.jpg)
ភ្នំពេញ៖ ឆ្លើយតបនឹងតួរលេខស្លាប់ដោយសារជំងឺឆ្កែឆ្កួតនៅកម្ពុជាយុទ្ធនាការការចាក់វ៉ាក់សាំងការពារជំងឺឆ្កែឆ្កួតឥតគិតថ្លៃ នឹងធ្វើឡើងចំពោះសត្វសុខននៅ រាជធានីភ្នំពេញ ខេត្តកណ្តាល និងខេត្តបាត់ដំបង ចាប់ពីថ្ងៃទី ២១ តុលា ដល់ថ្ងៃទី ១ វិច្ឆិកា ២០២៤។
ក្រុមចាក់វ៉ាក់សាំងមានចំនួនប្រមាណជិត ៣០០នាក់ នឹងទៅដល់តាមសហគមន៍ពីផ្ទះមួយទៅផ្ទះមួយ ដែលនេះជាផ្នែកនៃកិច្ចខិតខំប្រឹងប្រែងដើម្បីការពារជីវិតមនុស្ស និងសត្វពីជំងឺឆ្កែឆ្កួត។
.jpeg)
លោក Keiichiro Tazawa មន្ត្រីគម្រោងអន្តរជាតិនៃអង្គការផ្តល់សេវាបសុពេទ្យអន្តរជាតិបានប្រាប់សារព័ត៌មាន SR News ថា៖ «ឆ្នាំនេះ យើងកំពុងធ្វើការជាមួយអគ្គនាយកដ្ឋានសុខភាពសត្វអង្គការសង្គ្រោះសត្វកម្ពុជា និងសាកលវិទ្យាល័យក្នុងស្រុក ដើម្បីចាក់វ៉ាក់សាំងលើសត្វឆ្កែជាង ៧០% នៃចំនួនសត្វឆ្កែទាំងអស់នៅក្នុងខេត្តចំនួន ៣ គឺរាជធានីភ្នំពេញ បាត់ដំបងនិងកណ្តាល»។
លោកបានបន្តទៀតថា៖ «យើងមានក្រុមមនុស្សចំនួន២៨៧ នាក់ដែលដើរពីផ្ទះមួយទៅផ្ទះមួយ ដើម្បីផ្តល់ថ្នាំបង្ការជំងឺឆ្កែឆ្កួតដោយឥតគិតថ្លៃដល់សត្វឆ្កែទាំងអស់ដែលពួកគេជួបប្រទះ»។
យុទ្ធនាការនេះក៏ត្រូវបានបញ្ចូលក្នុងផែនការនៃយុទ្ធសាស្ត្រថ្នាក់ជាតិសម្រាប់ការគ្រប់គ្រងនិងលុបបំបាត់ជំងឺឆ្កែឆ្កួតនៅកម្ពុជា ដែលត្រូវដឹកនាំដោយអគ្គនាយកដ្ឋានសុខភាពសត្វនិងផលិតកម្មសត្វ (GDAHP) និងអង្គការបេសកកម្មជំងឺឆ្កែឆ្កួត ជាគម្រោងរបស់អង្គការសប្បុរសធម៌បសុពេទ្យអន្តរជាតិនិងអង្គការសង្ក្រោះសត្វនៅកម្ពុជាផងដែរ។
.jpeg)
យោងតាមអង្គការសុខភាពពិភពលោក ជំងឺឆ្កែឆ្កួតបានសម្លាប់មនុស្សប្រហែល ៥៩០០០ នាក់ នៅទូទាំងពិភពលោកជារៀងរាល់ឆ្នាំ។ នៅកម្ពុជាជំងឺឆ្កែឆ្កួតបានឆក់យកជីវិតមនុស្សប្រមាណ ៨១០ នាក់ក្នុងមួយឆ្នាំធ្វើឱ្យប្រទេសនេះមានអត្រាស្លាប់ខ្ពស់។ នេះបើយោងតាមអង្គការបេសកកម្មជំងឺឆ្កែឆ្កួត (Mission Rabies)។
មន្ត្រីគម្រោងអន្តរជាតិនៃអង្គការផ្តល់សេវាបសុពេទ្យអន្តរជាតិឆ្កែខាំ គឺជាមូលហេតុចម្បងនៃជំងឺឆ្កែឆ្កួតចំពោះមនុស្ស។ តាមការប៉ាន់ស្មាននៅកម្ពុជា មនុស្សជាង ៣០ម៉ឺននាក់ត្រូវបានឆ្កែខាំជារៀងរាល់ឆ្នាំប៉ុន្តែមិនមែនគ្រប់គ្នាសុទ្ធតែអាចទទួលបានការព្យាបាលក្រោយពេលខាំនោះទេ។
សញ្ញានៃជំងឺឆ្កែឆ្កួតនៅក្នុងសត្វសុខន ឬថនិកសត្វផ្សេងទៀតមានដូចជា ខឹងម៉ួម៉ៅ ការផ្លាស់ប្តូរការព្រុស ការខាំ ចលនាសកម្មភាពប្លែកៗ ការហៀរទឹកមាត់និងការស្លាប់ដោយមិនបានរំពឹងទុក។
បើសង្កេតឃើញអាការៈទាំងនេះសាធារណជនត្រូវបានស្នើឱ្យរាយការណ៍អំពីសត្វដែលសង្ស័យថាមានជំងឺឆ្កែឆ្គួត
ឬទំនាក់ទំនងទៅកាន់លេខ ១១៥ ដើម្បីទទួលការផ្ដល់ដំបូន្មាន និងការប្រឹក្សាពីសុខភាពមនុស្សអំពីជំងឺឆ្កែឆ្កួតបាន។
មន្ត្រីគម្រោងអន្តរជាតិរូបនេះបានលើកឡើងថាជំងឺឆ្កែឆ្កួត គឺ ៩៥% នៃករណីកើតឡើងនៅអាស៊ី និងអាហ្វ្រិក។ ទោះបីជាមានភាពធ្ងន់ធ្ងរក៏ដោយជំងឺឆ្កែឆ្កួតអាចការពារបាន ១០០% តាមរយៈការការពារមុនការប៉ះពាល់ (PrEP) ឬការការពារក្រោយការប៉ះពាល់ (PEP) ដែលរួមមានការលាងមុខរបួសការចាក់វ៉ាក់សាំងការពារជំងឺឆ្កែឆ្កួត និង immunoglobulin ជំងឺឆ្កែឆ្កួត។
.jpeg)
យុទ្ធនាការឆ្នាំ ២០២៤ ត្រូវបានបន្តពីគម្រោងកាលឆ្នាំ២០២៣ ដែលកាលពីឆ្នាំមុន សត្វសុខនចំនួន ៧៤៩៨៣ ក្បាលត្រូវបានចាក់វ៉ាក់សាំងក្នុងអំឡុងពេលយុទ្ធនាការត្រឹមតែរយៈពេល ១០ ថ្ងៃនៅក្នុងទីក្រុងភ្នំពេញ និងខេត្តកណ្តាល ដែលធ្វើឱ្យមានការប្រសើរឡើងយ៉ាងខ្លាំងនៅក្នុងការគ្រប់គ្រងការចម្លងជំងឺឆ្កែឆ្កួតនៅកម្ពុជា។
យុទ្ធនាការនេះដែរមានអ្នកស្ម័គ្រចិត្តកម្ពុជានិងអន្តរជាតិ ជាផ្នែកមួយនៃក្រុមចាក់វ៉ាក់សាំងដោយផ្ទាល់តែម្តង ដោយក្នុងនោះមាននិស្សិតពេទ្យសត្វចូលរួមពីសាកលវិទ្យាល័យភូមិន្ទកសិកម្មនិងវិទ្យាស្ថានជាតិកសិកម្ម។
.jpeg)
ដៃគូសំខាន់ៗផ្សេងជាច្រើនទៀត រួមមាន វិទ្យាស្ថានជាតិសុខភាពសាធារណៈ (NIPH) និងនាយកដ្ឋានប្រយុទ្ធនឹងជំងឺឆ្លងក្រសួងសុខាភិបាល ដែលបានផ្តល់ថ្នាំបង្ការមុនពេលប៉ះពាល់សត្វសុខនដល់អ្នកស្ម័គ្រចិត្តទាំងអស់និងសមាគមសុខុមាលភាពសត្វភ្នំពេញ (PPAWS) ជាមួយអង្គការសង្គ្រោះសត្វកម្ពុជា (ARC) សម្រាប់ការផ្តល់ការព្យាបាលសត្វ។
ក្រៅពីការចាក់វ៉ាក់សាំងឆ្កែឆ្កួតដល់សុនខឆ្នាំនេះក៏មានការផ្តល់ជូនបន្ថែមទៀតនូវសេវាគ្រៀវសត្វសុខនដោយឥតគិតថ្លៃនៅទីតាំងសាកលវិទ្យាល័យភូមិន្ទកសិកម្ម។
លោក Keiichiro Tazawa បានប្រាប់បន្តថា៖«សេវាកម្មនេះសម្រាប់សត្វសុខនដែលមកពីខណ្ឌដង្កោនៅរាជធានីភ្នំពេញ ហើយនឹងចាប់ពីថ្ងៃទី ២១ ខែតុលា ដល់ថ្ងៃទី ៨ ខែវិច្ឆិកា ឆ្នាំ២០២៤»។
ការចាក់ថ្នាំបង្ការធានាបាននូវការការពារក្រោយការប៉ះពាល់ និងត្រូវបានចាត់ទុកថាជាវិធីសាស្ត្រដ៏មានប្រសិទ្ធភាពបំផុតក្នុងការទប់ស្កាត់ការស្លាប់ដោយជំងឺឆ្កែឆ្កួតរបស់មនុស្សដោយការពារការចម្លងជំងឺពីប្រភពរបស់វា។
.jpeg)
ទំនាក់ទំនងដើម្បីទទួលព័ត៌មានបន្ថែមតាមរយៈទំព័រហ្វេសប៊ុក Mission Rabies Cambodia ឬតេលេក្រាម +85510804176 https://t.me/missionrabiescambodia៕
.jpg)
.jpg)
