អាជីពជាតារាខេផប់ (K-pop) ដើមឡើយ ធ្លាប់ជាក្តីសុបិនកំពូលសម្រាប់យុវជន និងយុវតីនៅប្រទេសកូរ៉េខាងត្បូង។ ខណៈដែលយុវតីជាច្រើននៅតែប្រាថ្នាចង់ក្លាយជាតារាចម្រៀង ខេផប់ (K-pop) ក្តីសុបិនមួយនេះ លែងសូវទាក់ទាញយុវជនដូចមុនហើយ ដោយសារតែពួកគេកាន់តែដឹងច្បាស់អំពីការប្រឈមដ៏លំបាកក្នុងការក្លាយខ្លួនជាតារាខេផប់ (K-pop) បុរស។
បេក្ខជនហ្វឹកហាត់ធ្វើជាតារាចម្រៀងខេផប់ តែងតែឆ្លងកាត់ការហ្វឹកហ្វឺនយ៉ាងម៉ត់ចត់ពី ៣ ទៅ ៥ ឆ្នាំ ជាមួយការប្រកួតប្រជែងយ៉ាងស្វិតស្វាញ ដើម្បីមានឱកាសតិចតួចក្នុងការបង្ហាញខ្លួនលើឆាកតន្ត្រី។ ទោះបីជាពួកគេសម្រេចបានភាពជោគជ័យជាតារាចម្រៀងក៏ដោយ ពួកគេតែងតែបាត់បង់សេរីភាព និងជីវិតឯកជនមួយផ្នែកធំ ក្នុងដំណើរការសម្រេចក្ដីសុបិនមួយនេះ។
ទីភ្នាក់ងារ K-pop រាយការណ៍ពីការលំបាកក្នុងការស្វែងរកបេក្ខភាពបុរសមកបង្វឹកដែលមានទាំងបរិមាណ និងគុណភាព ដោយសារតែពេលនេះ យុវជនជាច្រើន សុខចិត្តធ្វើជាតារាបណ្ដាញសង្គមជា Influencer ឬ YouTubers វិញ ដោយសារអាជីពនេះ មានសក្តានុពលទាញប្រាក់ចំណេញកាន់តែច្រើន និងមានសេរីភាពជាងការនៅក្រោមទីភ្នាក់ងារគ្រប់គ្រងឬផលិតកម្មចម្រៀង។
ប្រភពមកពីផលិតកម្មតន្ត្រីក្នុងស្រុកម្នាក់ បាននិយាយថា៖ «រយៈពេលប្រហែលពីរទៅបីឆ្នាំហើយ ដែលខ្វះបេក្ខភាពបុរស មកបង្វឹកធ្វើតារាចម្រៀងខេផប់ (K-pop)។ បេក្ខភាពយុវជន ចង់ចាប់អាជីពជាតារាចម្រៀងខេផប់ បានធ្លាក់ចុះជាង៣០ភាគរយ ដោយក្នុងចំណោមបេក្ខភាព ៣០ នាក់ មានយុវជនមិនដល់ ១០នាក់ផង ដែលចុះឈ្មោះហ្វឹកហាត់ត្រៀមខ្លួនធ្វើតារាចម្រៀង»។
ប្រភពដដែលពិវិស័យឧស្សាហកម្មចម្រៀងខេផប់ បានបន្តទៀតថា៖ «អ្នកមានទេពកោសល្យជាច្រើនបានក្លាយខ្លួនទៅជាតារាបណ្ដាញសង្គមលើ Instagram ឬ YouTube ពីព្រោះផ្លូវទាំងនោះផ្តល់ឱកាសជោគជ័យ និងមានលក្ខខណ្ឌប្រសើរជាងការបង្ហាញខ្លួនក្នុងក្រុមចម្រៀងខេផប់។ ទន្ទឹមនឹងនេះ បេក្ខភាពខេផប់ ប្រឈមនឹងការរឹតបន្តឹងផ្សេងៗ ដូចជា មិនអាចមានស្នេហា និងត្រូវប្រកាន់ខ្ជាប់របបអាហារដ៏តឹងរ៉ឹង»។
តារាចម្រៀងខេផប់ ឬគេនិយមហៅថា K Pop Idol (ខេផប់អាយដល) ត្រូវបានសាធារណជនរំពឹងថា បានប្រកាន់ខ្ជាប់នូវស្តង់ដាសីលធម៌ដ៏តឹងរ៉ឹង រួមទាំងការសម្ពាធលើការមានស្នេហាផងដែរ។
ថ្មីៗនេះ Jennie មកពីក្រុម Blackpink ត្រូវតែសុំទោសជាសាធារណៈ ចំពោះការជក់បារីអេឡិចត្រូនិកក្នុងបរិវេណបិទជិតនៅប្រទេសអ៊ីតាលី។
កាលពីខែមីនា Karina មកពីក្រុម aespa បានប្រកាសចែកផ្លូវជាមួយមិត្តប្រុសរបស់នាង ដោយនាងបានសុំទោសអ្នកគាំទ្ររបស់នាងជាសាធារណៈ។ ទោះជាយ៉ាងណា នាងត្រូវបានអ្នកគាំទ្រចោទប្រកាន់នាងពីបទ «បោកប្រាស់» ផ្លូវចិត្តពួកគេ ដោយសារតែនាងមានទំនាក់ទំនងស្នេហា។
មានរឿងរ៉ាវច្រើនប៉ុណ្ណឹងហើយលើនារីក្នុងឧស្សាហកម្មខេផប់ ប៉ុន្តែហេតុអ្វីបានជាមានតែចំនួនបេក្ខភាពបុរសធ្លាក់ចុះ?
ប្រភពពីឧស្សាហកម្មចម្រៀងខេផប់ម្នាក់ទៀត បានចាត់ទុកថា កង្វះបេក្ខភាពបុរសចុះឈ្មោះហ្វឹកហាត់ប្រឡូកក្នុងវិស័យខេផប់ កើតឡើងដោយសារកត្តាខ្វះនិរន្តរភាពសម្រាប់ក្រុមចម្រៀងប្រុស។
អ្នកបម្រើការក្នុងឧស្សាហកម្មចម្រៀងខេផប់បានលើកឡើងថា៖ «សម្រាប់តារាចម្រៀងប្រុសការបំពេញកាតព្វកិច្ចយោធាគឺសំខាន់ណាស់។ បេក្ខភាពកំពុងបង្វឹកជាបុរសត្រូវពិចារណាលើរយៈពេលដែលពួកគេអាចទ្រទ្រង់អាជីពរបស់ពួកគេបាន បន្ទាប់ពីពួកគេត្រូវបានចូលបម្រើយោធា និងចប់ពីកាតព្វកិច្ចយោធា។ ភាគច្រើនពួកគេបាត់បង់អ្នកគាំទ្រ និងបរាជ័យក្នុងការបន្តអាជីពរបស់ពួកគេ។ ក្រុម BTS និង Seventeen គឺជាករណីពិសេស ដែលមិនមែនគ្រប់ក្រុមចម្រៀងបុរសសុទ្ធតែមានសំណាងដូច្នោះទេ»។
ប្រភពខាងលើបានបន្តថា៖ «លើសពីនេះទៅទៀត អ្នកត្រូវការក្រុមចម្រៀងប្រុសដ៏ជោគជ័យថ្មីថ្មោង ដែលអាចឱ្យបេក្ខភាពជំនាន់ក្រោយយកគម្រូតាម និងរំពឹងជោគជ័យតាមពីក្រោយ។ គួរឱ្យសោកស្ដាយ មិនមានក្រុមចម្រៀងខេផប់ណា ដែលទទួលបានជោគជ័យដូចក្រុម BTS នោះទេ។ អាចនិយាយបានថា ក្រុម Seventeen ប៉ុន្តែពួកគេមិនមែនជាក្រុមចម្រៀងថ្មីថ្មោងជំនាន់ក្រោយទេ។ បេក្ខភាពយុវជនជំនាន់ក្រោយ អាចដឹងរឿងនេះច្បាស់ណាស់ ហើយពួកគេមិនសុខចិត្តលះបង់ពេលវេលាកម្លាំងកាយចិត្ត ដើម្បីអនាគតមួយដែលមិនប្រាកដប្រជានោះទេ»។
អ្នកវិភាគឧស្សាហកម្មតន្ត្រីខេផប់ Kim Do-heon បាននិយាយថា ក្រុមហ៊ុនផលិតកម្មគួរតែផ្ដល់លក្ខខណ្ឌឱ្យប្រសើរជាមុន ចំពោះបេក្ខភាពចុះឈ្មោះហ្វឹកហាត់ប្រឡងធ្វើជាតារាចម្រៀង មិនថាយុវជន ឬយុវតីនោះទេ។
អ្នកវិភាគរូបនេះបានលើកឡើងថា៖ «បញ្ហានៃការបាត់បង់បេក្ខភាពបុរសហ្វឹកហាត់ធ្វើតារាចម្រៀងខេផប់ ជាអ្វីដែលទីភ្នាក់ងារចម្រៀងក្នុងស្រុកបានប្រឈមមួយរយៈធំមកហើយ។ ក្រុមហ៊ុនកម្សាន្តត្រូវផ្តល់បរិយាកាសការងារកាន់តែប្រសើរសម្រាប់យុវជន ស្របតាមនិន្នាការបច្ចុប្បន្ន។ ខ្ញុំច្បាស់ថា ចំនួនបេក្ខនារីចុះឈ្មោះប្រឡងធ្វើជាតារាចម្រៀង ក៏នឹងថយចុះដែរនាពេលអនាគតផង ប្រសិនបើប្រព័ន្ធបណ្តុះបណ្តាលហួសសម័យ មិនត្រូវបានកែខៃធ្វើឱ្យប្រសើរឡើងនោះទេ៕
