ដោយទទួលបាននូវការចាប់អារម្មណ៍យ៉ាងខ្លាំងពីសំណាក់មហាជន កម្មវិធី ៥០០០ជំហានដើម្បី «កំពតស្អាត» នឹងត្រឡប់មកវិញនៅថ្ងៃអាទិត្យ ទី ២៥ ខែ សីហា ឆ្នាំ ២០២៤ ដើម្បីជំរុញការយល់ដឹង និងពញ្ញាក់ស្មារតីប្រជាជនកម្ពុជាឱ្យយកចិត្តទុកដាក់បន្ថែមទៅលើបញ្ហាបរិស្ថាននិងការរស់នៅស្អាត។
យុទ្ធនាការ កំពតស្អាត នេះត្រូវបានផ្ដួចផ្ដើមដោយ សភាយុវពាណិជ្ជករអន្តរជាតិសាខាមេគង្គ ដោយយកចេញពីគម្រោងភ្នំពេញស្អាត។ យុទ្ធនាការនេះធ្វើទ្បើងគឺដើម្បីការផ្សព្វផ្សាយឲ្យបានកាន់តែទូលំទូលាយនូវការយល់ដឹងអំពីបរិស្ថានទៅកាន់ប្រជាជនកម្ពុជាក្នុងការយកចិត្តទុកដាក់បន្ថែមទៅលើបញ្ហាបរិស្ថាននិង ការរស់នៅស្អាត ។
ប្រធានគម្រោង «កំពតស្អាត» ឆ្នាំ២០២៤ លោក ស ឬទ្ធី បានឱ្យដឹងថា៖ «ដោយសារយើងឃើញថាការទុកដាក់សំរាមរបស់ប្រជាពលរដ្ឋក្នុងខេត្តនេះផ្ទាល់នៅមានកម្រិតទើបយើងធ្វើទ្បើងដើម្បីផ្សព្វផ្សាយចែករំលែកសារអប់រំសំខាន់ៗពាក់ព័ន្ធនឹងការថែរក្សាបរិស្ថាន អនាម័យ និងការគ្រប់គ្រងបែងចែកសំរាម»។
លោកបន្តថា៖ «យើងឃើញថាខេត្តមួយនេះដែរជាតំបន់អេកូទេសចរណ៍ដែលអាចទាក់ទាញភ្ញៀវជាតិនិងភ្ញៀវអន្តរជាតិឱ្យមកលេងកម្សាន្ត ក៏ជាផ្នែកមួយជួយជំរុញដល់សេដ្ឋកិច្ចនិងការកាត់បន្ថយការប៉ះពាល់ដល់បរិស្ថានដូចគ្នា»។
បង្កើតដំបូងនៅឆ្នាំ ២០១៩ គម្រោង «កំពតស្អាត» ត្រូវបានធ្វើឡើងជាលើកទី ៦ដោយបង្កប់នូវខ្លឹមសារថែរក្សាបរិស្ថានជាមួយនឹងការបន្តទម្លាប់ស្អាត ការពិចារណាការបដិសេធ និងជុសជុលឡើងវិញដើម្បីសោភ័ណភាពប្រទេសយើង។
លោក ស ឬទ្ធី បានលើកឡើងថា៖ «សម្រាប់សកម្មភាពដែលខុសពីឆ្នាំមុនគឺឆ្នាំនេះកម្មវិធីស្អាតរបស់យើងធ្វើក្រោមប្រធានបទ «បន្តទម្លាប់ស្អាត សម្រាប់ ប្រទេសយើង»និងក្រោមសកម្មភាពបីធំៗគឺ «ការពិចារណាការជួសជុល និងការកែច្នៃ» ទៅលើកាកសំណស់និងវត្ថុប្រើប្រាស់ផ្សេងៗ និងមានយើងមានការចូលរួមយ៉ាងច្រើនកុះករពីប្រជាពលរដ្ឋនិង យុវជនក្នុងខេត្តកំពតផ្ទាល់អាចថាលើសពី១០០% នៃឆ្នាំកន្លងទៅ។ ជាពិសេសយុវជន Visit Kampot ដែលពួកគាត់មានការស្វះស្វែងជួយផ្សព្វផ្សាយអំពីយុទ្ធនាការនេះ»។
កម្មវិធីនឹងប្រព្រឹត្តទៅនៅទីតាំងនៃខេត្តកំពតផ្ទាល់ដោយមានការចូលរួមពីសំណាក់ក្រសួងពាក់ព័ន្ធ ដៃគូសហការឧបត្ថម្ភ មហាជន និងសិស្សានុសិស្សជាច្រើន។
យុទ្ធនាការ ៥០០០ ជំហានដើម្បីកំពតស្អាត នឹងចេញដំណើរពីរង្វង់មូលទុរេនទៅកាន់ឆ្នេរកោះស្មៅ ដែលមានចម្ងាយប្រមានជិត ៥ គីឡូម៉ែត្រ។ការចូលរួមនៅក្នុងយុទ្ធនាការនេះគឺជាសារនៅក្នុងការរួបរួមគ្នាដើម្បីបរិស្ថាននិងមនុស្សជាតិរបស់យើងទាំងមូលដោយស្មារតីសាមគ្គី ចែករំលែក និងការរួបរួម។
ប្រធានគម្រោង «កំពតស្អាត» ឆ្នាំ ២០២៤ លោក ស ឬទ្ធី រំពឹងទុកថាកម្មវិធីរត់ ៥០០០ ជំហានដើម្បីកំពតស្អាត និងមានការចូលរួមគាំទ្រផ្សព្វផ្សាយពីសំណាក់ ប្រជាជនគ្រប់រូប ជាពិសេសប្រជាពលរដ្ឋនិងសិស្សានុសិស្សនៅទីនោះផ្ទាល់ ដើម្បីលើកកម្ពស់ការយល់ដឹងអំពីបញ្ហាបរិស្ថានដែលយើងជួបប្រទះសព្វថ្ងៃនេះ។
លោកបានលើកឡើងថា៖ «វត្តមាននៃការចូលរួមរបស់អ្នកទាំងអស់គ្នាគឺជាកត្តាលីករដ៍សំខាន់មួយនៅក្នុងការកែប្រែខេត្តកំពតប្រែក្លាយជាខេត្តគំរូ និងមានការទាក់ទាញពីភ្ងៀវទេសចរណ៍ជាតិ និងអន្តរជាតិកាន់តែច្រើនបន្ថែមទៀត»។
ដោយសហការពីក្រសួងដែលពាក់ព័ន្ធ និងបណ្ដាញក្រុមហ៊ុនជាច្រើនសន្ទុះនៃការគាំទ្រពីសំណាក់ប្រជាជនតាមបណ្ដាញសង្គមមាន ការកើនឡើងគួរឱ្យកត់សម្គាល់។ចំនួនអ្នកចូលរួមនាឆ្នាំនេះ ត្រូវបានរំពឹងទុកថា និងទទួលប្រមាណ ៣០០នាក់។ ភ្នំពេញ ប៉ុស្ដិ៍ The Phnom Penh Post និង SR Digital Media ក៏បានរួមចំណែកតាមរយៈការធ្វើជាដៃគូផ្សព្វផ្សាយកម្មវិធី ៥០០០ជំហានដើម្បី «កំពតស្អាត» ផងដែរ។
លោក ស ឬទ្ធី បានបន្តថា៖ «បន្ទាប់ពីយុទ្ធនាការលើកនេះបានជោគជ័យនិងទទួលបានផ្លែផ្កា ពួកយើងនឹងសិក្សាស្វែងយល់បន្ថែមទៀតអំពីបញ្ហាចម្បងផ្សេងៗដែលជួបប្រទះនៅខេត្តកំពត ជាពិសេសទាក់ទងនឹងបញ្ហាបរិស្ថានដើម្បីនាឆ្នាំក្រោយពួកយើងនឹងធ្វើយុទ្ធនាការនេះម្តងទៀត ឱ្យកាន់តែមានប្រសិទ្ធភាពនិងចំគោលដៅ។
លើសពីភាពសប្បាយរីករាយ ការចងចាំល្អៗនិងជាផ្នែកយ៉ាងសំខាន់ក្នុងការលើកកម្ពស់ការយល់ដឹងអំពីបរិស្ថាន អ្នកចូលរួមក្នុងកម្មវិធីដែលបានទៅដល់គៅលដៅបញ្ចប់នឹងទទួលបាននូវអាវយឺតកំពតស្អាតដ៏ស្រស់ស្អាតមួយ ដបទឹកបរិស្ថានមានឈ្មោះកំពតស្អាតមួយ និងមេដាយមួយសម្រាប់អ្នកដែលបានទៅដល់ គោលដៅបញ្ចប់។
កញ្ចប់ចូលរួមក្នុងកម្មវិធីរបស់យើងមានពីប្រភេទ តម្លៃ ២០ដុល្លារនឹងទទួលបាន អាវយឺតកំពតស្អាត ២០២៤ចំនួនមួយ មេដាយមួយ និងដបទឹកមួយ។
ដោយឡែកសម្រាប់ កញ្ចប់ ៣០ដុល្លារ វិញនឹងទទួលបានអាវយឺតកំពតស្អាត ២០២៤ចំនួនពីរ មេដាយពីរ និងដបទឹកពីរ។ កញ្ចប់ទាំងពីរ និងទទួលបានអាហារសម្រន់នៅកំឡុងេពេលកម្មវិធី និងមានឳកាសទទួលបានវោចឆើរផ្សេងៗជាច្រើនពីដៃគូរសហការឧបត្ថមរបស់យើងផងដែរ។
សម្រាប់ព័ត៌មានបន្ថែម សូមចូលទៅកាន់គេហទំព័រហ្វេសបុកផ្លូវការរបស់ «កំពតស្អាតKampot Saat»។
ប្រសិនជាលោកអ្នកចាប់អារម្មណ៍ចូលរួមជាមួយកម្មវិធី៥០០០ជំហានដើម្បីកំពតស្អាតសូមចូលទៅកាន់តំណភ្ជាប់នេះដើម្បីធ្វើការចុះឈ្មោះ៖ https://forms.gle/jQRPoiTBTtUhyVMAA៕
.jpg)
.jpg)