សៀមរាប: ស្ពានពស់អូរមានជ័យទឹកដីស្វាយលើ គឺជាទីលម្ហែកាយបែបផ្ទះស្នាក់ (Homestay) ជាប់ជើងភ្នំគូលែន ដែលក្រាលក្របដោយធម្មជាតិព័ណ៌បៃតងខៀវខ្ចី អមដោយបរិយាកាសល្អបរិសុទ្ធនិងមានកន្លែងថតរូបស្អាតៗ ជាពិសេសស្ពានឈើដ៏វែង សាងសង់កាច់កុងដូចជាសត្វពស់ផុសឡើងចំកណ្ដាលវាលស្រែវាលស្រូវ។
រមណីយដ្ឋានស្ពានពស់អូរមានជ័យ បើកដំណើរការជារៀងរាល់ថ្ងៃចាប់ពីម៉ោង ៨ ព្រឹកដល់ ម៉ោង ៦ល្ងាច ចំពោះសំបុត្រចូលទស្សនាទាំងភ្ញៀវជាតិ និងអន្តរជាតិមានតម្លៃដូចគ្នា ដោយសំបុត្រសម្រាប់មនុស្សធំមានតម្លៃ ២ ដុល្លារ និងកុមារមានតម្លៃ១ ដុល្លារ ពិសេសកុមារ កម្ពស់ក្រោម១,១០ម៉ែត្រ ពុំគិតថ្លៃនោះទេ។ទីកម្សាន្តដ៏ទាក់ទាញនេះ មានភ្ញៀវមកលេងយ៉ាងច្រើនជារៀងរាល់ថ្ងៃ ហើយចុងសប្តាហ៍ភ្ញៀវទេសចរកើនរហូតដល់ជាង១៥០០នាក់។បង្កើតឡើងនៅចុងឆ្នាំ២០១៨ និងបើកដំណើរការនៅឆ្នាំ ២០២២ទីតាំងកម្សាន្តកៀកកើយធម្មជាតិនេះ មានផ្ទៃដីទំហំ ១៤ ហិកតា និងទើបសាងសង់បានប្រមាណ៣០ ទៅ ៤០ភាគរយប៉ុណ្ណោះដោយត្រូវរៀបចំរចនា និងបំពេញបន្ថែមនូវហេដ្ឋារចនាសម្ព័ន្ធជាច្រើនទៀត ត្បិតទីតាំងមានទំហំធំ។
ចំណុចទាក់ទាញបំផុតនៅទីនេះ គឺស្ពានពស់ប្លែកភ្នែក ដែលសង់លើលូនលើវាលស្រែខៀវខ្ចីមានប្រវែងវែងរហូត ២៧៨ម៉ែត្រ។ ឈរពីស្ពានពស់នេះ ភ្ញៀវទេសចរណ៍ នឹងបានរសាយអារម្មណ៍ក្រោមជំនោរខ្យល់ត្រជាក់បក់មកប៉ះកាយក្រអូបក្លិនស្រែក្លិនស្រូវ ក៏ដូចជាបានគយគន់សម្រស់ភ្នំគូលែន ដែលឈរបង្អួតកាយយ៉ាងសង្ហារឹងមាំ។ទន្ទឹមនឹងនេះ ភ្ញៀវក៏នឹងបានគយគន់សម្រស់ថ្ងៃរះ និងថ្ងៃលិចដ៏ស្រស់ស្អាតផងដែរប្រសិនបើមេឃធ្លាក់ភ្លៀងទៀតនោះ ទីតាំងជាប់ជើងភ្នំនេះ នឹងមានពពកភ័ព្ទអណ្តែតចុះមកបង្ហាញខ្លួនជាក់ជាមិនខាន ត្បិតភូមិសាស្ត្រទីតាំងនេះមានលក្ខណៈអំណោយផលល្អណាស់។
មានទេសភាពស្អាតជាប់ចិត្ត ទីនេះក៏សម្បូរកន្លែងថតរូបស្អាតៗជាច្រើនផងដែរដូចជា ផ្ទះកញ្ចក់ ទោងអង្គុយលេង សួនផ្កាចម្រុះព័ណ៌ និងបឹងបួរ ហើយទីនេះក៏មានក្យូសសម្រាប់អង្គុយលេងដែលអាចអង្គុយបានចន្លោះ៧ ទៅដល់ ១០នាក់ និងប៉មខ្ពស់មួយសម្រាប់ឱ្យភ្ញៀវមើលទេសភាពជុំវិញទីនេះទៀតផង។
ចំពោះការស្នាក់នៅវិញ រមណីយដ្ឋានស្ពានពស់អូរមានជ័យ មានផ្ទះស្នាក់ចំនួន៣ប្រភេទជាប្រភេទផ្ទះបុរាណ លាយសម័យ (កំពុងស្ថិតក្នុងការរៀបចំដេគ័រ) និងមានតង់ធំចំនួន១៨ ដោយតង់តម្លៃ ២៨ដុល្លារ សម្រាប់មនុស្ស២នាក់ក្នុងនោះក៏មានភោជនីយដ្ឋានដែលបម្រើជូននូវម្ហូបអាហារជាច្រើន សម្រាប់ភ្ញៀវដែលមកកម្សាន្តជាពិសេសម្ហូបទាំងនេះ ធ្វើចេញពីកសិផលធម្មជាតិដែលដាំក្នុងរមណីយដ្ឋាននេះផ្ទាល់ដូចជាននោង ប៉េងប៉ោះ ល្ហុង ត្រកួន ស្វាយ និងដំណាំជាច្រើនទៀត។
ម្ចាស់រមណីយដ្ឋានស្ពានពស់អូរមានជ័យ លោក ឈរ ជ័យរតនះ បានប្រាប់សារព័ត៌មាន SR Digital Media ថា៖ «គោលបំណងដែលខ្ញុំបង្កើតកន្លែងនេះឡើងដោយសារតែខ្ញុំចង់ជួយលើកស្ទួយវិស័យទេសចរណ៍ក្នុងស្រុក ព្រោះស្រុកយើងមិនចាញ់ស្រុកគេទេមានធនធានធម្មជាតិស្រស់ស្អាតជាច្រើន ប៉ុន្តែមិនមានអ្នកយកមកកែឆ្នៃ អ៊ីចឹងហើយដោយសារតែខ្ញុំស្រលាញ់ធម្មជាតិទើបខ្ញុំបង្កើតវាឡើង»។
លោកបានបន្ថែមថា ការបង្កើតទីកម្សាន្តក្នុងទឹកដីស្រុកស្វាយលើនេះមិនត្រឹមតែផ្សព្វផ្សាយពីរមណីយដ្ឋានស្ពានពស់ អូរមានជ័យប៉ុណ្ណោះទេ តែវាក៏បានរួមចំណែកជួយផ្សព្វផ្សាយពីតំបន់ស្រុកស្វាយលើទាំងមូលផងដែរតាមរយៈការមកលេងរបស់ភ្ញៀវទេសចរ ក្រៅពីនេះទីតាំងរបស់លោក ក៏បង្កើតការងារជូនដល់បងប្អូនប្រជាសហគមន៍ក្នុងតំបន់ផងដែរដើម្បីសម្រួលដល់ជីវភាពរស់នៅប្រចាំថ្ងៃ។
គួរបញ្ជាក់ថា ទេសភាពនៅទីនេះ ស្រស់ស្អាតបំផុតចាប់ពីខែកញ្ញាដល់ខែវិច្ចកា ព្រោះធម្មជាតិនៅទីនេះ កំពុងរីកស្គុសស្គាយ ហើយអាកាសធាតក៏ត្រជាក់ល្អតួយ៉ាលវាលស្រែព័ណ៌បៃតងខ្ចី នឹងចាប់ផ្តើមប្តូររូបកាយ ក្លាយជាព័ណ៌មាសវិញម្តងហាក់ដូចជាទីនេះក្រាលក្របស្រោបដោយមាសដូច្នេះដែរ។ ចំណែកពេលរាត្រីវិញ អ្នកទេសចរច្បាស់ជាបានសប្បាយក្នុងចិត្តយ៉ាងអនេក ដោយអង្គុយញ៉ាំអាហារ, ជជែកគ្នាសប្បាយ និងបានរាំលេងជុំវិញភ្នក់ភ្លើង ក្រោមពន្លឺព្រះចន្ទ និងហ្វូងផ្កាយដ៏ស្រស់ស្អាត។
រមណីយដ្ឋាន ស្ពានពស់អូរមានជ័យ ទឹកដីស្វាយ មានទីតាំងស្ថិតនៅភូមិអូរមានជ័យឃុំស្វាយលើ ស្រុកស្វាយលើ ខេត្តសៀមរាប ចម្ងាយពីប្រាសាទបឹងមាលាប្រហែល៥គីឡូម៉ែត្រដោយខាងឆ្វេងដៃមានខ្លោងទ្វារសាលាបឋមសិក្សាអូរមានជ័យ រួចធ្វើដំណើរចូលតាមខ្លោងទ្វារសាលាតម្រង់ទៅរកជើងភ្នំចម្ងាយ១.៧គីឡូម៉ែត្រ។ ទំនាក់ទំនងគេហទំព័រហ្វេសប៊ុក ស្ពានពស់អូរមានជ័យ ទឹកដីស្វាយលើឬទំនាក់ទំនងលេខទូរសព្ទ៖ 061 313 637 / 070 313 637៕
ទីតាំង៖ ស្ពានពស់ អូរមានជ័យ ទឹកដីស្វាយលើ
.jpg)
