ភ្នំពេញៈ បច្ចុប្បន្នកុមារកម្ពុជាចំនួនជិត៧០០នាក់ បានកើតជំងឺទឹកនោមផ្អែមប្រភេទ១ ដែលកុមារទាំងនោះភាគច្រើន មានអាយុចន្លោះពី ៤ ទៅ ១៤ឆ្នាំ។ នេះបើតាមលោកសាស្ត្រាចារ្យ ឃុន លាងឈុន អនុប្រធានមន្ទីរពេទ្យជ័យវរ្ម័នទី៧ ថ្លែងប្រាប់អ្នកសារព័ត៌មាន កាលពីថ្ងៃទី ០២ ខែកក្កដា ឆ្នាំ ២០២៤។
លោកសាស្ត្រាចារ្យ លាងឈុន បានពន្យល់ថា ជំងឺទឹកនោមផ្អែម គឺជាជំងឺដែលបណ្តាលមកពីការខ្វះខាតអាំងស៊ុយលីន ឬលំពែងមិនផលិតអាំងស៊ុយលីនគ្រប់គ្រាន់ ដូច្នេះកុមារដែលមានជំងឺទឹកនោមផ្អែមនេះ នឹងស្តែងចេញនូវរោគសញ្ញាដូចជា អស់កម្លាំងហេវហត់ ឃ្លាន ហូបច្រើន ផឹកទឹកច្រើន ប៉ុន្តែស្គមស្គាំង និងនោមច្រើន ជាពិសេសបើក្នុងករណីព្យាបាលមិនទាន់ពេលវេលា កុមារអាចនឹងសន្លប់ ឬឈានដល់ការបាត់បង់ជីវិតទៀតផង។
ទាក់ទងនឹងមូលហេតុដែលនាំឱ្យកុមារកើតជំងឺទឹកនោមផ្អែមប្រភេទ ១នេះវិញ អនុប្រធានមន្ទីរពេទ្យ ជ័យវរ្ម័នទី៧ រូបនេះអះអាងថា៖ «អ្នកវិទ្យាសាស្ត្រតាំងពីមុនមកមិនទាន់រកឃើញមូលហេតុពិតប្រាកដទេ ប៉ុន្តែអ្នកវិទ្យាសាស្ត្រ បានសិក្សាលើអ្នកមានជំងឺទឹកនោមផ្អែមប្រភេទទី១ហ្នឹង មានកត្តាមួយចំនួនដូចជា កូនក្មេងដែលបៅទឹកដោះគោ, មួយទៀតកូនក្មេងដែលធ្លាប់កើតជំងឺផ្សេងៗ ដូចជាវីរុស ថ្ងៃក្រោយមានផលវិបាកដែលនាំឱ្យកើតជំងឺទឹកនោមផ្អែមប្រភេទទី១នេះ ហើយមួយទៀត តំណពូជដែលបានពីម្តាយ ពីឪពុកមកក៏រកឃើញថា កូនក្មេងងាយកើតជំងឺទឹកនោមផ្អែមណាស់»។
វេជ្ជបណ្ឌិតឯកទេសជំងឺទឹកនោមផ្អែម លោកស៊ុំ សត្ថា បានឱ្យដឹងផងដែរថា កុមារដែលកើតជំងឺទឹក នោមផ្អែមប្រភេទទី១ អាចកើតឡើងដោយចៃដន្យដោយសារប្រព័ន្ធភាពស៊ាំរបស់អ្នកជំងឺ ទៅធ្វើឱ្យលំពែងខូច មិនអាចផលិតអាំងស៊ុយលីន និងគ្រប់គ្រងជាតិស្ករបាន ចំណែកការបរិភោគភេសជ្ជៈផ្អែម ក៏អាចធ្វើឱ្យកុមារកើតជំងឺនេះផងដែរ ហើយការចូលចិត្តហូបភេសជ្ជៈផ្អែម នឹងធ្វើឱ្យកុមារឡើងគីឡូ នៅពេលកុមារនោះធំពេញរូបពេញរាង អាចប្រឈមនឹងកើតជំងឺទឹកផ្អែមប្រភេទ២ផងដែរ។
លោកស្រី អ៊ីវ ម៉ាឡែន អនុប្រធានមន្ទីរពេទ្យគន្ធបុប្ផា បានប្រាប់ឱ្យដឹងនាពេលកន្លងមកថា ការកើតជំងឺ ទឹកនោមផ្អែមទាំងវ័យក្មេងនេះ អាចមកពីកត្តាមួយចំនួនដូចជា ទី១ ទាក់ទងនឹងកត្តាសេនេទិក ឬកត្តាហ្ស៊ែន ទី២ទាក់ទងនឹងកត្តាបរិស្ថានពាក់ព័ន្ធនឹងបញ្ហាអនាម័យ ឬអាហារការផ្លាស់ប្តូរអាកាសធាតុ និងបញ្ហាការរស់នៅជាមួយបរិយាកាសអួអាប់ ឬស្ត្រេស និងកត្តាជំងឺឆ្លងដោយវីរុសមួយចំនួនផងដែរ។
ទាក់ទងនឹងការព្យាបាល និងថែទាំង លោកស្រី អ៊ីវម៉ាឡែន ពន្យល់ថា អ្នកកើតជំងឺទឹកនោមផ្អែមប្រភេទទី១ គឺចាំបាច់ត្រូវប្រើអាំងស៊ុយលីនបន្ថែមពីខាងក្រៅ ដើម្បីឱ្យជួយទៅបំពេញមុខងារដែលខ្វះខាតទាំងនោះ បើទោះជាអ្នកជំងឺអាចរក្សាជាតិស្ករក្នុងខ្លួនបាន ដោយការបន្ថែមអាំងស៊ុយលីននេះពីខាងក្រៅក្ដី ក៏អ្នកជំងឺត្រូវគ្រប់គ្រងជាតិស្ករក្នុងខ្លួនឱ្យបានត្រឹមត្រូវជាប្រចាំថ្ងៃផងដែរ តាមរយៈការទទួលទានអាហារ និងការធ្វើកីឡាតាមការណែនាំរបស់ក្រុមគ្រូពេទ្យជំនាញ។
បើតាមលោកស្រី អ៊ីវ ម៉ាឡែន ការគ្រប់គ្រងជាតិស្ករក្នុងខ្លួនបានត្រឹមត្រូវ នឹងនាំឱ្យកុមារអាចមានសុខភាពល្អ និងបន្តរស់នៅជាធម្មតា តែបើការគ្រប់គ្រងជាតិស្ករមិនបានល្អ នឹងនាំឱ្យកុមារឆាប់វិវឌ្ឍទៅរកស្ថានភាពធ្ងន់ធ្ងរ ដូចជាការ ខូចភ្នែក តម្រងនោមលើសឈាម ប៉ះពាល់សរសៃឈាមតូចធំ និងប្រព័ន្ធប្រាសាទជាដើម។
បើតាមអនុប្រធានមន្ទីរពេទ្យគន្ធបុប្ផាអះអាងថា មន្ទីរពេទ្យគន្ធបុប្ជាទទួលព្យាបាលកុមារកើតជំងឺទឹកនោមផ្អែមចន្លោះពី៦០ ទៅ ៨០ ករណី ក្នុង ១ ឆ្នាំៗ ប៉ុន្តែនៅប៉ុន្មានឆ្នាំចុងក្រោយនេះ ចំនួនកុមារកើតជំងឺទឹកនោមផ្អែម ដែលមកស្វែងរកការព្យាបាលនៅមន្ទីរពេទ្យហាក់មានការកើនឡើង៕
.jpg)
.png)
