.jpg)
ឈរលើនាវានៅដងទន្លេសែនកាន់ទង់ជាតិកម្ពុជាយ៉ាងស្វាហាប់ អត្តពលិករត់ប្រណាំង ឈុន ប៊ុនថន ស្ថិតក្នុងចំណោមកីឡាករ និងប្រតិភូកីឡាកម្ពុជា បានទៅចូលរួមព្រឹត្តការណ៍កីឡាអូឡាំពិក Paris Olympics 2024 ដែលចាប់ផ្តើមបើកជាផ្លូវការកាលពីថ្ងៃទី២៦ ខែកក្កដា និងបញ្ចប់នៅថ្ងៃទី១១ ខែសីហា ឆ្នាំ២០២៤។
.jpeg)
អត្តពលិកមកពីខេត្តព្រៃវែង ដែលហែលឆ្លងជីវិតតស៊ូជាកូនកំព្រារូបនេះ បានដាក់ក្ដីសង្ឃឹមថា ការហ្វឹកហាត់របស់លោកអស់រយៈពេល ១២ឆ្នាំកន្លងមកនេះ នឹងអាចឱ្យរូបលោកសម្រេចបានលទ្ធផលល្អបំផុត សម្រាប់ការប្រកួតលើវិញ្ញាសាររត់ប្រណាំង ៨០០ម៉ែត្រ នាថ្ងៃទី៧ ខែសីហា ខាងមុខនេះ។
ទន្ទឹមនឹងនោះ កីឡាកររត់ប្រណាំង ឈុន ប៊ុនថន បានសម្ដែងចំណាប់អារម្មណ៍រំភើបពុំមានអ្វីនឹងបរិយាយ ដោយសារតែសមិទ្ធផលនៅថ្ងៃនេះកើតចេញពីសមត្ថភាពរបស់លោកពិតប្រាកដ។
កីឡាកររត់ប្រណាំងដ៏ស្វាហាប់រូបនេះ ប្រាប់ SR Digital Media តាមសារជាសំឡេងថា៖ «ខ្ញុំមានអារម្មណ៍ថារំភើបចំពោះសមត្ថភាពខ្លួនឯង ពិបាកនឹងសន្និដ្ឋាន ឬបរិយាយថាសប្បាយចិត្តខ្លាំងប៉ុណ្ណានូវអ្វីដែលយើងខិតខំប្រឹងប្រែងជាយូរមកហើយ និយាយរួមទៅ យើងចូលរួមដោយសមត្ថភាពរបស់យើង ដែលជាកីឡាករឆ្នើមនៅប្រទេសកម្ពុជា ត្រូវបានជ្រើសរើសទៅចូលរួមព្រឹត្តិការណ៍អូឡាំពិក នៅប្រទេសបារាំង»។
ដោយឆ្លងកាត់ការលំបាកជាច្រើន លោក ឈុន ប៊ុនថន បានហ្វឹកហាត់ជារៀងរាល់ថ្ងៃ ដើម្បីត្រៀមខ្លួនចូលរួមប្រកួតនៅព្រឹត្តិការណ៍អូឡាំពិក ដែលការចូលរួមនេះ អត្តពលិកកម្ពុជាទទួលបានសិទ្ធិអនុគ្រោះ និងជ្រើសរើសយ៉ាងល្អិតល្អន់ពីអន្ដរជាតិ។
អត្តពលិក ឈុន ប៊ុនថន បានលើកឡើងទៀតថា៖ «អ៊ីចឹងយើងមានអារម្មណ៍ថាដូចជាសុបិនក្លាយជាការពិត ហើយនេះហើយជាលើកទីមួយរបស់ខ្ញុំហើយដែលបានចូលរួមព្រឹត្តិការណ៍អូឡាំពិក ៤ ឆ្នាំម្ដង។ យើងមិនអាចនិយាយពាក្យក្ដីរំពឹងទេ យើងអាចនិយាយថា យើងនឹងខិតខំប្រឹងប្រែងឱ្យអស់ពីលទ្ធភាព ដើម្បីប្រកួតឱ្យបានលទ្ធផលល្អនៅក្នុងកម្រិតមួយ»។
កីឡាករអត្តពលកម្ម ឈុន ប៊ុនថន និងកីឡាហែល ២រូប គឺកីឡាករ កូសុង ដឺឡាបរ៉ារ៉ងឣង់ត្វ័ន ម៉ាតាំងក្លូឌ និងកីឡាការិនី សាក់ប៊ុន ឣប្សរាកាតារីណា គឺជាអត្តពលិកកម្ពុជា ៣រូប ដែលចូលរួមក្នុងចំណោមអត្តពលិកប្រមាណ ១០,៥០០នាក់ មកពីប្រទេស និងដែនដីចំនួន ២០៦ ដែលត្រូវបានទទួលស្គាល់ដោយកម្មាធិការអូឡាំពិកអន្តរជាតិ។
លោក ឈុន ប៊ុនថន គឺម្ចាស់មេដាយមាសលើប្រភេទកីឡាអត្តពលកម្ម ក្នុងព្រឹត្តិការណ៍ស៊ីហ្គេមលើកទី ៣២ ជាឆ្នាំបើកទំព័រប្រវត្តិសាស្ត្រ ដែលប្រទេសកម្ពុជាធ្វើម្ចាស់ផ្ទះព្រឹត្តិការណ៍កីឡានេះ។ លោកបានរត់មកដល់ទីផ្តាច់ព្រ័ត្រមុនគេ ក្នុងថិរវេលា ១:៥២.៩១០ នាទី លើវិញ្ញាសារត់ចម្ងាយ៨០០ម៉ែត្រ នៅពហុកីឡដ្ឋានជាតិមរតកតេជោ កាលពីថ្ងៃទី១១ ខែឧសភា ឆ្នាំ២០២៣ ជាមួយសម្លេងហ៊ោរ និងស្នូរទះដៃកងរំពងពីមហាជន អបអរមេដាយមាសកីឡាអត្តពលកម្មជាប្រវត្តិសាស្ត្រ។
.jpeg)
ទោះជាហែលឆ្លងឧបសគ្គជាច្រើនមិនថាការហ្វឹកហាត់ក្នុងស្រុក ឬនៅប្រទេសទេ ក៏អត្តពលិក ឈុន ប៊ុនថន ពេញចិត្តនឹងការលះបង់មួយនេះ ព្រោះសមត្ថភាព និងទេពកោសល្យបាននាំលោកទៅកាន់ឆាកអន្តរជាតិ ពីតំបន់អាស៊ី ទៅកម្រិតពិភពលោក។
កីឡាករដែលល្បីចេះលេងចាប៉ីដងវែងរូបនេះ បាននិយាយថា៖ «យើងបានឃើញអ្វីដែលខុសប្លែកច្រើនពីនៅកីឡាអាស៊ីយើង។ ទីនេះមានមនុស្សច្រើន ហើយខ្ញុំពិតជារំភើបខ្លាំងនៅពេលដែលបានជួបកីឡាករខ្លាំងៗល្អៗ ជួបកីឡាករដែលជាអាយដលរបស់យើង»។
អតីតនិស្សិតផ្នែកសំណង់ស៊ីវិលដែលហ្វឹកហាត់ក្លាយជាកីឡករជម្រើសជាតិរូបនេះ បានធ្វើការហ្វឹកហាត់សម្រាប់ព្រឹត្តិការណ៍អូឡាំពិកឥតរុញរាចាប់តាំងពីឈ្នះមេដាយមាសស៊ីហ្គេម ២០២៣ មក។
លោក ប៊ុនថន និយាយថា៖ «យើងហ្វឹកហាត់រហូតដើម្បីអូឡាំពិកនេះ។ អ៊ីចឹងបើគិតដល់ថ្ងៃនេះ ២០២៤ វាមានរយៈពេល១ឆ្នាំជាងហើយ ដែលខ្ញុំបានហ្វឹកហាត់ ត្រៀមខ្លួនជារៀងរាល់ថ្ងៃ ជម្នះការលំបាកច្រើនរៀបរាប់មិនអស់ទេ»។
បន្ទាប់ពីបេសកកម្មទៅចូលរួមប្រកួតនៅព្រឹត្តិការណ៍កីឡាអូឡាំពិក អត្តពលិក ឈុន ប៊ុនថន នៅតែបន្តគម្រោងហ្វឹកហាត់ជាអត្តពលិករត់ប្រណាំងតំណាងជាតិក្នុងការប្រកួតថ្នាក់តំបន់ជាបន្តបន្ទាប់ទៀត។
អត្តពលិកវ័យសាមស្ដើងរូបនេះ បានឱ្យដឹងថា៖ «តទៅមុខទៀត ខ្ញុំមានគម្រោងមួយដែរគឺ គឺសម្រាប់ការត្រៀមប្រកួតកីឡាស៊ីហ្គេមលើកទី ៣៣ នៅប្រទេសថៃ នៅខែធ្នូ ឆ្នាំ ២០២៥»៕
.jpeg)
.jpg)
