សេអ៊ូល៖ ចំនួនតារាចម្រៀង K-pop ដែលសម្រេចចិត្តមិនបន្តកិច្ចសន្យាជាមួយភ្នាក់ងារធំៗ កាន់តែកើនឡើងដោយសារតែការរឹតត្បិតលើសេរីភាពនៃការបញ្ចេញមតិ និងការគ្រប់គ្រងហួសហេតុលើសេរីភាពនៃការផលិតតន្ត្រីរបស់ពួកគេ។
ប្រភពពីឧស្សាហកម្មកម្សាន្តបានសម្គាល់ពីការផ្លាស់ប្ដូរនៅក្នុងប្រព័ន្ធផ្សព្វផ្សាយនិងផលិតកម្មដែលបានផ្តល់សិទ្ធិអំណាចដល់តារាកូរ៉េខាងត្បូងក្នុងការអភិវឌ្ឍន៍ខ្លួនជាតារាចម្រៀងឯករាជ្យ ឬបង្កើតផលិតកម្មទ្រង់ទ្រាយតូចល្មមសម្រាប់ពួកគេ។
ជាមួយនឹងការកើនឡើងនៃបណ្តាញទំនាក់ទំនងសង្គម និងអ្នកផលិតមាតិកាឯករាជ្យ តារាចម្រៀងលែងពឹងផ្អែកលើទីភ្នាក់ងារធំៗដើម្បីជោគជ័យទៀតហើយ។
ទោះជាយ៉ាងណាក៏ដោយ ក្រុមហ៊ុនកម្សាន្តក្នុងស្រុកមានការខកចិត្តចំពោះតារាដែលបានចាកចេញពីទ្រនំដោយលើកឡើងពីការវិនិយោគជាច្រើនឆ្នាំក្នុងការដុសខាត់បង្វឹកសិល្បករទាំងនេះ។
កាលពីថ្ងៃទី ៣ ខែសីហា Soyeonនៃក្រុម(G)I-dle បានធ្វើឱ្យអ្នកគាំទ្រភ្ញាក់ផ្អើលក្នុងអំឡុងពេលច្រៀងទោលរបស់នាងនៅឯការប្រគុំតន្ត្រី Idol នៅ KSPO Dome ក្នុងទីក្រុងសេអ៊ូលនៅពេលដែលនាងបានផ្លាស់ប្តូរទំនុកច្រៀងថា «តើអ្នកណានឹងបញ្ឈប់ខ្ញុំ?» ដោយទំនងជាសំដៅលើការណែនាំអំពីជម្លោះដែលអាចកើតមានជាមួយភ្នាក់ងាររបស់នាងគឺ Cube Entertainment ។
ក្រោយមក ទីភ្នាក់ងារនេះបាននិយាយថា ខ្លួនមិនបានដឹងពីព័ត៌មានលម្អិតជាក់លាក់នៃការសម្តែងនោះទេប៉ុន្តែ Soyeon បានប្រឆាំងធ្វើឱ្យបញ្ហាកាន់តែស៊ីជម្រៅជាមួយក្រុមហ៊ុន។យ៉ាងណាមិញ ដើមចមពិតប្រាកដនៃជម្លោះរវាងភាគីទាំងពីរនៅមិនទាន់ច្បាស់នៅឡើយ។
ចាប់តាំងពីពេលនោះមក Cube Entertainment បានបញ្ជាក់ថា កិច្ចសន្យារបស់ Soyeon នឹងផុតកំណត់នៅក្នុងខែវិច្ឆិកា ហើយការពិភាក្សាអំពីការបន្តកុងត្រានៅស្រពេចស្រពិលនៅឡើយ។
អ្នកឃ្លាំមើលឧស្សាហកម្មតន្ត្រី Lim Hee-yun ចាត់ទុកនិន្នាការនេះថា ជាការផ្លាស់ប្តូរនៃសក្ដានុពលនៃអានុភាពរវាងភ្នាក់ងារគ្រប់គ្រងតារា K-pop និងតារាចម្រៀងផ្ទាល់តែម្ដង។
ការផ្លាស់ប្តូរប្រព័ន្ធផ្សព្វផ្សាយ វេទិកាបង្ហាញស្នាដៃ ទម្លាប់នៃការទស្សនាចម្រៀងនិងវិធីសាស្ត្រផលិតបានផ្លាស់ប្តូរផ្នត់គំនិតរបស់តារាចម្រៀង។
អ្នករិះគន់រូបនេះបាននិយាយនៅថ្ងៃទី ២៤ ខែកញ្ញាថា៖ «ជំនឿបានអូសបន្លាយយូរមកហើយដែលថាតារាចម្រៀងត្រូវការការគាំទ្រផ្នែកហិរញ្ញវត្ថុពីភ្នាក់ងារធំៗដើម្បីរក្សាសកម្មភាពជាប់លាប់ តែវាបានផ្លាស់ប្ដូរហើយនៅប៉ុន្មានឆ្នាំចុងក្រោយនេះ»។
សព្វថ្ងៃការធានាបានបទចម្រៀងល្អ គឺជាកត្តាសំខាន់បំផុត ហើយវាអាចសម្រេចបានតាមរយៈទីផ្សារឯករាជ្យដោយមិនពឹងផ្អែកលើភ្នាក់ងារធំៗ។
Joy សមាជិកក្រុម Red Velvet ក៏មានពាក្យចចាមអារ៉ាមថានាងមានការស្ទាក់ស្ទើរក្នុងការបន្តកុងត្រារបស់នាង ដែលជិតដល់ថ្ងៃផុតកំណត់ជាមួយ SM Entertainment ។
កាលពីខែមិថុនានាងបានបញ្ចេញជាសាធារណៈនូវការមិនពេញចិត្តរបស់នាងចំពោះក្រុមហ៊ុន ដោយធ្វើឱ្យមហាជនទស្សន៍ទាយពីអត្រាដែលនាងអាចចាកចោលទ្រនំ។
នៅពេលដែលអ្នកគាំទ្រម្នាក់បានសួរតាមអ៊ីនធឺណិតសម្រាប់គំនិតរបស់នាងចំពោះវីដេអូចម្រៀងថ្មីJoy បាននិយាយថា៖ «មែនហើយពួកគេ (SM Entertainment) មិនបានស្តាប់យោបល់ណាមួយ(Red Velvet) របស់យើងទេហើយគ្រាន់តែប្រាប់យើងឱ្យរង់ចាំ។ ខ្ញុំបានមើលវីដេអូចម្រៀង ហើយមិនមានអ្វីកែកុនតាមយោបល់របស់ពួកយើងជាតារាចម្រៀងទេ។ខ្ញុំមិនគួរនិយាយច្រើនទេ ដូច្នេះខ្ញុំនៅស្ងៀម»។
នៅថ្ងៃទី២៤ ខែកញ្ញា ផលិតកម្ម SM Entertainment បានបញ្ជាក់ថា ការពិភាក្សាបន្តកិច្ចសន្យាជាមួយ Joy កំពុងបន្ត ទោះបីជានាងត្រូវបានគេរាយការណ៍ថាកំពុងស្វែងរកឱកាសថ្មីៗជាមួយភ្នាក់ងារគ្រប់គ្រងផ្តោតលើការសម្ដែងក៏ដោយ។
មន្ត្រីបម្រើការក្នុងវិស័យឧស្សាហកម្មកម្សាន្តក្នុងស្រុកបាននិយាយថា៖«តាមទស្សនៈរបស់ក្រុមហ៊ុនវាជាការខកចិត្តដែលយើងបានវិនិយោគជាច្រើនឆ្នាំដើម្បីការរីកចម្រើនរបស់សិល្បករ។សព្វថ្ងៃនេះភ្នាក់ងារលែងដាក់ទិសដៅសិល្បៈតឹងរ៉ឹងដូចពេលមុនទៀតហើយ។ សិល្បករត្រូវបានអនុញ្ញាតឱ្យបន្តសកម្មភាពទាំងក្រុមនិងទោល ដូច្នេះវាមិនច្បាស់ទេថា ការរឹតបន្តឹងកម្រិតណាដែលពួកគេអះអាងថាបានជួបប្រទះនោះ»។
តារា K-pop ផ្សេងទៀតក៏បាននិយាយប្រឆាំងនឹងភ្នាក់ងាររបស់ពួកគេក្នុងប៉ុន្មានឆ្នាំថ្មីៗនេះផងដែរដោយអ្នកខ្លះថែមទាំងដាក់ពាក្យបណ្តឹងឬជ្រើសរើសមិនបន្តកិច្ចសន្យារបស់ពួកគេ។
ករណីគួរឱ្យកត់សម្គាល់រួមមាន Baekhyun, Chen និង Xiumin នៃក្រុម Exo ដែលបានដាក់ពាក្យប្តឹង SM Entertainment ក្នុងឆ្នាំ ២០២៣ជុំវិញការអះអាងពីភាពមិនយុត្តិធម៌ ជាពិសេសទាក់ទងនឹងការបែងចែកប្រាក់ចំណេញ។
នៅឆ្នាំ ២០២១ Wheein នៃក្រុម Mamamoo បានជ្រើសរើសមិនបន្តកិច្ចសន្យាផ្តាច់មុខរបស់នាងជាមួយRBW ទោះបីជានាងបានយល់ព្រមបន្តចូលរួមក្នុងសកម្មភាពក្រុមខណៈពេលដែលបន្តអាជីពទោលរបស់នាងក្រោមភ្នាក់ងារផ្សេងក៏ដោយ៕
ប្រភពព័ត៌មាន៖ The KoreaHerald/ Asia News Network
