ភ្នំពេញៈ នាមួយរយៈពេលថ្មីចុងក្រោយនេះប្រជាពលរដ្ឋខ្មែរ បានបង្ហាញការរិះគន់ និងចាប់អារម្មណ៍ យ៉ាងខ្លាំងលើប្រធានបទ «ការធ្វើស្វ័យប្រកាសពីការដំឡើងនិងការប្រើប្រាស់ប្រព័ន្ធថាមពលពន្លឺ ព្រះអាទិត្យ» របស់អាជ្ញាធរអគ្គីសនីកម្ពុជាបើទោះបីជាមានការធ្វើសន្និសិទ្ធព័ត៌មានបកស្រាយ យ៉ាងណាក្តី។
ដើម្បីដោះស្រាយចម្ងល់និងការភាន់ច្រឡំ សារព័ត៌មានឌីជីថល SR Digital Media នឹងធ្វើការពន្យល់ ទាក់ទិននឹងប្រធានបទខាងលើ៖
១ អ្នកប្រើសូឡា មិនតម្រូវឱ្យធ្វើស្វ័យប្រកាស
ការប្រើប្រាស់សូឡាទាំងឡាយណាដែលមិនភ្ជាប់ជាមួយអគ្គីសនីជាតិ ពោលគឺប្រើប្រាស់ដាច់តែឯងមិនតភ្ជាប់ច្រឡូកច្រឡំជាមួយភ្លើងរដ្ឋ ដូចជាអំពូលសូឡាអំពូលតាមផ្លូវសាធារណៈ ឆ្នាំងដាំបាយ ម៉ាស៊ីនបូមទឹកគឺមិនបាច់ធ្វើការស្វ័យប្រកាសឡើយ។
២ អ្នកប្រើសូឡាដែលតម្រូវឱ្យធ្វើស្វ័យប្រកាស
ការប្រើប្រាស់សូឡាទាំងឡាយណាដែលភ្ជាប់ជាមួយអគ្គីសនីជាតិ ពោលគឺការប្រើប្រាស់ដោយមានការបំប្លែងថាមពលសូឡា និងភ្លើងរដ្ឋរួមបញ្ជូលគ្នាគឺតម្រូវឱ្យធ្វើស្វ័យប្រកាស ព្រោះការតច្រឡូកច្រឡំបែបនេះ នាំមកនូវហានិភ័យខ្លាំងបើធ្វើឡើងមិនត្រឹមត្រូវតាមលក្ខណៈបច្ចេកទេស។ (លក្ខខណ្ឌកត់ចំណាំៈការធ្វើស្វ័យប្រកាសក្នុងករណីនេះគឺទាល់តែអ្នកបានដំឡើងប្រព័ន្ធថាមពលសូឡាទំហំធំ លើសពី១០គីឡូវ៉ាត់ភ្ជាប់ជាមួយភ្លើងរដ្ឋប៉ុណ្ណោះ)។
៣ សារៈសំខាន់នៃការធ្វើស្វ័យប្រកាស
+ក្រុមការងារជំនាញរបស់អាជ្ញាធរអគ្គីសនីកម្ពុជា នឹងចុះមកពិនិត្យលក្ខណៈបច្ចេកទេសនៃការដំឡើងសូឡាភ្ជាប់ជាមួយខ្សែភ្លើងរដ្ឋ របស់អ្នកប្រើប្រាស់ដែលបានធ្វើស្វ័យប្រកាសដើម្បីតម្រូវឱ្យត្រឹមត្រូវតាមស្តង់ដារបច្ចេកទេស ព្រោះការដំឡើងសូឡាជាមួយភ្លើងរដ្ឋមួយចំនួនធ្វើឡើងដោយគ្មានលក្ខណៈបច្ចេកទេសត្រឹមត្រូវ។
+បង្ការហានិភ័យ និងដើម្បីគ្រប់គ្រងចរន្តព្រោះការតបណ្ដាញសូឡាជាមួយខ្សែភ្លើងជាតិដោយផ្ទាល់អាចធ្វើឱ្យជ្រាបចរន្តអគ្គិសនីទៅក្នុងខ្សែវិញ នោះនៅពេលដែលដាច់ចរន្តអគ្គិសនីដើម្បីជួសជុលផ្សេងៗអាចបង្កហានិភ័យដល់អាយុជីវិតអ្នកជួសជុលបណ្ដាញ, បន្ថែមពីនេះ ក៏អាចមានបញ្ហាដូចជាទុរស្សេខ្សែភ្លើង ឬបង្កជាគ្រោះអគ្គីភ័យនិងនាំឱ្យមានបញ្ហាទៅដល់បណ្តាញអគ្គីសនីជាតិផងដែរ។
+ដើម្បីគ្រប់គ្រងលំនឹងថាមពល ព្រោះព្រះអាទិត្យជួនលិច ជួនរះមិនទៀងដែលចំណុចនេះនឹងឱ្យ ប៉ះពាល់ដល់លំញ័រអគ្គិសនីឡើងចុះផងដែរជាហេតុនាំឱ្យមានរអាក់រអួល ឬដាច់ចរន្តអគ្គីសនីតែម្ដង។
+ងាយស្រួលក្នុងការផ្គត់ផ្គងបរិមាណថាមពល ដោយអាជ្ញាធរអគ្គីសនីនឹងអាចធ្វើការគិតគូ និងរក្សាទុកនូវថាមពលអគ្គីសនី ឱ្យបានសមស្របចំពោះអ្នកប្រើប្រាស់ កុំឱ្យមានបញ្ហាថាមពលអគ្គីសនី។
៤ ពុំមានការបង់ប្រាក់ ចំពោះការធ្វើស្វ័យប្រកាស
ការធ្វើស្វ័យប្រកាសពីការដំឡើងសូឡានេះ ពុំមានបង់ប្រាក់ឡើយ ប៉ុន្តែអ្នកដែលមិនបានធ្វើស្វ័យប្រកាសបញ្ជាក់ថាខ្លួនបានប្រើប្រាស់សូឡាភ្ជាប់ជាមួយអគ្គីសនីរដ្ឋ នឹងត្រូវចាត់ទុកថាជាអ្នកប្រើប្រាស់ដោយគ្មានការអនុញ្ញាតហើយត្រូវបង់ថ្លៃប៉ះប៉ូវឬប្រឈមនឹងការផ្អាកបណ្ដោះអាសន្ននូវការផ្គត់ផ្គង់អគ្គិសនីពីប្រភពបណ្ដាញជាតិ៕
.jpeg)
