បន្ទាយមានជ័យ:មានទីតាំងស្ថិតនៅភូមិអន្លង់ត្រាច ឃុំថ្មពួក ស្រុកថ្មពួក ខេត្តបន្ទាយមានជ័យ សហគមន៍កសិកម្មកម្ពុជាមានជ័យបានចងក្រងកសិករក្នុងតំបន់ មកចិញ្ចឹមគោតាមបែបធម្មជាតិ ដើម្បីយកសាច់ផ្គត់ផ្គង់លើទៅផ្សារក្នុងស្រុក។
លោក រស់ មុនិន្ទៈ ប្រធានក្រុមប្រឹក្សាភិបាលនិងជាអ្នកបង្កើតសហគមន៍កសិកម្មកម្ពុជាមានជ័យ បានប្រាប់សារព័ត៌មាន SR Digital Media ឱ្យដឹងថា សហគមន៍កសិកម្មកម្ពុជាមានជ័យ គឺជាសហគមន៍កសិកម្មទំនើបបង្កើតឡើងនៅខែធ្នូ ឆ្នាំ២០២៣ ក្នុងគោលបំណងចងក្រងជាកម្លាំងតែមួយនៃប្រជាកសិករអ្នកចិញ្ចឹមគោដើម្បីធ្វើការចិញ្ចឹម និងផ្គត់ផ្គង់នូវតម្រូវការសាច់គោ ឱ្យបានទាន់ពេលវេលា និងត្រូវធានានូវនិរន្តរភាពព្រោះការចិញ្ចឹមសត្វគោត្រូវប្រើប្រាស់ពេលវេលាយូរ។
លោកបញ្ជាក់ដូច្នេះថា៖«តាមពិតខ្ញុំជាមេធាវី មិនមែនជាកសិករទេ តែខ្ញុំមានដី៣ឬ៤រយហិកតា ខ្ញុំដាំដើមកូនឈើ ដើមប្រេងខ្យល់ ហើយខ្ញុំឃើញជុំវិញហ្នឹងគេចិញ្ចឹមគោច្រើនមានស្មៅ និងមានសក្កានុពល អ៊ីចឹងខ្ញុំក៏ផ្តើមដាក់គោចិញ្ចឹមដែរ ពេលនោះខ្ញុំចេះតែតាមដាននិងស្រាវជ្រាវពីទីផ្សារគោ ខ្ញុំក៏រកឃើញថាអ្នកចិញ្ចឹមគោមានការលំបាក រួចខ្ញុំបានសិក្សាពីបញ្ហាទាំងអស់នោះដំណោះស្រាយមានតែបង្កើតសហគមន៍ឡើង ដើម្បីឱ្យទីផ្សារគោហ្នឹងធំ យើងរួមគ្នាងាយស្រួលផ្គត់ផ្គង់ទីផ្សារដែលយើងរួមទុន រួមគ្រប់គ្រង រួមប្រើប្រាស់»។
ក្រោយពីបង្កើតសហគមន៍រួចប្រធានក្រុមប្រឹក្សាភិបាលរូបនេះរៀបរាប់ពីផលលំបាកថា អំឡុងពេលបង្កើតសហគមន៍ដំបូងកសិករចិញ្ចឹមគោជាច្រើនក្នុងតំបន់ បានបោះបង់ការចិញ្ចឹមគោជាបណ្តើរៗ ព្រោះការចិញ្ចឹមគោនាគ្រានោះហាក់ពុំសូវមានទីផ្សារ។ ចំណុចទី២ លោកពិបាកក្នុងការពន្យល់ ប្រជាកសិករឱ្យត្រឡប់មកចិញ្ចឹមគោវិញនិងចូលជាសមាជិកសហគមន៍ ត្បិតពួកគេហាក់គ្មានទំនុក ចិត្តលើសហគមន៍ ដោយសារបញ្ហាដែលបានប្រទះនាពេលកន្លងមកតែទោះយ៉ាងណាក្តី មកដល់ពេលនេះ ផលលំបាកខាងលើនេះលែងជាបញ្ហាចោទសម្រាប់លោកទៀតហើយ ព្រោះការចិញ្ចឹមគោមានទីផ្សារល្អ ហើយអ្នកចិញ្ចឹមគោមានការកើនឡើងនិងចូលជាសមាជិកសហគមន៍ច្រើន។
សហគមន៍កសិកម្មកម្ពុជាមានជ័យនេះសមាជិកសរុបចំនួន ៤០ គ្រួសារ និងមានគោប្រមាណ២០០០ក្បាល ដែលការចិញ្ចឹមគោមានលក្ខណៈពិសេសគឺប្រជាសហគមន៍ទាំងមូលប្រើក្រោលគោសុខភាព ដែលផ្ដល់នូវការថែទាំ ការអនុវត្តការការពារជំងឺការគ្រប់គ្រង ការផ្តល់ចំណីអាហារ និងទឹក ដែលប្រកបដោយអនាម័យនិងសុវត្តិភាព និងមានពេទ្យសត្វជំនាញច្បាស់លាស់ក្នុងការពិនិត្យតាមដានផងដែរ។
សម្រាស់ពូជសត្វគោ ដែលត្រូវបានយកមកចិញ្ចឹមក្នុងសហគមន៍កសិកម្មកម្ពុជាមានជ័យបានមកពីការបង្កាត់ពូជ រវាងសត្វគោក្នុងស្រុក និងសត្វគោបរទេស ព្រោះការបង្កាត់ពូជបែបនេះនាំមកនូវផលប្រយោជន៍ជាច្រើនដូចជា សត្វគោសម្បូរសាច់, លូតលាស់លឿន,ធន់នឹងអាកាសធាតុ និងមានទីផ្សារល្អ បើប្រៀបធៀបជាមួយគោខ្មែរដែលមានមាឌតូច, ឆ្អឹងច្រើន និងមិនសូវសម្បូរសាច់។
លោកបន្តថា៖ «ចំពោះសាច់គោវិញមានគុណភាពខ្ពស់ សាច់គោយើងស្រស់ ឆ្ងាញ់ និងផុយ ដោយសារ យើងចិញ្ចឹមក្នុងស្រុកជាលក្ខណៈធម្មជាតិដែលគិតគូដល់សុខភាពអ្នកបរិភោគ គ្មានផលប៉ះពាល់សុខភាព ព្រោះយើងបានបង្កើតវិធានមួយដែលយកចិត្តទុកដាក់តាំងពីចិញ្ចឹមមើលថែក្នុងកសិដ្ឋានរហូតដល់ សាច់គោ ដាក់លើចាន»។
ប្រធានសហគមន៍រូបនេះបានឱ្យដឹងថាសាច់គោដែលស្ថិតក្នុងស្តង់ដាលក់ ត្រូវមានទម្ងន់ចាប់ពី៤០០ គីឡូក្រាមឡើងទៅ ដោយក្នុងនោះសាច់ចំឡក១គីឡូក្រាម មានតម្លៃ ៤៤០០០ រៀល, ឆ្អឹងជំនី១គីឡូក្រាម ១៣២០០រៀល,សាច់ភ្លៅ១គីឡូក្រាមថ្លៃ ៣៧៤០០រៀល និងលិង្គគោ១គីឡូក្រាមថ្លៃ៣៧៤០០រៀល និងមានសាច់ជាច្រើនប្រភេទទៀត។
ទាក់ទងនឹងទីផ្សារវិញ លោករស់ មុនិន្ទៈ បានឱ្យដឹងថា៖ «សាច់គោ គឺយើងលក់នៅក្នុងក្របខណ្ឌសហគមន៍មានន័យថា សមាជិកងផ្គត់ផ្គង់ទៅឲ្យសហគមន៍ ហើយសហគមន៍បានចែកចាយទៅដល់ហាងមួយចំនួនដែលជាដៃគូនៅទីក្រុងភ្នំពេញ ចំពោះការប្រកួតប្រជែងសាច់ វាមិនសូវជាមានបញ្ហាចោទនោះទេព្រោះវាជាសេដ្ឋកិច្ចទីផ្សារសេរី សំខាន់គុណភាពសាច់យើងស្រស់ ឆ្ងាញ់ ហើយចិញ្ចឹមក្នុងស្រុកចំណាយថ្លៃដើមទាប»។
សម្រាប់ថ្ងៃអនាគត ប្រធានក្រុមប្រឹក្សាភិបាលរូបនេះបានបង្ហាញពីបំណងក្នុងការពង្រីកសហគមន៍ឱ្យកាន់តែធំ និងពង្រីកទីផ្សារផ្គត់ផ្គង់សាច់គោឱ្យកាន់តែទូលំទូលាយផងដែរដោយលោកនឹងធ្វើការចែករំលែកពីចំណេះដឹង និងបច្ចេកទេសក្នុងការចិញ្ចឹមគោនេះ ព្រោះការចិញ្ចឹមគោយកសាច់នៅតែមានតម្រូវច្រើននិងពុំសូវមានអ្នកចិញ្ចឹមច្រើនឡើយ៕
.jpg)
.jpg)
.jpg)