កម្មវិធី «មហោស្រពអក្សរសិល្ប៍ខ្មែរ»បានវិលមកជាថ្មីនៅថ្ងៃទី ១ ដល់ ថ្ងៃទី ៣ខែវិច្ឆិកា ជាមួយការតាំងពិព័រណ៍សៀវភៅ ការប្រកួតតែងនិពន្ធនិងការសម្ដែងសិល្បៈកម្សាន្តដ៏សប្បាយរីករាយ នៅទឹកដីក្រុងកំពង់ចាម។
ក្រោយពីទទួលបានភាពជោគជ័យជាច្រើនឆ្នាំបន្តបន្ទាប់ជាប់ៗគ្នាកម្មវិធី «មហោស្រពអក្សរសិល្ប៍ខ្មែរ» បានឈានដល់ឆ្នាំទី ៧ នេះហើយ។ ប្រធានបទសម្រាប់ឆ្នាំ២០២៤នេះគឺ «អក្សរសិល្ប៍បៃតង» ចំពេលដែលពិភពលោកកំពុងចាប់អារម្មណ៍រឿងបរិស្ថានកិច្ចការអភិរក្សធម្មជាតិ និងការប្រែប្រួលអាកាសធាតុ។
មហោស្រពអក្សរសិល្ប៍ខ្មែរត្រូវបានបានបង្កើតឡើងតាំងពីឆ្នាំ ២០១៧មកម្ល៉េះក្នុងគោលបំណងបីធំៗគឺ៖ ទីមួយបណ្ដុះស្មារតីស្នេហាអក្សរសាស្ត្រជាតិ ទី២ លើកកម្ពស់នូវកិត្តិយសនិងគុណតម្លៃរបស់អ្នកនិពន្ធ និង ទី៣ បង្កើនឱកាសក្នុងការទំនាក់ទំនង និងពង្រីកវិសាលភាពទីផ្សារដល់អ្នកនិពន្ធនិងវិស័យបោះពុម្ពនិងអក្សរសិល្ប៍។
.webp)
ទីតាំងចំនួន ៣ ដែលនឹងមានការប្រារព្ធមហោស្រពនេះរួមមានវិទ្យាល័យព្រះសីហនុ វិទ្យាល័យហ៊ុនសែន កំពង់ចាមនិងមជ្ឈមណ្ឌលគរុកោសល្យភូមិភាគខេត្តកំពង់ចាម។
ការប្រារព្ធកម្មវិធីដោយជ្រើសរើសទឹកដីខេត្តកំពង់ចាមលើកនេះ មានទំនាក់ទំនងជាមួយស្នាដៃនិពន្ធរបស់ទូតសុច្ឆន្ទៈទី១ នៃមហោស្រពអក្សរសិល្ប៍ខ្មែគឺអ្នកនិពន្ធជើងចាស់ ជុត ខៃ។
អ្នកនិពន្ធវ័យ ៨៤ឆ្នាំរូបនេះបានរំឭកប្រាប់ថា៖ «ពេលខាងមុខនឹងមានការតាំងពិព័រណ៍សៀវភៅរបស់ខ្ញុំផងដែរ។កាលពី ៧០ឆ្នាំមុន ខ្ញុំរៀននៅវិទ្យាល័យព្រះសីហនុ សៀវភៅរបស់ខ្ញុំខ្លះដូចជា [រឿង]អស្ដង្គតនៃប្រជាជាតិមួយ [រឿង] ក្មេងវត្តសម័យបារាំង គឺរៀបរាប់ជាពិសេស ខេត្តកំពង់ចាមនេះតែម្ដង»។
សិល្បការិនី ស៊ីនសេដ្ឋសុជ្ឈតា ដែលជាទូតសុច្ឆន្ទៈទី ២នៃមហោស្រពអក្សរសិល្ប៍លើកទី ៧ មានចំណាប់អារម្មណ៍ថា ខ្លួនពិតជាមានកិត្តិយសណាស់ដែលត្រូវបានតែងតាំងជាទូតសុច្ឆន្ទៈសម្រាប់មហោស្រពអក្សរសិល្ប៍ខ្មែរឆ្នាំ ២០២៤។
.webp)
ចៅស្រីអធិរាជសម្លេងមាសរូបនេះបានបន្តទៀតថា៖ «ក្នុងនាមខ្ញុំជាសិល្បករផ្នែកចម្រៀង និងអ្នកនិពន្ធបទចម្រៀងតួនាទីមួយនេះមានអត្ថន័យជាពិសេសដែលអនុញ្ញាតឱ្យខ្ញុំបញ្ចូលគ្នានូវសេចក្ដីស្រឡាញ់របស់ខ្ញុំចំពោះសិល្បៈជាមួយមរតកអក្សរសាស្ត្រដ៏សម្បូរបែបរបស់កម្ពុជា»។
សិល្បការិនី ស៊ីនសេដ្ឋសុជ្ឈតា បាននិយាយថា៖ «នាងខ្ញុំទន្ទឹងរង់ចាំធ្វើការជាមួយសហគមន៍យើង ដើម្បីរំលេចនិងចែករំលែកសំឡេងដ៏គួរឱ្យកត់សម្គាល់ក៏ដូចជាដើម្បីឈ្វេងយល់បន្ថែមអំពីរឿងរ៉ាវនៃអក្សរសាស្ត្រខ្មែរ។ សូមអរគុណសម្រាប់ឱកាសដ៏មានអត្ថន័យមួយនេះ!»។
.jpeg)
មហោស្រពអក្សរសិល្ប៍ខ្មែរលើកទី ៧ ឆ្នាំ២០២៤ មានរយៈពេលចំនួន ៣ថ្ងៃដោយកម្មវិធីពិសេសៗជាច្រើនដូចជា៖មហោស្រពកំណាព្យតូច, កម្មវិធីណែនាំសៀវភៅ «រលកថ្មី៖ ស្នាដៃអក្សរសិល្ប៍ពី ២០២១ដល់ ២០២៣», ពិព័រណ៍ «បៃតង», សិក្ខាសាលានិពន្ធច្នៃប្រតិដ្ឋ, វេទិកាពិភាក្សា «តួនាទីប្រតិបត្តិករវប្បធម៌ក្នុងការលើកកម្ពស់និងចូលរួមការពារបរិស្ថាន», អំណានតាមទីតាំងជាក់លាក់ស្ដីអំពីខេត្តកំពង់ចាម, វេទិកាសេរី «អំណានបៃតង», ទស្សនកិច្ចវប្បធម៌, កិច្ចពិភាក្សា «ជំនួបអ្នកនិពន្ធនៅកំពង់ចាម», សិក្ខាសាលា «បណ្តាំមួយនៃកវីឃុនស្រ៊ុន», ប្រឡងសំណេរបៃតង, ប្រកាសជ័យលាភីស្នាដៃអក្សរសិល្ប៍ច្នៃប្រតិដ្ឋនិងសិល្បៈទស្សនីយភាពចម្រុះ(របាំប្រជាប្រិយ, ចាប៉ីដងវែង, ល្ខោនខោល, អាយ៉ៃ 5G នាងស៊ូស៊ូ, ល្ខោនបាសាក់, និងចាប៉ីដងវែង)៕
.jpg)