ភ្នំពេញៈ ទិវាមច្ឆាជាតិ ០១ កក្កដា ២០២៤ គឺជាទិវាមួយដ៏សំខាន់ដែលប្រារព្ធធ្វើឡើងក្នុងគោលបំណងចូលរួមអភិរក្ស និងការពារជលផលកម្ពុជា។ នាឱកាសទិវានេះ ក្រុមពលរដ្ឋ និងអ្នកនិយមស្ទូចត្រី ក៏ស្នើឱ្យរួមគ្នាធ្វើការប្រលែងកូនត្រីនៅតាមព្រែកបឹង ស្ទឹង និងទន្លេផងដែរ។
លោក ចេង គុយឡាយ អ្នកធ្វើចម្ការនៅឃុំទឹកវិល ស្រុកស្អាង ខេត្តកណ្តាលបានឱ្យសារព័ត៌មាន SR Digital Media ដឹងថា «ទិវាមច្ឆាជាតិ» មានសារៈសំខាន់ចំនួន៣ចំណុច រួមមានទី១ ដើម្បីជាតិ ក្នុងនោះមានការស្ដារធនធានមច្ឆា និងជីវចម្រុះជាតិឡើងវិញ ទី២ ដើម្បីប្រជាពលរដ្ឋ ជាពិសេសអ្នកក្រីក្រ និងអ្នកនេសាទ ព្រោះពួកគាត់រស់ដោយសារការនេសាទត្រីចិញ្ចឹមជីវិត និងទី៣ ដើម្បីខ្លួនឯង ព្រោះការប្រលែងត្រីនេះ ជាការធ្វើបុណ្យ សន្សំកុសលសម្រាប់ជាតិខាងមុខ។
លោក គុយឡាយ បានបន្តថា៖
«ខ្ញុំប្រលែងត្រីមិនមែនតែក្នុងទិវាមច្ឆាទៀតប៉ុណ្ណោះទេ និយាយទៅមួយឆ្នាំ ខ្ញុំប្រលែងកូនត្រីបាន៤ ទៅ៥ដងដែរ ដោយកៀរគរមិត្តភក្តិទិញកូនត្រីប្រមាណ ១ ម៉ឺនក្បាល មានដូចជា ត្រីក្រាញ់ ត្រីអណ្ដែង ត្រីឆ្តោរត្រីប្រា យកទៅប្រលែងនៅទន្លេបាសាក់»។
ទន្ទឹមនឹងនេះ លោក ក៏ស្នើឱ្យប្រជាពលរដ្ឋទូទាំងប្រទេសរួមគ្នាការពារ អភិរក្ស និងលែងកូនត្រីទាំងអស់គ្នា ដើម្បីស្ដារធនធានមច្ឆាជាតិរបស់កម្ពុជា ឱ្យមានចំនួនច្រើនឡើងវិញ។
លោក ភី ចាន់សុណា សមាជិកក្រុមអ្នកស្ទូចត្រីកម្ពុជាបានឱ្យដឹងផងដែរថា នៅក្នុងទិវាមច្ឆាជាតិនេះ ក្រុមអ្នកស្ទូចត្រីកម្ពុជា ក៏ចូលរួមប្រារព្ធទិវានេះផងដែរ ដោយនេះគឺជាការរួមចំណែកជាមួយរដ្ឋាភិបាល ដើម្បីថែរក្សា និងប្រលែងត្រីបន្ថែមទៀត លើត្រីដែលមានស្រាប់ឱ្យកាន់តែសម្បូរច្រើនឡើង។
អ្នកនិយមស្ទូចត្រីរូបនេះ បន្ថែមថា៖
«ទិវានេះ ក៏រំឭកដាស់តឿនស្មារតីដល់ប្រជាជនខ្មែរឱ្យចូលរួមការពារមច្ឆាជាតិ មិនត្រូវប្រព្រឹត្តបទល្មើសនេសាទឡើយ ហើយក្រុមខ្ញុំក៏ព្យាយាមស្វែងរកពូជត្រីណាដែលកម្រផងដែរ ដើម្បីទុកអភិរក្សទុកឱ្យអ្នកជំនាន់ក្រោយ»។
គួរបញ្ជាក់ថា «ផលត្រី» នៅក្នុងរដូវប្រមូលត្រីប្រហុក ឆ្នាំ២០២៣នេះ មានការកើនឡើងជាងឆ្នាំ ២០២២ ប្រមាណ៥% ដោយសារមានការសហការ និងខិតខំប្រឹងប្រែងរបស់មន្ត្រីជលផល និងកងកម្លាំងចម្រុះ ក្នុងការបង្ការ និងបង្ក្រាបបទល្មើសនេសាទ ប្រកបដោយភាពម៉ឺងម៉ាត់ និងប្រសិទ្ធភាពក្នុងរដូវត្រីពង។ នេះបើតាមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា ថ្លែងកាលពីថ្ងៃទី ១៩ ធ្នូ ឆ្នាំ២០២៣៕
.jpg)
