ពិធីសែននំចាំង មានអត្ថន័យដូចម្តេច? សែនបែបណាទើប ត្រឹមត្រូវ?

ភ្នំពេញៈ នំចាំង ឬអន្សមចិន ឬបាក់ចាំង គឺជាអាហារចម្អាបមួយប្រភេទរបស់ជនជាតិចិនដែលធ្វើឡើង ពីអង្ករដំណើបលីងជាមួយប្រេងឆា មានស្នូលសាច់ជ្រូកបីជាន់ ឬសាច់ជ្រូកផាឡូវ,ពងទាប្រៃដែល យកតែពងក្រហមប៉ុណ្ណោះ,បង្គាក្រៀម, ផ្សិតស៊ីតាគិជាដើម ដោយខ្ចប់ជាមួយស្លឹកចេកឬ ស្លឹកឫស្សី ហើយចំហុយឱ្យឆ្អិន។

ការសែននំចាំង គឺមានអត្ថន័យតំណាងឱ្យភាពស្មោះត្រង់សច្ចៈ ចិត្តល្អ។ នៅពេលដែលអ្នកសែននំចាំង ជូនទេវតា គឺមានន័យថា អ្នកមនុស្សគោរពភាពសច្ចទៀងត្រង់ស្មោះល្អ ហើយអ្នកអាចបួងសួងផ្សង សុំសេចក្ដីសុខ និងបំណងប្រាថ្នាផ្សេងៗជាពិសេសគឺសូមជួបមនុស្សល្អៗឱ្យច្រើនក្នុងជីវិត។  

ក្បួនសែននំចាំងឱ្យបានត្រឹមត្រូវចំពោះទេវតាព្រះភូមិ កុងម៉ា ទេវតាក្នុងផ្ទះ អ្នកតាចង្ក្រាន៖

·     នំចាំង 1ចាន (ចន្លោះ 8 គ្រាប់នំ)

·     ស្ករស 1ចាន

·     តែក្ដៅ 3កែវ

·     ក្រដាសសែន 1 ឈុត(ដាក់ក៏បានអត់ក៏បាន)

·     ទៀនក្រហម 1 គូ

·     អុជធូប 3សសៃរក្នុងម្នាក់

ចំណែកការសែនសម្រាប់ជំនាងផ្ទះមាន៖

·     នំចាំង 1ចាន (ចន្លោះ 16 គ្រាប់នំ)

·     ស្ករស 1ចាន

·     តែក្ដៅ 5កែវ

·     ក្រដាសសែន 1 ឈុត(ដាក់ក៏បានអត់ក៏បាន)

·     ទៀនក្រហម 1 គូ

·     អុជធូប 5សសៃរក្នុងម្នាក់

ប្រវត្តិបុណ្យសែននំចាំង

កាលពីសម័យបុរាណក្នុងរាជការ ស្ដេច ឈូ (楚王)មានអ្នកប្រាជ្ញ កំណាព្យ និងជាទីប្រឹក្សាព្រះ មហាក្សត្រដែលមានឈ្មោះថាឆី យាន (屈原)តែងតែផ្ដល់យោបល់ល្អៗដល់ស្ដេច ឈូ។ ស្ដេច ឈូ តែងតែស្ដាប់ និងគោរពតាមយោបល់របស់ឆី យាន ហេតុនេះទើបធ្វើឱ្យមន្ត្រីដទៃទៀត កើតចិត្ត​ច្រណែន ចងគំនុំដោយតែងតែនិយាយអាក្រក់ចាក់រុកស្ដេច ឈូ ឱ្យស្អប់ ឆី យាន។

លុះក្រោយមក ស្ដេច ឈូ ផ្តើមលែងស្ដាប់យោបល់ ឆីយាន ហើយទ្រង់ក៏បានបណ្ដេញ ឆី យាន ឱ្យទៅរស់នៅតំបន់ដាច់ស្រយាលមួយជាមួយអ្នកភូមិធម្មតា។ត្បិតជាមន្ត្រីស្មោះត្រង់ ឆី យាន តែងតែ បារម្ភពីជោគវាសនានគរជានិច្ច ដែលធ្វើឱ្យរូបគេរស់នៅមិនបានសុខក្នុងចិត្តឡើយស្របពេលដែល ប្រជារាស្រ្ដកាន់តែក្រ ទាហានកាន់តែចុះខ្សោយ។

នាថ្ងៃមួយ ឆីយាន បានឈរនៅមាត់ទន្លេ ហើយមានលោកតានេសាទម្នាក់បានសួរលោកថា ហេតុអ្វីបានជាលោកមានទឹកមុខ ស្រងូតស្រងាត់ ខ្លាំងបែបនេះ? ឆី យានឆ្លើយវិញថា លោកបារម្ភពីនគរ ព្រោះអ្នកជុំវិញស្ដេច ឈូ សុទ្ធតែជាអ្នកដែលមិនគិតពីជាតិជាធំ ហើយគិតតែពីផលប្រយោជន៍ផ្ទាល់ខ្លួន។

លោកតានេសាទនោះនិយាយថាចុះហេតុអ្វីលោកមិននិយាយអ្វីដែលស្ដេចឈូចូលចិត្តស្ដាប់ទៅ?ឆី យាន ឆ្លើយថា លោកមិននិយាយ និងមិនធ្វើអ្វីទាំងអស់ជាពិសេសគឺរឿងក្បត់នគរ។ ថ្ងៃមួយ ឆី យាន កើតមានគំនិតចង់សម្លាប់ខ្លួន ពេលនោះលោកឱបដុំថ្មហើយលោតចូលក្នុងទន្លេ ស្លាប់បាត់ទៅ។ ពេលនោះ អ្នកភូមិបានចេញទូកជាច្រើនតាមរកលោកឆី យានតែរកមិនឃើញនោះទេ។

ចំនុចនេះ ក៏មានអ្នកខ្លះតំណាលបែបផ្សេងថា៖

ដោយសារតែប្រជាជនបារម្ភ ពី ឆីយាន ពេលលោកធ្លាក់ចូលទឹកពុំមានអ្វីហូប ប្រជាជនបាននាំគ្នា ពូនបាយបោះចូលក្នុងទន្លេ តែដោយសារតែឃើញបាយទាំងនោះ មិនបានធ្លាក់ដល់បាតទន្លេ ព្រោះមានត្រី សត្វក្នុងត្រីមកដណ្ដើមស៊ីអស់ ទើបប្រជាជននាំគ្នាយកស្លឹកឈើមកខ្ចប់ពីខាងក្រៅ ដើម្បីការពារកុំឱ្យមានសត្វស៊ី។ជារៀងរាល់ឆ្នាំ នៅថ្ងៃទី ៥ ខែ៥ ក្នុងប្រតិទិនចន្ទគតិ ឬប្រតិទិនចិនតែងតែមានទំនៀមទម្លាប់មួយ នោះគឺពិធីសែននំចាំង ដោយក្នុងនោះប្រជាជននាំគ្នាប្រណាំងទូកនាគសែននំចាំង និងហូបនំចាំង ដើម្បីរំលឹកដល់ភាពស្មោះត្រង់របស់លោក ឆី យាន។

ប្រភព៖ ហុងស៊ុយ

‍