ការសម្រកទម្ងន់ដែលមានសុវត្ថិភាពទាមទារពេលវេលា និងការទទួលខុសត្រូវខ្ពស់។ ការសម្រកទម្ងន់ដែលមានសុវត្តិភាព និងប្រសិទ្ធភាពចំពោះសុខភាព ត្រូវអនុវត្តតាមវិធីសាស្ត្រដ៏មានតុល្យភាពមួយ ដែលពាក់ព័ន្ធទៅនឹងការកែសម្រួលរបបអាហារបន្តិចម្តងៗផ្សំជាមួយសកម្មភាពរាងកាយជាប់លាប់ជាពិសេសការផ្លាស់ប្តូររបៀបរបបរស់នៅតែម្តង។
ថ្ងៃនេះ SR News និងលើកយកចំណុចសំខាន់ៗមួយចំនួនដែលវិទ្យាស្ថានស្រាវជ្រាវសុខភាពល្បីៗដូចជាCDC និង Mayo Clinic បានណែនាំសម្រាប់អ្នកដែលចង់សម្រកទម្ងន់ប្រកបដោយសុវត្តិភាព។
ចំណុចសំខាន់ៗសម្រាប់ការសម្រកគីឡូដែលមានសុវត្ថិភាពរួមមាន៖
១. ក្នុងមួយសប្តាហ៍សម្រកគីឡូត្រឹមតែ (០.៥ - ១ គីឡូក្រាម)
ក្នុងមួយសប្តាហ៍សម្រកគីឡូប្រហែល០.៥ - ១ គីឡូក្រាម គឺមានសុវត្ថិភាពស្របតាមការណែនាំរបស់ក្រសួងសុខាភិបាល។ វាក៏ជាកម្រិតដែលផ្តល់លទ្ធផលល្អ និងសុវត្តិភាពយូរអង្វែង ជាងការបន្ថយទម្ងន់បែបស្រកលឿនក្នុងរយៈពេលដ៏ខ្លី។
២. បរិភោគអាហារដែលមានសារធាតុចិញ្ចឹមគ្រប់គ្រាន់
ព្យាយាមបរិភោគចំណីអាហារដែលមានសារធាតុចិញ្ចឹមគ្រាប់គ្រាន់និងផ្តល់ថាមពលល្អសម្រាប់រាងកាយ។ ចំណីអាហារពិសេសៗទាំងអស់នោះមានដូចជាបន្លែ ផ្លែឈើ ត្រី សាច់ និងប្រភេទអាហារដែលមានសារធាតុចិញ្ចឹមសំខាន់ៗគ្រប់គ្រាន់។
៣. ផឹកទឹកឲ្យបានច្រើន
ការផឹកទឹកច្រើនអាចជួយឱ្យអ្នកមានអារម្មណ៍ឆាប់ឆ្អែតហើយកាត់បន្ថយចំណង់ទទួលទានអាហារ។ លើសពីនេះទឹកក៏ជួយបង្កើនមុខងារប្រព័ន្ធរំលាយអាហារឱ្យកាន់តែប្រសើរផងដែរ។
៤. ការធ្វើលំហាត់ប្រាណទៀងទាត់
ការធ្វើលំហាត់ប្រាណទៀងទាត់ធ្វើឱ្យសាច់ដុំរឹងមាំ និងជួយឱ្យអារម្មណ៍យើងចេះអត់ធ្មត់ច្រើនជាងមុន។ជាពិសេសលំហាត់ប្រាណថែមទាំងជួយបង្កើនកម្លាំងនិងសុខភាពឲ្យបានល្អប្រសើរ សម្រាប់ប្រព័ន្ធបេះដូង និងសសៃឈាមទៀតផង។
៥.គេងឱ្យបានគ្រប់គ្រាន់
ការគេងប្រហែល៧ ទៅ ៨ ម៉ោងក្នុងមួយយប់អាចជួយឱ្យយើងគ្រប់គ្រងអារម្មណ៍បានល្អ មានការចងចាំ កាត់បន្ថយភាពតានតឹង និងការបាក់ទឹកចិត្ត។ ការគេងគ្រប់គ្រាន់ក៏កាត់បន្ថយការឆាប់ឃ្លាន និងជួយសម្រួលដល់សុខភាពបានយ៉ាងល្អ។
៦. កាត់បន្ថយអាហារផ្អែម និងអាហារប្រើប្រាស់ខ្លាញ់ច្រើន
ការបរិភោគអាហារដែលផ្ទុកកាឡូរីច្រើនជាងតម្រូវការប្រចាំថ្ងៃអាចបង្កឲ្យឡើងទម្ងន់យ៉ាងឆាប់រហ័សឡើងវិញ។ ដូច្នេះការផ្លាស់ប្តូររបបអាហារទទួលទានមកជាប្រភេទអាហារបែបបន្លែ ផ្លែឈើ និងក្រុមអាហារសម្បូរជីវជាតិ អាចធ្វើឱ្យប្រព័ន្ធរាងកាយកាន់តែរឹងមាំនិងមិនងាយឡើងទម្ងន់។
ការអនុវត្តន៏តាមវិធីសាស្ត្រខាងលើជាជម្រើសប្រសើរជាងការសម្រកទម្ងន់ដោយបង្អត់អាហារខុសបច្ចេកទេសដែលនាំឱ្យប៉ះពាល់ដល់សុខភាព។ ការសម្រកទម្ងន់សន្សឹមៗដោយជ្រើសរើសប្រភេទអាហារ ធ្វើលំហាត់ប្រាណ ទទួលទានដំណេកគ្រប់គ្រាន់ គឺជាវិធីសម្រកដ៏ត្រឹមត្រូវចំពោះសុខភាពរាងកាយ៕
.jpeg)
.jpg)
