កំពត: ផ្លែដូងជាច្រើនរយពាន់ផ្លែ ត្រូវបានសិប្បកម្មរបស់ លោក ឆាយ ស៊ីនឿនប្រមូលទិញ យកមកចម្រាញ់ និងផលិតចេញជាប្រេងដូងធម្មជាតិ ដែលមានគុណភាពខ្ពស់កបនឹងជំងឺច្រើនមុខ ថែមទាំងជួយថែរក្សាសម្ផស្សបានទៀតផង។
លោក ឆាយ ស៊ីនឿនអ្នកគ្រប់គ្រងទូទៅនៃសិប្បកម្មផលិតប្រេងដូងធម្មជាតិ បានឱ្យដឹងពីមូលហេតុនៃការផលិតប្រេងដូងនេះថា ដោយមើលឃើញថាខេត្តកំពត គឺជាខេត្តមួយមានសក្ដានុពលខ្ពស់លើដំណាំដូង ដែលមានទាំងការដាំនៅតាមចម្ការនិងដាំតាមភូមឋានផងនោះ ដូច្នេះហើយនៅឆ្នាំ ២០១៤ លោកក៏សម្រេចជ្រើសរើសទីតាំងស្រុកឈូកសម្រាប់ផលិតប្រេងដូង។
លោក ស៊ីនឿន បានឱ្យដឹងទៀតថាបច្ចុប្បន្ននេះ សិប្បកម្មរបស់លោកទទួលទិញផ្លែដូងពីប្រជាពលរដ្ឋក្នុងតម្លៃ២ម៉ឺនរៀល ទៅ ២ម៉ឺន៥ពាន់រៀលក្នុង១ឡូហើយក្នុងមួយថ្ងៃ លោកអាច ប្រមូលទិញផ្លែដូងបានចន្លោះពី ៥០ ទៅ ១០០ឡូដើម្បីយកមកផលិតជាប្រេងដូង។
ចំពោះដំណើរការនៃការផលិតអ្នកគ្រប់គ្រងទូទៅនៃសិប្បកម្មផលិតប្រេងដូងធម្មជាតិបញ្ជាក់យ៉ាងដូច្នេះថា៖ «យើងត្រូវជ្រើសរើសដូងណាដែលទុំល្អមិនមានការដុះពន្លក ហើយយកវា មកសកសម្បកឲ្យស្អាត រួចយកទៅពុះចាក់ទឹកចេញទើបយកវាទៅកោសយកសាច់ និងច្របាច់ វាយកខ្ទិះ ពេលរួចអស់ហើយយើងត្រូវយកវាទៅរក្សាទុកនៅក្នុងបន្ទប់មួយ ដែលមានសីតុណ្ហភាពក្ដៅល្មមរយៈពេល ២០ម៉ោង ទើបយកទៅចម្រាញ់ដោយវិធីត្រជាក់មិនមានប្រើប្រាស់សារធាតុគីមី ទេដែលអាចរក្សាទុកបានយូរឆ្នាំ»។
នៅក្នុងរយៈពេលមួយថ្ងៃ សិប្បកម្មនេះអាចផលិតប្រេងដូង បានប្រមាណ១០០លីត្រ ហើយប្រេងដូងធម្មជាតិនេះមានចំនួន២ប្រភេទ គឺដបតូចចំណុះ ២៥០ មីលីលីត្រ មានតម្លៃ ៣៦០០០ រៀលនិងដបធំចំណុះ ៥០០ មីលីលីត្រ មានតម្លៃ ៥៦០០០រៀល។
ទាក់ទងនឹងប្រសិទ្ធភាពរបស់ប្រេងដូងធម្មជាតិនេះលោក ស៊ីនឿន បញ្ជាក់ប្រាប់សារព័ត៌មាន SR ថា៖ «ប្រេងដូងអាចព្យាបាលអាការៈរលាកលំពែងជំងឺវង្វេងវង្វាន់ ធ្វើឲ្យសុខភាពឆ្អឹងប្រសើរ ជួយដល់ប្រព័ន្ធរំលាយអាហារ សម្រួលសរសៃឈាមក្នុងបេះដូងដុតខ្លាញ់អាក្រក់ ការពារជំងឺ ដែលប៉ះពាល់ដល់ថ្លើម តម្រងនោមសម្បូរជាតិអាស៊ីត Lauricដែលជួយ រក្សាជាតិស្ករក្នុងឈាម និងកូលេស្តេរ៉ុលហើយខាងផ្នែកវិទ្យាសាស្ត្រគេរកឃើញថា វាអាចប្រឆាំង វីរុស បាក់តេរី ការរលាកនិង អុកស៊ីតកម្មបានផងដែរ»។
មិនត្រឹមតែជួយដល់ផ្នែកសុខភាពរាងកាយប៉ុណ្ណោះទេប្រេងដូងនេះ ក៏អាចជួយថែរក្សា សម្ផស្សផងដែរ តួយ៉ាងផ្នែកមុខ និងដងខ្លួនស្ត្រីអាចប្រើប្រាស់ប្រេងដូងរៀងរាល់ថ្ងៃលើផ្ទៃមុខ ដោយប្រើជាសេរ៉ូមនិងសម្អាតផ្ទៃមុខ ដើម្បីផ្ដល់សំណើមការពារភាពជ្រីវជ្រួញ ស្នាមអាចម៍រុយនិងលាបលើស្បែក បំបាត់សង្វារ ដោយប្រើពេលយប់គឺល្អបំផុត។
ចំណែកផ្នែកសក់អ្នកអាចប្រើសម្រាប់លាបលើសក់ពីរ ឬបីដងក្នុងមួយសប្ដាហ៍ដែលធ្វើឲ្យសក់ទន់ រលោងមានទម្ងន់ កាត់បន្ថយសក់ជ្រុះ ទងសក់និងធ្វើឱ្យសក់លូតលាស់លឿន។ ក្រៅពីនេះ ប្រេងដូង ក៏អាចយកមកចម្អិនម្ហូបអាហារបានដែលនឹងផ្តល់នូវឱជារស ឈ្ងុយឆ្ងាញ់ និងធ្វើឱ្យអ្នកបរិភោគមានសុខភាពល្អ។
លោក ឆាយ ស៊ីនឿន បានឱ្យដឹងទៀតថាក្រៅពីផលិតប្រេងដូង សិប្បកម្មរបស់លោកក៏មានផលិត ជាសាប៊ូប្រេងដូងនិងសាប៊ូប្រេងដូងល្មៀតផងដែរ ដែលមានអត្ថប្រយោជន៍ជួយជម្រុះកោសិកា ចាស់និងបណ្តុះនូវកោសិកាថ្មី។
សិប្បកម្មផលិតប្រេងដូងធម្មជាតិមានទីតាំងស្ថិតនៅភូមិដំណាក់ទ្រព្យខាងត្បូង ឃុំក្រាំងស្នាយ ស្រុកឈូកខេត្តកំពត ឬទំនាក់ទំនងគេហទំព័រ The Coconut-ប្រេងដូងធម្មជាតិ
និង លេខទូរសព្ទ ០១១ ២៦៥ ៧៣៥៕
.jpg)
