មុនពិធីបុណ្យសែនព្រះខែចិននៅថ្ងៃទី ១៧ ខែកញ្ញា ឆ្នាំ ២០២៤ នេះនំសែនព្រះខែជាច្រើនប្រភេទត្រូវបានដាក់តាំងលក់មិនថា តាមស្ដង់ ចិញ្ចើមផ្លូវ ផ្សារម្ហូប ផ្សារទំនើប ហាងកាហ្វេ ហាងនំប៉័ងនិងសូម្បីតែតាមកម្មវិធីលក់អនឡាញយ៉ាងគគ្រឹកគគ្រេង ជាពិសេសសម្រាប់ខ្សែជាប់សែស្រឡាយចិន។
ទោះជាយ៉ាងក្ដី តម្លៃនំព្រះខែមួយប្រអប់ ដែលមានតែ៤នំនោះ យ៉ាងហោចណាស់ក៏ ម៉ឺនរៀលដែរ ខណៈដែលតម្លៃនេះអាចឡើងដល់ ៦០ ទៅជាង ១០០ដុល្លារក្នុងមួយប្រអប់អាស្រ័យទៅតាមគ្រឿងផ្សំនិងកិត្តិនាមហាងដែលផលិតនំនោះផងដែរ។
.jpeg)
នៅប្រទេសដែលមានប្រជាជនសែស្រឡាយចិន ដូចជានៅវៀតណាម ថៃ សិង្ហបុរីម៉ាឡេស៊ី ជាដើម នំសែនព្រះខែតម្លៃថ្លៃៗជាមួយការវេចខ្ចប់បែបប្រណីតត្រូវបានគេប្រើប្រាស់ជាអំណោយជូនសាច់ញាតិបងប្អូន ឬអ្នកមានមុខមាត់ធំដុំដើម្បីបង្កើតទំនាក់ទំនងអាជីវកម្មការងារជាដើម។
ប៉ុន្តែសម្រាប់ប្រជាជនខ្មែរមិនថាអ្នកជាប់សែស្រឡាយចិន ឬមិនជាប់នោះទេការធ្វើនំព្រះខែដើម្បីសែន និងជាអំណោយជូនញាតិ អាចជាការចំណាយដ៏ធ្ងន់មួយរហូតដល់គ្រួសារមួយចំនួនបានងារកមករកជម្រើសធ្វើនំព្រះខែដោយខ្លួនឯងតាមរយៈការមើលវីដេអូយូធូប ឬការរៀនតៗគ្នាពីអ្នកជំនាញធ្វើនំ។
ក្នុងចំណោមអ្នកដែលជ្រើសរើសធ្វើនំព្រះខែដោយខ្លួនឯងនោះ អ្នកស្រី លីម៉េងគីម ដែលជាកូនចៅចិនអាចនិយាយបានទាំងភាសាកុកងឺ ទាជីវ និងកាតាំង បានឱ្យដឹងថាអ្នកស្រីបានមើលវីដេអូយូធូប និងរៀនធ្វើតាមពីរបីដងរហូតទទួលបានលទ្ធផលនំព្រះខែជាទីគាប់ចិត្ត។
អ្នកស្រី ម៉េងគីម បានប្រាប់ SR News ថា៖ «ពីមុនខ្ញុំធូធារចេះតែទិញនំអស់រាប់រយដុល្លារចែកញាតិតែកាលពី ៤ឆ្នាំមុនពេលអត់ការងារធ្វើ កាលហ្នឹងកូវីដ អត់មានទេសចរណ៍ភ្នាក់ងារក៏ជម្រុះបុគ្គលិក ទើបខ្ញុំនៅផ្ទះ ទំនេរៗ ក៏សាកធ្វើនំព្រះខែតាមយូធូប»។
អ្នកស្រីបានបន្តថា៖ «ខ្ញុំទិញពុម្ពនំតាមថាវប៉ាវ អនឡាញ ហើយធ្វើដំបូងអត់ស្អាតទេតែលើកក្រោយៗយកជាការបាន។ ឥឡូវធ្វើជាងបីបួនឆ្នាំ ខ្ញុំជំនាញហើយអាចធ្វើបានទាំងស្នូលផ្អែម និងប្រៃ ហើយយើងទិញប្រអប់ច្នៃដាក់ ស្អាតមិនចាញ់គេលក់នៅហាងទេ»។
ដូចគ្នានេះដែរ សិស្សវគ្គរៀនដុតនំ ស៊ុ សុធាវី បានលើកឡើងថា ការធ្វើនំព្រះខែដោយខ្លួនឯងអាចសន្សំសំចៃថវិកាច្រើនណាស់។
.jpeg)
កញ្ញា សុធាវី បាននិយាយថា៖ «អ៊ីចឹងចំណេញច្រើនណាស់ ដោយសារយើងទិញគេ មួយឈុតវាមាន៤ នំ ទូទៅតម្លៃ ២០ដុល្លារ អាហ្នឹងខ្ញុំទិញញ៉ាំ ហើយផេកដែលខ្ញុំទិញស្នូលនំ គេលក់ ៤នំ ១៨ ដុល្លារ និយាយទៅតម្លៃពី ១៨ ទៅ ២០ដុល្លារក្នុងមួយប្រអប់»។
កញ្ញាបានរៀបរាប់ពីការចំណាយទៀតថា៖ «ចាសបង ខ្ញុំធ្វើហ្នឹងចំណេញច្រើននិយាយទៅស្នូលខ្ញុំទិញអត់អស់ ២៥ ដុល្លារទេ និងម្សៅហ្នឹងខ្ញុំធ្វើនំពុម្ព១៥០ បានចំនួន ២០នំ ហើយនិយាយទៅទាំងពងមាន់ ទាំងស្នូល ទាំងពងទាប្រៃ ប្រអប់ដាក់នំ២ដុល្លារ ថាអស់មិនដល់ ២៥ដុល្លារ ទេ ហើយសល់ស្នូលនំ ៧០០ក្រាមទៀត»។
សិស្សធ្វើនំរូបនេះ ក៏បានបញ្ជាក់ផងដែរថាប្រសិនបើពុំទិញស្នូលនំស្រាប់ពីហាងអនឡាញទេ អ្នកធ្វើនំរឹតតែសន្សំសំចៃថវិកាច្រើនសន្ធឹក។
កញ្ញា សុធាវី បានលើកករណីមិត្តរួមថ្នាក់ម្នាក់ដែលធ្វើស្នូលនំដោយខ្លួនឯងថា៖«គាត់ធ្វើស្នូលខ្លួនឯង អស់ប្រហែល ៣០ដុល្លារ ហើយគាត់អាចធ្វើនំបានរហូត ៦៤នំហើយសុទ្ធតែពុម្ព ១៥០»៕
.jpeg)
.jpg)
