ភ្នំពេញ: សំណល់កាកអំពៅជាច្រើនតោន ត្រូវបានលោកតាំង សុជាតិ ប្រមូលយកមកកែច្នៃ និងផលិតបានចេញជាចានក្រដាស ដែលគុណភាពខ្ពស់ ក្នុងគោលបំណងកាត់បន្ថយការនាំចូលផលិតផលពីបរទេស និងដើម្បីប្រកួតប្រជែងលើទីផ្សារ។
លោក តាំង សុជាតិ ប្រធានក្រុមហ៊ុន អិម ជី ផេស៊ីហ្វិកបានឱ្យដឹងថា ផលិតផលចានក្រដាសនេះ មានគុណភាពខ្ពស់ និងកម្រាស់ក្រាស់ ដែលរក្សាទុកបានចន្លោះពី៥ឆ្នាំ ទៅ៦ឆ្នាំ ហើយនៅតែរក្សាបានទ្រង់ទ្រាយដើមដដែល ជាពិសេសវាធន់នឹងកម្ដៅដោយសារ ចានក្រដាសនេះ ត្រូវបានដុតដោយកម្តៅភ្លើងខ្លាំង។
លោកបញ្ជាក់ប្រាប់សារព័ត៌មាន SR យ៉ាងដូច្នេះថា៖ «កាកអំពៅអាចចាក់ជាបន្ទះៗបានដោយសារ កាកអំពៅមានសារ ជាតិសរសៃ ដែលធ្វើឲ្យវាប្រទាក់ក្រឡាគ្នា ខាំស្អិតជាប់គ្នានេះជាអំណោយ ពីធម្មជាតិ ដោយយើង មិនបាច់ប្រើកាវ ដើម្បីឲ្យវាស្អិតជាប់គ្នានោះទេអ៊ីចឹងវាល្អ និងជាប់ធន់ ហើយយើងក៏ដុតចាននេះ ជាមួយម៉ាស៊ីនស្វ័យប្រវត្តិ ក្នុងសីតុណ្ហភាពរហូតដល់២០០អង្សា សេឯណោះ»។
ក្រុមហ៊ុនដែលមានបុគ្គលិកប្រមាណ៥នាក់នេះអាចផលិតចានបានចន្លោះ ៥០០ ទៅ១០០០ចានក្នុងមួយថ្ងៃ ដោយចានត្រូវបានវេចខ្ចប់ក្នុង១ឈុតមានចំនួន ៥០ចាន ដែលលក់ក្នុងតម្លៃ ២ ម៉ឺនរៀល និងមានលក់នៅតាមម៉ាត ផ្សារ និងផ្សារទំនើប។
ដំណើរការនៃការផលិតចានចេញពីកាកសំណល់កាកអំពៅនេះប្រធានសិប្បកម្មផលិតចាន បានរៀបរាប់ថា៖ «យើងយកកាកអំពៅណាពណ៌សម្បុរល្អមក ហាលវាឲ្យស្ងួត និងស្រួយ ហើយកាត់វាខ្លីៗដាក់ក្នុងម៉ាស៊ីនកំទេចឲ្យល្អិតៗរួចលាងទឹកវាឲ្យស្អាត ស្ងោរក្នុងឆ្នាំងធំមួយ ដោយផ្អាប់ទុក២០ថ្ងៃ ឲ្យវាពុកផុយចេញជាតិអាស៊ីតអស់ រួចយកទៅកូរក្នុងម៉ាស៊ីន ឱ្យចេញជាម្សៅ រួចចាក់ជាបន្ទះៗប្រើកម្លាំងម៉ាស៊ីន២០តោន សង្កត់ឲ្យវាខាំស្អិតជាប់គ្នា បានយកទៅសម្ងួតឲ្យស្ងួតចុងក្រោយដាក់វាចូលក្នុងពុម្ភចាន ប្រើកម្ដៅដុត២០០អង្សាសេ ទើបចេញជាលទ្ធផល»។
លោកតាំង សុជាតិ បញ្ជាក់ថា ចានក្រដាសរបស់លោកមានទីផ្សារល្អប្រសើរ ដោយទទួលបានគាំទ្រច្រើន ប៉ុន្តែមានបញ្ហាចម្បងមួយ គឺសោភ័ណភាពព្រោះចានក្រដាសដែលផលិតចេញពីកាកអំពៅនេះ មានសភាពគ្រើម និងមានពណ៌ប្រផេះ ឬក្រម៉ៅដែលខុសពីចានដ៏ទៃដែលមានពណ៌ស រលោង ដែលចំណុចធ្វើឱ្យអតិថិជនមួយចំនួនគិតថាចាននេះហាក់ពុំសូវមានអនាម័យ ប៉ុន្តែលោកអះអាងថា ចាននេះ បានដុតក្នុងសីតុណ្ហភាពលើសពី ១០០អង្សាសេដោយពុំមានមេរោគណាអាចរស់នៅបាន ឡើយ។
ទាក់ទងនឹងការបង្កើតចានផលិតចេញពីកាកអំពៅនេះបុរសវ័យ៤០ឆ្នាំខាងលើ បានរំឭកថា៖« ខ្ញុំធ្លាប់បានឆ្លងកាត់ការសិក្សាជាច្រើនមកហើយទាក់ទងនឹងការធ្វើចានអំពីដើមចេក ដើមឬស្សីនិងដើមក្រចៅ អ៊ីចឹងនៅក្នុងឆ្នាំ២០១៣ ខ្ញុំចាប់យកកាកអំពៅធ្វើជាចានជំនួសវិញព្រោះវាសម្បូរ និងងាយស្រួលរក ហើយកាកអំពៅមានសារធាតុសរសៃស្រដៀងទៅនឹងដើមឫស្សីដែរចាប់ធ្វើដំបូង ខ្ញុំត្រូវកែច្នៃម៉ាស៊ីនដើម្បីផលិតចាន ព្រោះយើងអត់មានម៉ាស៊ីនពិបាករកអ្នកបច្ចេកទេស ណាស់ ហើយម៉ាស៊ីនស្វ័យប្រវត្តិទាំងអស់ ខ្ញុំអភិវឌ្ឍន៍ពីមួយថ្ងៃទៅមួយថ្ងៃ ដល់បច្ចុប្បន្ន»។
នាពេលខាងមុខ លោក តាំង សុជាតិ មានគម្រោងក្នុងការផលិតកែវក្រដាសទុយោបឺតធ្វើពីក្រដាស និងគ្រោងដាំដើមឫស្សី ដើម្បីលក់កាបូន និងយកដើមឬស្សីចាស់ៗមកផលិតជាក្រដាសក្រដាសអនាម័យ ក្រដាសសម្រាប់ប្រើប្រាស់នៅក្នុងការិយាល័យ ជាដើម។
គួរបញ្ជាក់ថា ក្រុមហ៊ុន អិម ជី ផេស៊ីហ្វិកមានទីតាំងស្ថិតនៅផ្ទះលេខ ១៤អា ផ្លូវ៥០០ សង្កាត់ផ្សារដើមថ្កូវ ខណ្ឌដូនពេញ រាជធានីភ្នំពេញ។ទំនាក់ទំនងគេហទំព័រហ្វេសប៊ុក MG Pacific Company Limited ឬលេខទូរសព្ទ៖ ០២៣ ២២១ ៣៣៥/០៩៣២៤៦ ៦៦៨៕
.jpg)
.jpg)
