កោះកុងៈ ទឹកជ្រោះតាតៃឬទឹកធ្លាក់តាឥសី គឺជាទីទេសចរណ៍ដ៏ពេញនិយមប្រចាំស្រុកកោះកុង នៃខេត្តកោះកុងដែលទឹកធ្លាក់នេះ មានល្បាក់ទឹកហូរជាដំណាក់ៗយ៉ាងស្រស់ស្អាត ហ៊ុមព័ទ្ធដោយទេសភាពព្រៃភ្នំជុំជិតស័ក្កសមសម្រាប់អ្នកស្វែងរកកន្លែងដើរលេងបែបបោះតង់ ក្រសោបដោយធម្មជាតិ ជាពិសេសនៅក្នុងរដូវវស្សានេះ។
ដើម្បីទៅដល់គោលដៅទឹកធ្លាក់តាតៃ ភ្ញៀវទេសចរអាចធ្វើដំណើរតាមផ្លូវជាតិលេខ៤៨ រួចបន្តតាមផ្លូវលំ ក្រួសក្រហម ដោយមានសញ្ញាប្រាប់ពីទីតាំងទឹកធ្លាក់ ឬអាចធ្វើដំណើរតាមផ្លូវទឹកដោយភ្ញៀវអាចឈប់ត្រឹមសហគមន៍ដែលមានទីតាំងនៅក្បែរគល់ស្ពានតាតៃ និងបន្តដំណើរតាមទូករបស់សហគមន៍ទៅកាន់តំបន់ទឹកធ្លាក់ហើយអ្នកទេសចរភាគច្រើន ចូលចិត្តធ្វើដំណើរតាមទូក ព្រោះបានលម្ហែកាយតាមដងស្ទឹងតាតៃថតរូបស្អាតជាមួយទេសភាពដ៏ស្រស់បំព្រង និងគយគន់ផ្ទាំងធម្មជាតិដ៏ត្រកាលនៅតំបន់នេះផងដែរ។
ទូកកម្សាន្ដប្រើពេល ២០ នាទីចេញដំណើរទៅកាន់ទឹកធ្លាក់តាតៃ ទូកកម្សាន្ដនេះ ត្រូវបានរៀបចំយ៉ាងស្អាតបាតសម្រាប់ភ្ញៀវអង្គុយ ១២ កៅអី និងបំពាក់អាវពោងសុវត្ថិភាពជាស្រេចជាមួយនឹងអ្នកបើកទូកបទពិសោធច្រើនឆ្នាំ ជាពិសេសក្នុងរដូវប្រមូលផលផ្លែឈើមកដល់ភ្ញៀវទេសចរអាចជិះទូកទៅលេងចម្ការផ្លែឈើរបស់ប្រជាកសិករតាមដងព្រែកផងដែរ។
បើអ្នកធ្វើដំណើរតាមមធ្យោបាយផ្លូវគោកវិញ ពេលទៅដល់ជិតទឹកធ្លាក់អ្នកនឹងបានឮសំឡេងសន្ធឹកទឹកហូរយ៉ាងខ្លាំង ដែលធ្វើឱ្យអារម្មណ៍អ្នកចង់ចុះទៅកម្សាន្តឱ្យបានឃើញរូបភាពទឹកធ្លាក់តាតៃភ្លាមៗផ្ទាល់ភ្នែកប៉ុន្តែបើអ្នកធ្វើដំណើរតាមផ្លូវទឹក សម្រស់ទឹកធ្លាក់លាក់ខ្លួននេះ នឹងលេចរូបមកបន្តិចម្តងៗខិតកាន់តែជិតអ្នកទេសចរ រហូតទូកបរដល់ចំណត ដែលជាគោលដៅរបស់អ្នកទេសចរ ត្រូវចុះទៅកម្សាន្តតាមទឹកធ្លាក់នេះ។
ទីឋានទេសចរណ៍បង្កប់ខ្លួននេះ មានទឹកហូរធ្លាក់ឈូឆរត្របាញ់ខ្មួលខ្មាញ់កាត់ផ្ទាំងថ្មធំៗជាច្រើនដំណាក់ រំលេចផ្ទៃទឹកដូចត្បូងមរកតបៃតងខ្ចី លាយពពុះសក្បុសក្នុងសីតុណ្ហភាពត្រជាក់ស្រេងលាយឡំជាមួយខ្យល់អាកាសល្អបរិសុទ្ធ។នៅសងខាងទឹកធ្លាក់ មានដើមឈើតូចធំខៀវស្រងាត់ ឈរអម ហាក់ចាំជួយថែរក្សាការពារទីនេះដូច្នោះដែរ។ភ្ញៀវទេសចរណ៍ច្បាស់ជាបានមុជទឹកលេងកម្សាន្តយ៉ាងសប្បាយ ដោយទឹកធ្លាក់មានកន្លែងងូតជាច្រើនហើយទឹកមានសភាពស្អាតបែបនេះ ប្រាកដជាធ្វើឱ្យអ្នកហាក់មិនចង់ក្រោកចេញត្រឡប់ទៅវិញនោះឡើយ។
ទឹកធ្លាក់តាតៃ មានទីតាំងនៅក្នុងភូមិអន្លង់វ៉ាក់ ឃុំតាតៃក្រោមស្រុកកោះកុង ខេត្តកោះកុង និងមាន សហគមន៍តំបន់ការពារធម្មជាតិ «តាតៃក្រោម» ជាអ្នកប្រើសេវាទេសចរជូដល់ភ្ញៀវទេសចរនិងជាអ្នកការពារធនធានធម្មជាតិនៅក្នុងតំបន់នេះ។
ទឹកធ្លាក់តាតៃ និងសហគមន៍តំបន់ការពារធម្មជាតិ «តាតៃក្រោម» គឺស្ថិតនៅក្នុងដែនជម្រកសត្វព្រៃតាតៃដែលមានទំហំសរុប ១៤៤,៥៣៩ ហិកតា។ ព្រៃឈើនៅតាតៃ គឺជាប្រភេទព្រៃស្រោងពាក់កណ្តាលស្រោង ព្រៃល្បោះលាយឡំដោយព្រៃឫស្សី និងវាលស្មៅខៀវខ្ចីដែលជាទីជម្រកសត្វព្រៃជាង៥០ ប្រភេទ ស្ថិតនៅក្នុងបញ្ជីក្រហម នៃអង្គការ អាយ-យូ-ស៊ី-អិន ពោលគឺជាប្រភេទសត្វកម្រដែលត្រូវការពារឱ្យបានគង់វង្សសម្រាប់មនុស្សគ្រប់ជំនាន់មានដូចជា សត្វដំរីអាស៊ី សត្វខ្លាឃ្មុំធំ សត្វខ្លាឃ្មុំតូច សត្វទោចម្កុដ សត្វរញីសត្វពង្រូល សត្វព្វាំង សត្វកេងកងធំ អណ្ដើកហ្លួង កន្ធាយ និងសត្វជាច្រើនទៀត៕
.jpg)
.jpg)