាក់ឱ្យប្រើបញ្ញាសិប្បនិម្មិតបង្កើតមាតិកានៅអាស៊ានឱ្យមានសីលធម៌និងការទទួលខុសត្រូវ។
លោកសិទ្ធិសេរី បានឱ្យដឹងថា៖ «យើងបានឯកភាពគ្នាដាក់ពិគ្រោះយោបល់តាមប្រទេសរៀងៗខ្លួនដូច្នេះ ៩ប្រទេសផ្សេងៗទៀត ក៏ពិគ្រោះយោបល់ជាមួយភាគីពាក់ព័ន្ធរបស់គេដែរ»។
កម្ពុជារៀបចំសិក្ខាសាលាពិគ្រោះយោបល់ស្តីពី«មគ្គទេសក៍បន្ថែមរបស់អាស៊ានស្តីពីអភិបាលកិច្ចនិងសីលធម៌បញ្ញាសិប្បនិម្មិត សម្រាប់បញ្ញាសិប្បនិម្មិតបង្កើតមាតិកា» បានប្រមូលផ្តុំតំណាងមកពីប្រទេសអាស៊ានទាំង១០។
ប្រទេសកម្ពុជាតាមរយៈ MPTC តំណាងឱ្យប្រទេសនៅក្នុងគំនិតផ្តួចផ្តើមក្នុងតំបន់នេះក្នុងគោលបំណងដោះស្រាយបញ្ហាប្រឈមខាងសីលធម៌ និងអភិបាលកិច្ចដែលបង្កឡើងដោយបច្ចេកវិទ្យា AI។
លោក សំ សិទ្ធិសេរីអគ្គនាយកនៃអគ្គនាយកដ្ឋានបច្ចេកវិទ្យាទូរគមនាគមន៍ និងព័ត៌មាននៃក្រសួងប្រៃសណីយ៍ និងទូរគមនាគមន៍ផ្ដល់បទសម្ភាសជាមួយអ្នកសារព័ត៌មានក្រោយបញ្ចប់សិក្ខាសាលា។
.png)
.jpg)
