ភ្នំពេញ៖ ក្រុម E2stem Digitech Golden Girls បានទទួលជ័យលាភីប្រចាំតំបន់អាស៊ីក្នុងការប្រកួត Technovation Global។ ជ័យលាភីមួយនេះមិនត្រឹមតែបង្ហាញពីគុណភាពសិក្សារបស់ពួកគេប៉ុណ្ណោះទេប៉ុន្តែវាបានជះឥទ្ធិពលវិជ្ជមានយ៉ាងខ្លាំងដល់ការអប់រំរបស់កុមារីទូទាំងប្រទេសកម្ពុជាទៀតផង។
ផ្តើមពីការចូលចិត្តនិងមានចំណាប់អារម្មណ៍ខ្លាំងលើបច្ចេកវិទ្យា ស្ថិតក្នុងវ័យត្រឹមតែ ១២ឆ្នាំ កុមារី វឌ្ឍនៈ សូនីតា, វឌ្ឍនៈ សិរីរចនា, វង់ជន់ ភីមផ្កាន, និង ឌុចចាន់បញ្ញាដេត បានរួមគ្នាបង្កើតក្រុម E2stem Digitech Golden Girls នេះឡើងតាមរយៈកម្មវិធី E2STEM Digitech Technovation Club ។
E2stem Digitech Golden Girls ជាបេក្ខភាពមកពីរាជធានីភ្នំពេញ បានបង្កើតកម្មវិធីមួយឈ្មោះថា “G-Power” ដើម្បីដាក់ចូលប្រកួតប្រជែងក្នុងកម្មវិធី Technovation Global។ កម្មវិធី “G-Power”ជាកម្មវិធីមួយដែលផ្តោតគោលដៅសំខាន់ទៅលើក្មេងស្រីដែលមានអាយុពី៦ ទៅ ១២ ឆ្នាំ និងឳពុកម្តាយរបស់ក្មេងៗ។ មុខងាពិសេសរបស់កម្មវិធី “G-Power”គឺផ្តល់មេរៀន និងកម្រង សំនួរស្តីពីសមភាពយេនឌ័រក្នុងការអប់រំដោយខ្លឹមសារមេរៀននីមួយៗបានមកពីអង្គការ CARE INTERNATIONAL និង UNICEF ក្នុងគោលបំណងបំផុសគំនិតកុមារីឱ្យចាប់ផ្តើមឬបន្តការសិក្សារបស់ពួកគេ ដោយបង្ហាញអំពីអត្ថប្រយោជន៍ដែលទទួលបានពីការអប់រំ។
E2stem Digitech Golden Girls បានប្រាប់ឱ្យសារព័ត៌មាន អេសអ័រ (SR) ដឹងបន្ថែមទៀតថាមូលហេតុចម្បងដែលធ្វើអោយក្រុមបង្កើតកម្មវិធី“G-Power” នេះឡើង គឺដោយសារមើលឃើញពីតថភាពនៅក្នុងសង្គមយើងរាល់ថ្ងៃដោយផ្អែកលើភាពក្រីក្រ តួនាទីយេនឌ័រ ប្រពៃណី និងពលកម្មកុមារគឺជាបញ្ហាប្រឈមសម្រាប់ក្មេងស្រី ក្នុងការចុះឈ្មោះចូលរៀននៅសាលា។ មិនត្រឹមតែប៉ុននេះ ក្រុម E2stem Digitech Golden ក៏បានធ្វើការសិក្សាស្រាវជ្រាវពីរបាយការណ៍របស់អង្គការយូណេស្កូ និងយូនីសេហ្វថ្មីៗនេះ ដោយរកឃើញថាក្មេងស្រីមួយចំនួនធំ បានបោះបង់ការសិក្សាថ្នាក់ឧត្តមសិក្សាបន្ទាប់ពីជំងឺរាតត្បាត Covid-19។ ដូច្នេះការបង្កើតកម្មវិធី “G-Power” នេះឡើង គឺពិតជាអាចជួយលើកកម្ពស់ការយល់ដឹងអំពីវិសមភាពយេនឌ័រក្នុងការអប់រំ ឱ្យមានតម្លាភាពសម្រាប់ក្មេងស្រី និងក្មេងប្រុស ។
«ក្រុមរបស់យើងមានឯកសិទ្ធិក្នុងការមានគ្រួសារដែលមានការគាំទ្រដែលអនុញ្ញាតឱ្យយើងសិក្សានៅសាលាល្អប៉ុន្តែយើងឆ្ងល់ថាតើក្មេងស្រីផ្សេងទៀតដែលមិនមានការគាំទ្រដូចយើងធ្វើយ៉ាងណា?» នេះគឺជាអ្វីដែលក្មេងស្រីទាំងបួនមានចម្ងល់និងចង្យ់មានតម្លាភាព ផ្តល់ការអប់រំស្មើគ្នាសម្រាប់ក្មេងស្រីនិងក្មេងប្រុស។
បន្ថែមពីនេះទៀតក្រុម E2stem Digitech Golden បានលើកឡើងថា «បើគ្មានការអប់រំមនុស្សភាគច្រើនក៏មិនអាចរស់នៅមានសុខភាពល្អ និងមានសុភមង្គលដែរបាន»។
ដោយផ្តោតលើគោលបំណងនេះសមិទ្ធិផលរបស់ក្រុមមិនត្រឹមតែឆ្លុះបញ្ចាំងពីបេសកកម្មរបស់ Technovation
ក្នុងការប្រើបច្ចេកវិទ្យាដើម្បីប្រយោជន៍សង្គមប៉ុណ្ណោះទេប៉ុន្តែថែមទាំងជំរុញទឹកចិត្តអ្នកដទៃឱ្យបន្តអនុវត្តគំនិតផ្តួចផ្តើមប្រកបដោយប្រសិទ្ធភាពធ្វើឱ្យមានតម្លាភាពក្នុងវិស័យអប់រំ។
ក្រោមការបង្ហាត់បង្រៀនរបស់អ្នកស្រី Karla នៅ E2STEM Digitech អ្នកស្រីមានមោទនភាពយ៉ាងខ្លាំងចំពោះពួកគេ ដោយពោលពាក្យសរសើរយ៉ាងពេញចិត្តថា “E2STEMDigitech គឺជាធនធានដ៏មានតម្លៃដែលផ្តល់អំណាចដល់ពួកគេ ជាមួយនឹងជំនាញដែលត្រូវការដើម្បីឈ្នះរង្វាន់ប្រចាំតំបន់អាស៊ី”។
ងាកមកមើលពីការបង្កើតកម្មវិធីឯនេះវិញ“G-Power” គឺជាកម្មវិធី Android ដែលយើងអាចទាញយកមកប្រើប្រាស់បានដោយមិនចាំបាច់ភ្ជាប់អ៊ីនធឺណិតដោយមុខងារនេះមានសារៈសំខាន់ សម្រាប់អ្នកប្រើប្រាស់នៅក្នុងតំបន់ដែលមានការតភ្ជាប់អ៊ីនធឺណិតមានកម្រិត។
ក្នុងការបង្កើតកម្មវិធីនេះឡើងវាមិនមែនងាយស្រួលនោះទេគឺវាមានបញ្ហាប្រឈមជាច្រើន ដោយ Golden Girls ត្រូវរៀនសរសេរកូដដោះស្រាយបញ្ហា និងធ្វើការងារជាក្រុម ហើយត្រូវបែងចែក ពេលវេលាជាមួយកិច្ចការសាលារបស់ពួកគេផងដែរ។ ពួកគេបានចំណាយពេលរាប់មិនអស់ក្នុងការស្រាវជ្រាវនិងរចនាកម្មវិធីនេះឡើង ដោយធានាថាវានឹងងាយស្រួលប្រើនិងអាចចូលប្រើបានសម្រាប់អ្នកប្រើប្រាស់ដែលជាគោលដៅរបស់ពួកគេដែលស្ថិតក្នុងវ័យក្មេងៗ។ ការលះបង់របស់ពួកគេបានទទួលមកវិញនៅភាពជោគជ័យនៅពេលដែលពួកគេបានឈ្នះក្នុងការប្រកួតប្រជែង Technovation Global ដែលបង្ហាញពីកិត្យានុភាពដែលពួកគេច្នៃប្រឌិតបច្ចេកវិទ្យាដែលបម្រើជាប្រយោជន៍ដល់សង្គមជាតិជាពិសេសក្នុងវិស័យអប់រំ។
ក្រុម Golden Girls គ្រោងនឹងវាស់ស្ទង់ភាពជោគជ័យរបស់ “G-Power” ដោយប្រមូលទិន្នន័យ ស្តីពីការចូលរួមរបស់អ្នកប្រើប្រាស់និងលទ្ធផលអប់រំ ដើម្បីតាមដានវឌ្ឍនភាព និងបន្តកែលម្អកម្មវិធីនេះបន្តទៀត។អ្វីដែលកាន់តែពិសេស ក្រុមនេះក៏មានគ្រោងបង្កើតកំណែ iOS ដែលអាចមាននៅលើ Apple Store បានផងដែរ។បន្ទាប់ពីបានឈ្នះពានរង្វាន់ប្រចាំតំបន់អាស៊ីក្រុម Golden Girls មានគម្រោងបន្តពង្រឹងជំនាញជសរសេរកូដរបស់ពួកគេ ដោយវិនិយោគលើការអប់រំទទួលយកវគ្គសិក្សាក្នុងការអភិវឌ្ឍន៍កម្មវិធី ការរចនាគេហទំព័រនិងការវិភាគទិន្នន័យ ដើម្បីធានាបាននូវគុណភាពនៃខ្លឹមសារដែលបានបោះពុម្ពផ្សាយ។ហើយក្រុមការងារក៏មានបំណងសហការជាមួយអង្គការយូនីសេហ្វ ក្រសួងអប់រំ យុវជននិងកីឡា (MoEYS) និងក្រសួងកិច្ចការនារី (MoWA) ដើម្បីគាំទ្រដល់ “G-Power”នេះផងដែរ។
ចក្ខុវិស័យរបស់ពួកគេគឺទូលំទូលាយលើសពីការបង្កើត “G-Power” ដោយ Golden Girls ប្រាថ្នាចង់ឃើញកុមារទាំងអស់នៅក្នុងប្រទេសកម្ពុជាសម្រេចបាននូវស្តង់ដារសិក្សាខ្ពស់និងធានាបាននូវអនាគតដ៏ល្អប្រសើរ ដោយបាវចនារបស់ពួកគេគឺ"ការអប់រំសម្រាប់ទាំងអស់គ្នា យើងរួមគ្នាធ្វើវា"។
ជ័យលាភីរបស់ Golden Girls ជាមួយនិងកម្មវិធី “G-Power” បានក្លាយជាឧទាហរណ៍ដ៏ភ្លឺស្វាងដែលកុមារីដែលមានវ័យត្រឹមតែ១២ឆ្នាំហ៊ានជំរុញចំណង់ចំណូលចិត្តរបស់ខ្លួនដោយបង្កើតកម្មវិធីដែលប្រើប្រាស់ដោយបច្ចេកវិទ្យាដើម្បីបង្កើតការផ្លាស់ប្តូរការគិតឱ្យតាមទាន់សង្គមនិងមានតម្លាភាពក្នុងការទទួលការអប់រំក្នុងពិភពលោក ។ជ័យលាភីរបស់ពួកគេពិតជាជម្រុញមនុស្សជំនាន់ក្រោយឱ្យបន្តនូវការផ្តួចផ្តើមគំនិតដែលមានឥទ្ធិពលនិងបង្កើតការផ្លាស់ប្តូរជាវិជ្ជមាននៅក្នុងសហគមន៍អោយកាន់តែរីកចំរើនក្នុងវិស័យអប់រំ៕
E2stem Digitech Golden GirlsG-Power Pitch Video
.jpg)
