.jpg)
នៅខាងក្នុងសួនកម្សាន្ត «អាណាចក្រមនុស្សតឿ» (Kingdomof Little People) ដ៏ចម្រូងចម្រាស ជាផ្ទះរបស់មនុស្សតឿប្រមាណ ១៥០នាក់ដែលធ្វើការជារៀងរាល់ថ្ងៃសម្រាប់បម្រើទស្សនីយភាពភ្ញៀវទេសចរ។
សួនកម្សាន្តចិនដែលមើលទៅហាក់ដូចជាពិភពនៃក្ដីស្រមើលស្រមៃបានទាក់ទាញភ្ញៀវទេសចរទៅមើលឱ្យជាក់នឹងភ្នែក ថាតើអាណាចក្រមនុស្សតឿជាង១៥០ នាក់ នៅក្នុងខេត្តយូណាន នេះមានភាពពិសេសប្លែកភ្នែកបែបណាដែរ។
គម្រោងសួនកម្សាន្តមានតម្លៃទឹកប្រាក់ ១,៣៩ពាន់លានដុល្លារនេះត្រូវបានចាប់ផ្តើមនៅក្នុង ២០០៩ ហើយដោយមានបុគ្គលិកកម្ពស់ទាបៗ មិនលើស១ម៉ែត្រ ៣តឹក។
.jpg)
ធ្វើដំណើរដោយរថយន្តរយៈពេល១ម៉ោងឆ្ពោះទៅទិសខាងកើតនៃទីក្រុងគុនមីងភាគនិរតីនៃប្រទេសចិន អ្នកធ្វើការមានរាងរៅតូចៗបានបង្កើតសហគមន៍មួយហាក់បីដូចជានគរមនុស្សតឿដ៏ចម្លែក។
ទីតាំងដ៏ធំគឺពោរពេញទៅដោយប្រាសាទ រោងមហោស្រពនិងសំណង់ចម្លងតាមឈុតឆាករឿង Lord of the Rings ។
នៅសួនកម្សាន្តក៏មានផ្ទះបែបតូចៗ មានបង្អួចកោងនិងដំបូលផ្សិត។ នៅទីនោះក៏មានភោជនីយដ្ឋានមួយកែច្នៃនៅខាងក្នុងយន្តហោះចាស់ដែលធ្លាប់ដឹកអ្នកដំណើរ។
សម្រាប់ថ្លៃចូលសួនកម្សាន្តអាណាចក្រមនុស្សតឿគឺ ១,៣៩ដុល្លារហើយភ្ញៀវទេសចរអាចដើរទស្សនា ថតរូប និងមើលការសម្ដែងដ៏ចម្លែក មានតាំងពីល្ខោនSwan Lake រហូតដល់ឈុតឆាកប្រយុទ្ធនៅមជ្ឈិមសម័យឬការសម្តែងរបស់ស្តេចនាគ ជាដើម។
បន្ទាប់មក អ្នកទេសចរអាចថតរូបប្រជាជននៃអាណាចក្រតឿហើយត្រូវបានអញ្ជើញចូលទៅផឹកតែលេងនៅក្នុងផ្ទះគម្រូតូចៗដូចផ្ទះតុក្កតាក្នុងរឿងព្រេងនិទាន។
អាណាចក្រតឿត្រូវបានគេគ្រប់គ្រងដោយ «អធិរាជ» ដែលពាក់អាវពណ៌លឿងនិងក្រហម មានវ៉ែនតាធំ។
.jpg)
«អាណាចក្រមនុស្សតឿ» គឺជាគម្រោងរបស់មហាសេដ្ឋីអចលនទ្រព្យចិនChen Mingjing ដែលបានបង្កើតគំនិតនេះ បន្ទាប់ពីលោកបានជួបមនុស្សតឿ២នាក់សុំទាននៅលើរថភ្លើង។
គាត់បានប្រាប់ Time កាលពីឆ្នាំ២០១៨ថា៖
«ខ្ញុំពិតជាអាណិតដល់ស្ថានភាពរបស់ពួកគេណាស់។ គ្រួសាររបស់ពួកគេមើលងាយពួកគេជេរពួកគេ ដូច្នេះពួកគេត្រូវដេកនៅតាមចិញ្ចើមផ្លូវ»។
«ខ្ញុំគិតថាយើងគួរតែកសាងនគរមួយសម្រាប់ពួកគេ»។
ទោះជាយ៉ាងណាក៏ដោយចាប់តាំងពីសួនកម្សាន្តបានបើកទ្វារជាលើកដំបូងសំណួរត្រូវបានលើកឡើងម្តងហើយម្តងទៀតអំពីក្រមសីលធម៌កក្នុងប្រតិបត្តិការអាជីវកម្ម។
ក្រុមតស៊ូមតិបានមើលឃើញជាយូរមកហើយថា «អាណាចក្រមនុស្សតឿ»ជាទស្សនីយភាពគួរឱ្យព្រួយបារម្ភនៃការកេងប្រវ័ញ្ចកម្លាំងពលកម្មអ្នកមានបញ្ហាកាយសម្បទា។
ក្រុមគាំទ្រមនុស្សតឿរបស់អាមេរិក LittlePeople of America បានប្រដូចអាណាចក្រមនុស្សតឿទៅនឹង «សួនសត្វ» ហើយបានត្អូញត្អែរថាសួនកម្សាន្តនេះ បានញែកអ្នកសម្ដែងដែលជាមនុស្សតឿចេញពីសង្គមនិងធ្វើឱ្យការរើសអើងចំពោះមនុស្សតឿកាន់តែលេចឡើងច្បាស់។
ប្រទេសចិនមានចំនួនមនុស្សតឿចំនួន ៨ លាននាក់ដែលរដ្ឋបានចាត់ទុកជាពិការតាំងពីឆ្នាំ ២០០៧ ។
.jpg)
នៅអាណាចក្រមនុស្សតឿ ពួកគេទទួលបានប្រាក់ខែប្រហែល២៨៤ដុល្លារក្នុងមួយខែ ដែលប្រហែលនឹងប្រាក់ខែកម្មកររោងចក្រ។ មនុស្សតឿភាគច្រើនរស់នៅក្នុងបន្ទប់រួមក្នុងផ្ទះចាក់បេតុង។
ប៉ុន្តែឧទ្យាននេះក៏ត្រូវបានគេរាយការណ៍ថា ជាកន្លែងស្វែងរកស្នេហានិងបង្កើតមិត្តភាពរវាងមនុស្សតឿ ផងដែរ។
បុគ្គលិកម្នាក់ឈ្មោះ Ah Wei ដែលជាសិប្បករនិងអាជីវករមួយរូប បានជួបប្រពន្ធរបស់គាត់នៅក្នុងសួនកម្សាន្តនគរមនុស្សតឿ។
គាត់បានប្រាប់ The World ofChinese ថា៖ «ត្រលប់ទៅហឺណានវិញ ជារឿយៗខ្ញុំតែងតែត្រូវបានគេសើចចំអកចំពោះរូបរាងរបស់ខ្ញុំប្រសិនបើខ្ញុំចេញទៅក្រៅទីសាធារណៈ»។
.jpg)